Áwewe fán Iten Manawach me Ach Angangen Afalafal Mwich
April 2-8
PWÓRÓUS AÚCHEA SENI KAPASEN KOT | MATEUS 26
“Ewe Pasofer me ewe Áchechchem—Minne Ra Léllé me Sókkofesen Wóón”
nwtsty-E media
Ewe Mwéngéén Pasofer
Ikkeei ekkewe mettóch mi lamot ngeni ewe mwéngéén Pasofer: (1) emén lam mi kapwich (esap wor chúún epwe kup); (2) pilawa ese lefen; me (3) chéén iasai mi maras are kipwin. (Eks 12:5, 8; Num 9:11) Ekkena chéén iasai ra áchema ngeni ekkewe chón Israel usun marasen ar we slave me riáfféú lón Isip. Jesus a áeá ewe pilawa ese lefen pwe esissillen inisin we mi unuséch. (Mat 26:26) Me ewe aposel Paulus a eita ngeni Jesus “ach we Lamen Pasofer.” (1Ko 5:7) Ló, ló, ló, ekkewe chón Jus ra pwal áeá (4) wain lón ewe mwéngéén Pasofer. Jesus a áeá ewe wain pwe epwe liosuetá chchaan, ewe epwe niniló pwe eú asor.—Mat 26:27, 28.
(Mateus 26:26) Iwe, lupwen ra mongöfengen, Jesus a angei ewe pilawa, a iotekin kilisou won, iwe, a kinikisietiu. A ineti ngeni nöün kewe chon kaiö o apasa, “Oupwe angei o mongö, iei inisi [“a wewe ngeni inisi,” NW].”
nwtsty-E study note wóón Mat 26:26
wewe ngeni: Inaamwo ika alon Jesus na a tongeni afféú ngeni “iei inisi,” nge lón ei wokisin a weneiti “a wewe ngeni [are “liosuetá”] inisi.” A ffat ngeni ekkewe aposel pwe ina weween pokiten lón ena atun i a nóm mwer me pwal ewe pilawa ese lefen repwele mwéngé. Ina popun, ewe pilawa esap wesewesen inisin Jesus we mi unuséch. Ewe kapasen Krik mi pwá lón ei wokisin a pwal pwá lón Mat 12:7, me chómmóng chón afféú Paipel ra afféúni ngeni “weween.”
(Mateus 26:27, 28) Mürin a angei eu kap, a iotekin kilisou won, iwe, a ngeniir o apasa, “Ämi meinisin oupwe ün seni. 28 Pun iei chai a allükülükü än Kot we pwon mi fö [“chchaan ewe pwonen etipeeú,” NW] ngenikemi, a ninnila fänäsengesin chomong aramas, pwe amusamusen ar tipis kana.
nwtsty-E study note wóón Mat 26:28
chchaan ewe pwonen etipeeú: Ewe pwonen etipeeú mi fé lefilen Jiowa me ekkewe Chón Kraist mi kepit a tufich ren án Jesus we máló. (Ip 8:10) Lón ei atun, Jesus a néúnéú ewe chék kapas Moses a néúnéú atun a wisen chón affér fán iten chón Israel me a poputááni ewe pwonen etipeeú fán iten ewe Allúk wóón ewe chuuk Sinai. (Eks 24:8; Ip 9:19-21) Usun chék ewe pwonen etipeeú fán iten ewe Allúk lefilen Kot me mwúún Israel a pwénútá ren chchaan kow me siike, ewe pwonen etipeeú mi fé Jiowa epwe féri me ewe Israel lón pekin lúkú epwe pwénútá ren chchaan Jesus. Ena etipeeú a poputá me Pentikost lón ewe ier 33.—Ip 9:14, 15.
Kúkkútta Pwóróus Aúchea
nwtsty-E study note wóón Mat 26:17
lón áeúin ránin ewe chulapen mwéngé pilawa esap wor iis lón: Ewe Chulapen Mwéngé Pilawa Esap Wor Iis Lón a poputá lón Nisan 15, ewe rán mwirin ewe Pasofer (Nisan 14), me ra féri lón úkúkún fisu rán. (Ppii sgd Kinikin 19.) Nge lón fansoun Jesus we, ewe Pasofer a kon riri ngeni ei chúúlap pwe ekkena walu rán, kapachelong ewe Nisan 14, fán ekkóch aramas ra eita ngeni “ewe chulapen mongö pilawa esap wor iis lon.” (Luk 22:1) Lón ei áwewe, ewe kapas “lon aeuin ränin” a tongeni afféú ngeni “lón ewe rán me mwan.” (Apépé ngeni Jo 1:15, 30, ikewe ie ewe kapasen Krik fán iten “áeúin” [proʹtos] a afféú ngeni “mwen,” weween “a nom mwen [proʹtos] ai üsamwo uputiu.”) Ika sia chechchemeni weween ena kapasen Krik me pwal eérenien ekkewe chón Jus, iwe sia tongeni weweiti pwe ekkewe chón káé ra kapas eis ngeni Jesus lón ewe rán Nisan 13. Leránin Nisan 13, ekkewe chón káé ra ammólnatá fán iten ewe Pasofer, iwe mwirin ra féri ewe Pasofer lepoputáán ewe rán Nisan 14, “lupwen a tori lekuniol.”—Mar 14:16, 17.
