Áiti Aramas ewe Enlet

Poputá seni September, epwe kawor minefé afalafal itelapan, “Áiti Aramas ewe Enlet” lón ewe Manawach me Ach Angangen Afalafal Minen Káé fán Iten Mwich. Popun a kawor, pwe sipwe menlapei ngeni aramas eú pwóróus mi enlet lón Paipel, ren ach néúnéú eú kapas eis me eú wokisin.

Ika sia meefi pwe ewe chón imw a sani ewe pwóróus, amwasangasanga fán iten ach sipwe liwiniti ren ach anéúnéú ngeni eché tract are eú puk are fichi video seni jw.org. Sipwe achocho le liwinitiir mwirin chék fitu rán pwe sipwe sópweló met sia fen pwóróusfengen wóón. Ekkewe minefé afalafal me án ekkewe chón afalafal kinikin epwe alóngólóng wóón ekkewe pwóróus mi nóm lón ewe puk Met ewe Paipel A Wesewesen Apasa? Me ikena ie sipwe kúna ekkóch kapas eis me wokisin epwe álisikich le chuursefáli aramas are káé ngeniir nge sipwe chék néúnéú Paipel.

A wor efóch chék al ngeni manaw. (Mat 7:13, 14) Pokiten sia kan fóffós ngeni aramas mi sókkofesen ar lamalam me nónnómur, a lamot sipwe áitiir ewe enlet seni Paipel lón napanap emén me emén epwe pwapwaiti. (1Ti 2:4) Atun sia silei met sipwe apasa usun sókkopaten pwóróus lón Paipel me lipwákéch le “afalafala än Kot kapas mi let fän pwüng,” ach pwapwa epwe lapóló me sipwe sópwéch le asukula ewe enlet ngeni aramas.​—2Ti 2:15.