Watchtower ONLINE LIBRARY
Watchtower
ONLINE LIBRARY
Chuuk
  • PAIPEL
  • PUK
  • MEETINGS
  • w02 11/1 p. 10-15
  • Alololareeta Ren “Ekkewe Manamanen Kot”

Ese wor video fán iten ei kinikin.

Omusaaló, a wor osukosuk le eppietá ewe video.

  • Alololareeta Ren “Ekkewe Manamanen Kot”
  • Ewe Leenien Mas a Esilefeili án Jiowa We Mwú—2002
  • Itelap Kisikis
  • Pwal Ekkóch
  • Alololareeta Ngeni Foffor!
  • An Kot We Kapas Mi Manaman
  • Alololareeta Le Apwonueta An Jiowa Kewe Alluk
  • ‘Ousap Tongei Fonufan’
  • Pwata mi Lamot Sipwe Túmúnú Napanapen Úfach me Foutach?
    Eáni Manaw mi Pwapwa Tori Feilfeiló!​—Eú Káéén Paipel
  • Napanapen Úfom A Elingaaló Kot?
    Ewe Leenien Mas a Esilefeili án Jiowa We Mwú—2016
  • Pwata Sia Úféúféch Atun Ach Kewe Mwich?
    Ié Kewe Ra Féfféri Letipen Jiowa Lón Ei Fansoun?
Ewe Leenien Mas a Esilefeili án Jiowa We Mwú—2002
w02 11/1 p. 10-15

Alololareeta Ren “Ekkewe Manamanen Kot”

“Sia rongorong ar kakapas lon pwisin ach kapas, o ra poporaus usun ekkewe manamanen Kot.”​—FOFOR 2:​11.

1, 2. Met sokkun mettoch mi amwarar a fis lon Jerusalem lon Pentekos 33 C.E.?

EU lesossor le muchuloon spring lon ewe ier 33 C.E., eu mettoch mi amwarar a fis ngeni eu mwichen mwan me fefin, noun Jises Kraist kewe chon kaeo ra mwichfengen lon eu imw lon Jerusalem. “Iwe, och mongungu a muttir feitiu seni lang, usun chok ungungun asapwal lapalap, a auralo lon unusen ewe im, ikewe ra momot ie. O ekkoch chonmongo, usun chok ngetengetin ekkei mi keangfesen, a pwato rer. . . .  Iwe, ir meinisin ra urelo ren ewe Ngun mi Fel, o ra popueta kakapas lon sokkun kapas mi sokkofesen.”​—Fofor 2:​2-4, 15.

2 Eu pwin aramas mi lapalap ra chuufengen mesemwan ewe imw. Ekkoch me leir chon Jus seni sokkopaten fonu, mwan mi “tuppwol” mi feito Jerusalem pwe repwe fiti ewe fetelapen Pentekos. Ra ruuko pokiten ra rongorong ekkewe chon kaeo lupwen ra kakapas lon pwisin ar kapas “usun ekkewe manamanen Kot.” Ifa ussun a tongeni fis ngeniir lupwen meinisin mi kapas nge ir chok chon Kalili?​—Fofor 2:​5-8, 11.

3 Emon me lein ekkena chon Kalili ewe aposel Piter. A awewei pwe fitu wiik me mwan, aramasingau ra fen nnielo Jises Kraist. Iwe nge, Kot a fen amanauata Noun we seni malo. Mwirin, Jises a pwalo mwen mesen chommong noun kewe chon kaeo, kapachelong Piter me pwal ekkoch mi nonnom lon ena fansoun. Engol chok ran me mwan, Jises a fen feita lang. I ewe emon a ninatiu ewe ngun mi fel won noun kewe chon kaeo. Ei mettoch a wor weween fan iten chokkewe mi fiti ewe fetelapen Pentekos? Pwungun ewer. An Jises malo a ammonlata ewe aal ngeni omusamusen ar kewe tipis me ar angei “ewe liffang, ewe ngun mi fel” ika ra eani lukuluk won i. (Fofor 2:​22-​24, 32, 33, 38) Iwe, met ekkena chon katon ra fori lupwen ra rongorong ussun “ekkewe manamanen Kot?” Me ifa ussun ei poraus a tongeni alisikich le chosani pwisin ach angang ngeni Jiowa?