nwtsty-E study note wóón Mat 26:39
angei seniei ei kapen riáfféú: Fán chómmóng lón Paipel, “kap” a liosuetá met letipen Kot fán iten emén, are wisan me ren Kot. Ese mwáál Jesus a fókkun lólilen pwe an máló epwe eitengawa Kot pokiten aramas ra tipi ngeni pwe i emén chón eáni kapasen turunufasa Kot me chón efisatá osukosuk ngeni ewe mwú. Iwe a iótek pwe ewe ‘kap’ epwe ló seni.
April 9-15
PWÓRÓUS AÚCHEA SENI KAPASEN KOT | MATEUS 27-28
“Feiló pwe Repwe Wiliti Chón Tapweló Mwirin Kraist—Pwata, Ia, me Ifa Usun?”
‘Feilo Foralo Chon Kaeo’
4 A wor an Jises nemenem won an we mwichefel, me seni 1914, a wor an nemenem won an Kot we Muu mi koran poputa. (Kolose 1:13; Pwarata 11:15) Iwe, pokiten i ewe chonlang mi lapalap seni meinisin, a nemeni ekkewe fitepuku milion sounfiun chonlang. (1 Tesalonika 4:16; 1 Piter 3:22; Pwarata 19:14-16) Seman we a awiisa ngeni an epwe ataielo “ekkewe muu meinisin me nemenem meinisin me manaman” mi u ngeni ekkewe kapasen alongolongun alluk mi pwung. (1 Korint 15:24-26; Efisus 1:20-23) Ese aukuk an Jises we nemenem won chok ir kewe mi manau. Epwe pwal “sou kapwungun ekkewe mi manau me ekkewe mi malo” iwe, a pwal wor an manaman seni Kot pwe epwe amanauasefallita ekkewe mi fen mourelo lon malo. (Fofor 10:42; Jon 5:26-28) Enlet, sipwe fokkun alamota eu alluk mi katou seni ewe Emon mi sokkolo watten an nemenem. Ina minne, fan sufol, sipwe mochen alleasochisi an Kraist we alluk pwe sipwe ‘foralo chon kaeo.’
(Mateus 28:19, NW) Ina minne, oupwe feiló me asukula aramasen mwú meinisin pwe repwe wiliti chón tapwoto mwiri, me papataisiir lón iten ewe Sam me ewe Naw me ewe ngún mi fel.
nwtsty-E study note wóón Mat 28:19
asukula aramas . . . pwe repwe wiliti chón tapwoto mwiri: Ewe kapasen Krik ma·the·teuʹo a tongeni afféú ngeni “asukula” ren án ekkewe aramas repwe wiliti chón káé. (Apépé ngeni Mat 13:52 mi afféú ngeni “fen kaiö.”) Ekkewe kapas “papataisiir” me “asukuler” ra pwáraatá met a kapachelong lón angangen álisi aramas le wiliti chón tapweló mwirin Kraist.
aramasen mwú meinisin: A wesewesen wewe ngeni “mwú meinisin,” nge unusen ewe wokisin a pwári pwe ena itiitin kapas a wewe ngeni aramas seni ekkewe mwú meinisin, pokiten ewe kapasen Krik fán iten “iir” lón ewe itiitin kapas papataisiir a weneiti aramas nge esap “mwú.” Eú mineféén allúk ei “asukula aramasen mwú meinisin.” Mwen fansoun Jesus, ewe Tesin Ipru a affata pwe ekkewe aramas esap iir chón Jus ra ketiw ngeni Israel ika pwe repwe feito fel ngeni Jiowa. (1Ki 8:41-43) Nge ren ei mineféén allúk, Jesus a allúk ngeni néún kewe chón káé ar repwe pwal afalafal ngeni chókkewe esap iir chón Jus, iwe a menlapei pwe ewe angangen álisi aramas le wiliti chón tapweló mwirin epwe fis wóón unusen fénúfan.—Mat 10:1, 5-7; Pwä 7:9.