Alololareeta Ngeni Foffor!

4 Pokiten ekkewe chon kaeo ra angei ewe ngun mi fel, ra muttir poputa le esileifetalei ewe kapas allimen amanau ngeni aramas, akkaewin ngeni chokkewe mi chuufengen lon ena sossoran Pentekos 33 C.E. Ar afalafal a apwonueta eu oesini mi amwarar Sowel, noun Petuel a makkei walupuku ier me mwan: “Epwe war ewe fansoun pwe upwe tiinato Nguni won aramas meinisin. Noumi mwan me fefin repwe osuni, ekkewe chinlap mwan me leimi repwe eani tan, nge noumi alual epwe wor kunaer. Lon ena fansoun upwe pwal tinato Nguni won chon angang mwan me chon angang fefin. . . . mwen epwe war ranin ewe Samol mi Lapalap.”​—Sowel 1:1; 2:​28, 29, 31; Fofor 2:​17, 18, 20.

5 Weween pwe Kot epwe eppieta eu tappin soufos, mwan me fefin, lon lapalapen Tafit, Sowel, me Tepora, pwe repwe oesini ussun mwach kkan? Aapw. Chon Kraist ‘nau mwan me fefin, chon angang mwan me chon angang fefin’ repwe oesini pokiten an Jiowa ngun mi fel epwe amwokutuur le esileifeili ussun “ekkewe manamanen Kot” Jiowa a fen fori me epwe chuen fori. Weween pwe repwe wiisen aueni auen ewe Mi Tekia Seni Meinisin.a Nge, met ewe pwiin aramas a fori?​—Ipru 1:​1, 2.

6 Mwirin ewe pwiin aramas a rongorong an Piter awewe, a chung letipen chommong leir me ra “papatais ir mi etiwa an kapas o lon ewe ranin arap ngeni ulungerou aramas ra apacha ngenir.” (Fofor 2:​41) Pokiten ir chon Jus me chon wiliilo, ra fen silei ewe Paipel. Ena silei, kapachelong ar luku won met ra fen kaeo seni Piter, a fen atufichi ar repwe papatais “fan iten ewe Sam, ewe Nau, me ewe Ngun mi Fel.” (Mattu 28:19) Mwirin ar papatais “ra likiitu lon afalafalen ekkewe chon kuno.” Me pwal lon ena fansoun, ra poputa le esileifetalei ar minefoon luku ngeni aramas. Pwungun pwe, “iteiten ran ra chufengen lon ewe imwen fel, . . . [ra] mwareiti Kot, o ra kuna chen me ren aramas meinisin.” Pokiten ar angangen afalafal, “ewe Samol a apacha ngenir, ran me ran, ekkewe mi tolong lon manau.” (Fofor 2:​42, 46, 47) Ekkewe mwichefelin chon Kraist ra muttir poputa lon chommong leeni ia ekkewe minefoon chon luku ra nonnom ie. Ese mwaal pwe ar chommongolo a pop seni ar tinikken le afalafala ewe “kapas allim” lupwen ra liwiniiti leenier kewe.​—Kolose 1:​23.

An Kot We Kapas Mi Manaman

7 Nge epwe ifa ussun chokkewe mi mochen wiliiti noun Kot chon angang ikenai? A lamot pwe repwe pwal kaeofichi an Kot we Kapas. Lupwen ra fori, repwe silei pwe Jiowa emon Kot mi “umoumoch me kirikiroch, . . . songomang, . . . woun tong me allukuluk.” (Ekistos 34:6; Fofor 13:48) Ra kaeo pwe Jiowa a fen awora fan kirikiroch ewe moon kepich ren Jises Kraist, me ra kaeo pwe chchaan a tongeni limetawu ar kewe tipis meinisin. (1 Jon 1:7) Ra pwal pwapwa le silei ussun an Kot kokkot pwe “epwe fis ewe manausefal ren ekkewe mi pung pwal ekkewe rese pung..” (Fofor 24:15) Tong fan iten ewe Popun “ekkewe manamanen Kot” a auralo letiper, me a alololareeta le afalafala ekkeei mettoch mi enlet. Mwirin ar fangolo manauer ngeni Kot me papataiselo, ra wiliiti noun Kot chon angang me ra sopweilo le ‘alapalo ar sinei usun Kot.’b​—Kolose 1:​10b; 2 Korint 5:​14.

8 Mi alollon ewe sile noun Kot kewe chon angang ra angei seni ar kaeo Paipel. Ena sile a alololareeta letiper, a siwili lapalapen ar ekiek, me a nonnom rer. (Ipru 4:​12) Ren chok awewe, emon fefin itan Camille a eani angangen kaworen tumun fan iten ekkewe mi chinnap. Emon a wiisen tumunu itan Martha, emon Chon Pwarata Jiowa. Pokiten a fokkun semmwen tupuwen Martha, a osupwangen alillis iteitan. A lamot pwe aramas repwe achema ngeni an epwe mongo​—pwal mwo nge pwe epwe oromalo anan. Iwe nge, mei wor eu mettoch Martha ese monukalo, ussun chok sipwe kuna.

9 Eu ran, Martha a kuna pwe Camille a kechiu pokiten pwisin an osukosuk. Martha a foropachei Camille me a etiwa i le kaeo ewe Paipel. Nge emon mi semmwen ussun chok Martha epwe tongeni kaeo Paipel ngeni aramas? Ewer, a tongeni! Inaamwo ika Martha ese chuen tongeni chechchemeni chommong mettoch, ese monukalo an we Kot mi amwarar; me ese monukalo ekkewe enlet mi auchea a fen kaeo seni ewe Paipel. Atun ar kaeo, Martha a ereni Camille pwe epwe alleani eu me eu parakraf, cheki met a mak lon ekkewe wokisin, alleani ewe kapas eis mi mak fan ewe pekin taropwe, me polueni ewe kapas eis. Ra fori ina ussun ren och fansoun, me inaamwo ika Martha a semmwen nge, Camille a feffeita lon an sile Paipel. Martha a miritiiti pwe a lamot an Camille chiechi ngeni chokkewe mi mochen angang ngeni Kot. Ren ena popun, a liffang ngeni noun we chon kaeo echo uf me eu pean sus, pwe epwe wor met epwe ufouf lupwen epwe fiti mwich lon ewe Kingdom Hall.

10 An Martha pwarata tong, an fofforoch, me an luku a achungu letipen Camille. A miritiiti pwe met Martha a sotun aiti ngeni a fokkun lamot, pokiten Martha a fen monukalo arapakan mettoch meinisin chilon chok met a fen kaeo seni Paipel. Feil, feil, lupwen a siwil an Camille leenien angang, a miritiiti ewe lamoten an epwe apwonueta minne a fen kaeo. Lon ewe aewin fansoun a tongeni fori, a tolong lon ewe Kingdom Hall, a ufouf ewe uf me a nounou ewe sus Martha a ngeni i, me a tingor an emon epwe kaeo Paipel ngeni. Camille a feffeita me a papataiselo.

Alololareeta Le Apwonueta An Jiowa Kewe Alluk

11 Ikenai, mei wor lap seni wonu milion Chon Pwarata Jiowa mi ussun chok Martha me iei Camille, mi afalafala ewe “kapas allim ussun ewe Muu” won unusen fonufan. (Mattu 24:14; 28:19, 20) Ussun chok ekkewe chon Kraist lon ewe aewin senturi, “ekkewe manamanen Kot” ra alololareeta. Ra kilisou pwe ra tongeni uwei iten Jiowa me pokiten Jiowa a niinatiu woor ngunun we. Iwe ra achocho le “manaueni ewe sokkun manau mi fich ngeni ach Samol, ewe sokkun manau i epwe unusen pwapwa ren,” me ra apwonueta an kewe alluk lon unusen manauer kapachelong ar alleasochisi allukun Kot ussun ufach me foutach.​—Kolose 1:​10a; Taitos 2:​10.

12 Ewer, Jiowa a isetiu ekkewe alluk ussun foutach. Ewe aposel Paul a makkei ekkoch me lein an Kot kewe alluk ussun ei mettoch. “Ua pwal mochen pwe ekkewe fefin repwe mirit, o repwe alingochu pwisin ir, ren sokkun ufer mi fich ngeni Soulang, sap ren firesini mokurer, are ren gold, are fau auchea, are mangaku mi liwinimmong, pwe ren fofor murinno, usun minne mi fich ngeni fefin mi achocho ngeni ar Soulang.”c Met sia kaeo seni ekkeei kapas?​—1 Timoti 2:​9, 10.

13 An Paul kewe kapas ra pwarata pwe chon Kraist repwe “alingaochu pwisin ir, ren sokkun ufer mi fich ngeni Soulang.” Fouter esap torotorongau, limengau, are nukunukungau. Meinisin, pwal mwo nge chokkewe mi woungau, mi tongeni apwonueta ei alluk ren ar tumunu pwe ufer mi torotoroch, limelimoch, me nukunukoch. Ren chok awewe, iteiten ier ekkewe Chon Pwarata lon eu fonu lon South America ra fetal fite fite mwail lon ewe wolap me mwirin ra wawa eu waafotun ren fite awa pwe repwe fiti ar mwichelap. Ekkoch ra turulong lon ewe chanpupu are ufer a sap won efoch ira atun ar sai. Ina popun lupwen ekkewe chon fiti ewe mwichelap ra tori ewe leeni ia ewe mwichelap epwe fis ie, fan chommong lapalaper a torotorongau. Iwe, ra awora ar fansoun pwe repwe pacheta ekkewe pwachen, forsefalli ekkewe siiper, me sopwuni me iron ekkewe uf repwe ufouf atun ewe mwichelap. Ra fokkun aucheani an Jiowa etiwer le mongo lon an we chepel, me ra mochen pwe ufer repwe fich ngeni ena fansoun.

14 Paul a pwal apasa pwe ufach repwe pwarata “mirit, o repwe alingochu pwisin ir.” Weween pwe foutach esap kon eingeing, amairu, oro nuanu, esap kon pwaralo lapalapen inisich, are esap ewe style a kon sennuk. Pwal och, ufach ‘epwe fich ngeni fefin mi achocho ngeni ar Soulang.’ A och ach sipwe ekieki ussun ena mettoch, ika met? Esap wewe ngeni pwe sipwe chok tumunu met sia ufouf lupwen sia fiti mwich nge tumunungau ngeni ufach lon ekkewe ekkoch fansoun. Sipwe tumunu pwe foutach epwe lapalapoch me pwarata sufol pokiten kich chon Kraist me kich chon afalafal 24 awa iteiten ran. Pwungun pwe ufach fan iten angang me sukul epwe fich ngeni ekkena fansoun. Nge, a lamot pwe ufach epwe fich ngeni emon chon Kraist me epwe pwarata sufol. Ika fansoun meinisin ufach a pwarata pwe sia luku Kot, sisap pireir le afalafal sereseroch pokiten sia saueiti ufach are foutach.​—1 Piter 3:​15.

‘Ousap Tongei Fonufan’

15 Ewe kapasen emmwen a mak lon 1 Jon 2:​15, 16 a pwal alisikich le filata ufach me foutach. A apasa: “Ousap tongei fonufan, are ekkena mettoch mi nonnom lon fonufan. Are emon a tongei fonufan, iwe, esor ewe tongen Semach lon i. Pun ekkena mettoch meinisin mi nonnom lon fonufan, mochenia-ingauen fituk, mochenia-ingauen mesach, o lamalam tekian ach pisek, ese mo popu seni ewe Sam, pwe seni chok fonufan.”

16 Mwa met ren ochun ena emmwen fan iten ach fansoun! Pokiten etipetipengauen fonufan a fokkun pochokkul ikenai, sise mochen mut ngeni ei fonufan an epwe nemeni ifa ussun sipwe ufouf. Stylin uf me fout a fen ngangauolo. Pwal mwo nge ufen ekkewe aramas mi angang lon ofes are ufen chon business ese alisikich le silei ewe sokkun uf a fich ngeni chon Kraist. Ina pwal eu popun a lamot ach sipwe tumunu iteitan pwe sisap “appiru pwomwen fonufan” ika sia mochen manaueni manauach me ren an Kot kewe alluk me iei ussun sipwe tongeni “alinga ewe afalafal usun Kot ach Chon Amanau.”​—Rom 12:2; Taitos 2:​10.

17 Mwen ka mooni echo ufom, kopwe akkom pwisin kapas eis: ‘Pwata ua saani ei style? Emon sou kol mi foummong a nounou ei sokkun style​—emon ua ingeiti? Ekkewe mi choni eu gang are eu mwichen aramas mi alisata ngunun pwisin uta are u ngeni ra nounou ei style?’ Sipwe pwal atittinafichi ewe uf. Ika sipwe mooni eu uf are eu skato, ifa ussun ttaman? Ifa ussun kaukun ewe uf? Ewe uf mi murinno, mi fich ngeni Chon Kraist, me mi pwarata sufol, are mei ngutungut, oro nuanu, are torotorongau? Kopwe pwisin eisinuk, ‘Upwe oturukapa aramas ika ua ufeni ei uf?’ (2 Korint 6:​3, 4) Met popun sipwe ekieki ussun ena mettoch? Pokiten ewe Paipel a apasa: “Pun Kraist ese mo apwapwai pwisin i.” (Rom 15:3) A lamot pwe ekkewe mokuren famili Chon Kraist repwe ekieki ussun fouten ar famili. Pokiten ar sufoliiti ewe Kot mi ling ra fel ngeni, a lamot pwe mokuren famili resap pireir le awora alillis mi fiti tong lupwen a fich ngeni.​—Jemes 3:​13.

18 Ewe poraus sia uweifetalei a feito seni Jiowa, ewe leenien appiru mi murinno seni meinisin ussun fairo me pin. (Aisea 6:3) Ewe Paipel a peseikich le appiru i “usun chok noun kewe mi achengicheng.” (Efisus 5:1) Ufach me foutach a tongeni aitochuolo are aitengaua Semach mi nonnom lang. Pwungun pwe sia mochen apwapwai letipan!​—An Salomon Fos 27:11.

19 Met meefiom ussun “ekkewe manamanen Kot” ka fen kaeo? Pwungun pwe sia fokkun feioch pokiten sia fen kaeo ewe enlet! Pokiten sia eani lukuluk won chchaan Jises Kraist, ach kewe tipis ra musolo. (Fofor 2:​38) Iwe mwiriloon, esor a eppeti ach kapas ngeni Kot. Sise niueiti malo ussun chok chokkewe esor ar apilukuluk. Nge, a wor rech an Jises alukuluk pwe eu ran “chon peias meinisin repwe rong leuwan, o repwe tou”. (Jon 5:​28, 29) Jiowa fan an chen a fen pwaralo ekkeei mettoch meinisin ngenikich. Pwal och, a fen niinatiu rech ngunun we. Ina popun, ach kilisou fan iten ekkeei liffang mi murinno meinisin epwe ita amwokutukich le alleasochisi an kewe alluk mi tekia me mwareiti i ren tinikken, me esileifeili “ekkewe manamanen Kot” ngeni aramas.

[Footnotes]

a Lupwen Jiowa a filata Moses me Aaron pwe repwe kapas ngeni Farao fan iten ekkewe aramas, A ereni Moses: “Nengeni, upwe awisok pwe kopwe usun chok eman kot ngeni Farao, nge Aaron pwium we epwe usun chok noum soufos.” (Ekistos 7:1) Aaron a eani ewe wiis soufos, nge esap ren an oesini ussun met epwe fis lon mwach kkan, nge ren an aueni auen Moses.

b Ren chokkewe mi fiti ewe Faafin Ach Samol lon March 28, 2002, fite milion me leir resaamwo wesewesen angang ngeni Jiowa. Sia iotek pwe epwe chung letipen chommong chokkeei pwe repwe achocho le wiliiti chon afalafala ewe kapas allim.

c Inaamwo ika Paul a makkeei ekkeei kapas fan iten ekkewe fefin chon Kraist nge, ekkewe kapasen alongolongun alluk ra pwal weneiti ekkewe chon Kraist mwan me sarafo.

Ifa Ussun Kopwe Polueni?

• Ikkefa “ekkewe manamanen Kot” aramas ra rongorong ussun lon Pentekos 33 C.E., me met ra fori?

• Ifa ussun emon a tongeni wiliiti emon noun Jises Kraist chon kaeo, me met epwe fori ika a wiliiti emon chon kaeo?

• Met popun a lamot ach sipwe tumunu ufach me foutach?

• Met sipwe ekieki ussun lupwen sia filata ika echo ufach are eu style a murinno?

3. Ifa ewe poraus ewe aposel Piter a esilei ngeni ewe pwin aramas lon ranin Pentekos?

4. Menni oesini an Sowel a pwonueta lon ewe ranin Pentekos 33 C.E.?

5. Ifa ussun ekkewe chon Kraist lon ewe aewin senturi ra oesini? (Nengeni ewe footnote.)

6. An Piter afalafal a amwokutu ewe pwin aramas le fori met?

7. (a) Met a luki aramas seni ekkewe muu meinisin ngeni an Jiowa mwicheich ikenai? (b) Me reom ifa ussun epwe pwal tongeni lapelo ach angangen afalafal won unusen fonufan pwal lon pwisin om leenien afalafal? (Nengeni ewe footnote.)

8-10. (a) Ifa ussun porausen emon chon Kraist fefin a anneta pwe an Kot Kapas a “manaman”? (b) Met ei poraus a aiti ngonuk ussun Jiowa me fofforun kewe ngeni noun kewe chon angang? (Ekistos 4:​12)

11. Fengen me ach tinikken lon ewe angangen afalafal, ifa ussun sipwe tongeni pwarata pwe ewe poraus ussun ewe Muu a alololakicheta?

12. Menni emmwen mi titchik ussun ufach me foutach sia tongeni alleani lon 1 Timoti 2:​9, 10?

13. (a) Met weween “alingaochu pwisin ir ren sokkun ufer mi fich ngeni Soulang”? (b) Pwata sipwe tongeni apasa pwe allukun Jiowa kewe rese aweiresikich?

14. (a) Met weween ach sipwe ufouf ren “mirit” me ufach repwe fich ngeni Kot? (b) Met weween pwe ufach ‘epwe fich ngeni fefin mi achocho ngeni ar Soulang’?

15, 16. (a) Met popun a lamot ach sisap appiru ufen me fouten fonufan? (1 Jon 5:​19) (b) Met popun sisap fiti ekkewe style lon uf me fout mi kon sennuk?

17. (a) Menni kapas eis sipwe ekieki ussun lupwen sia kamoni echo ufach are lupwen sia filata eu style? (b) Met popun mokuren famili repwe tumunu ufen me fouten chon an famili?

18. Met a amwokutuk le tumunufichi ufom me foutom?

19. Ikkefa ekkewe feioch epwe torikich ika sia esileifeili “ekkewe manamanen Kot” ngeni aramas?

[Picture on page 11]

Piter a esileifeili pwe Jises a fen manausefal seni malo

[Pictures on page 13]

Foutom a aitochuolo ewe Kot ka fel ngeni?

[Pictures on page 14]

Chon Kraist sam me in repwe tumunufichi ufen me fouten chon ar famili

    Meinisin mi Peres lón Fósun Chuuk (1987-2025)
    Log Out
    Log In
    • Chuuk
    • Share
    • Preferences
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Settings
    • JW.ORG
    • Log In
    Share