(Mateus 28:20, NW) Oupwe asukuler pwe repwe álleasochisi meinisin ekkewe mettóch ua fen allúkú ngenikemi. Me nengeni! Upwe nónnóm remi lón meinisin ekkewe rán tori sópwólóón ótóten fénúfan.”
nwtsty-E study note wóón Mat 28:20
asukuler: Ewe kapasen Krik mi afféú ngeni “asukula” a kapachelong káit, áweweei, ánnetaéchú ekkewe pwóróus, me awora pisekin ánnet. (Ppii study note wóón Mat 3:1; 4:23.) Epwe chék sópwósópwóló ewe angangen asukula aramas le álleasochisi meinisin met Jesus a allúkú ngenikich, me a kapachelong asukula aramas áitian kewe, apwénúetá minne a áiti ngenikich, me áppirú i.—Jo 13:17; Ef 4:21; 1Pe 2:21.
Kúkkútta Pwóróus Aúchea
nwtsty-E study note wóón Mat 27:51
chechchen mangaku: Ei mangaku mi eling a áimufeseni ewe leeni mi Unusen Pin seni ewe leeni mi Pin lón ewe imwenfel. Ekkewe chón Jus me lóóm ra erá pwe ei chechchen mangaku mi chou, ttaman a 60 ft, chélapan 30 ft, me maanúnún 2.9 in. Án Jiowa kamwefeseni ewe chchech mangaku, a pwáraaló an lingeringer ren chókkewe ra ni Néún we me a pwal wewe ngeni pwe a suuk ngeni aramas ewe ápilúkúlúkún manaw lón láng.—Ip 10:19, 20; ppii ewe Glossary.
imwenfel: Ewe kapasen Krik na·osʹ lón ei wokisin a weneiti chék ewe imw, ewe ia ekkewe rum Unusen Pin me Pin ra nóm ie.
nwtsty-E study note wóón Mat 28:7
esile ngeni néún kewe chón káé, pwe . . . a manawsefál seni máló: Ewe chónláng a akkomw esile ngeni ekkeei fefin me lein ekkewe chón káé usun án Jesus manawsefál. A pwal allúk ngeniir pwe repwe wisen esile ngeni pwal ekkewe ekkóch chón káé. (Mat 28:2, 5, 7) Me ren ewe eérenien chón Jus nge mi ú ngeni Kapasen Kot, ese mumutá án emén fefin epwe chón pwáraatá lón kapwúng. Nge néún Jiowa na chónláng a sókkóló pún a asamolu ekkeei fefin ren an ngeniir ena wis mi apwapwa.
April 16-22
PWÓRÓUS AÚCHEA SENI KAPASEN KOT | MARKUS 1-2
“Om Tipis Kana Ra Musala”
jy-E 67 ¶3-5
“Om Tipis Kana Ra Musala”
Atun Jesus a asukul lón eú imw mi ur ren ewe mwichemmongun aramas, fémén mwán ra uweato emén mwán mi peló inisin wóón eú leenien keki. Ra mochen án Jesus epwe echikara chiechier na. Nge pokiten chómmóngun aramas, rese tongeni “mwäreeto ewe mwän ren Jesus.” (Markus 2:4) A fókkun elichippúng ena. Iwe, ra tétá wóón osun ewe imw me pwangeni ewe óós. Mwirin ra éúratiw ewe leenien keki ewe mi peló inisin a koon wóón.
Iwe met, Jesus mi song pokiten ar atai an afalafal? Ese fókkun song! A pwal mwo nge fókkun ingeitiir ren ar lúkú me ereni ewe mwán mi peló inisin: “Om tipis kana ra musala.” (Mateus 9:2) Nge met, Jesus mi tongeni wesewesen omusaaló tipisin aramas? Ekkewe senseen allúk me ekkewe Farisi ra esiita Jesus me ra ekieki: “Pwota ätei a iei usun an kapas? A eäni kapasen turunufas. Iö a tongeni amusala tipis, sap Kot echök?”—Markus 2:7.
Jesus a silei met ra ekieki, ina minne a ereniir: “Pwota oua ekieki iei usun lon lelukemi? Meta a mecheres, ai apasa ngeni ei mwän mi mwök, ‘Om tipis kana ra musala,’ are ai apasa, ‘Kopwe ütä, angei kiom o fetal’?” (Markus 2:8, 9) Ewer, Jesus a tongeni omusaaló tipisin ewe mwán, nge an féri ena a lóngólóng wóón ewe asor epwele féri.
nwtsty-E study note wóón Mar 2:9
Met a mecheres: A mecheres án emén epwe chék erá pwe a tongeni omusaaló tipisin emén pokiten ese pwal lamot epwe wor pisekin ánnet epwe ánnetatá ika pwe mi pwúng met a apasa. Nge án Jesus apasa Útá, . . . o fetál, a lamot an epwe féri och manaman pwe epwe ffat ngeni aramas meinisin pwe mi wor an pwúúng le omusaaló tipis. Ei pwóróus me Ais 33:24 ra eriri samau ngeni tipis.
Kúkkútta Pwóróus Aúchea
nwtsty-E study note wóón Mar 1:11
eú méngúngú a feitiw seni láng: Jiowa a pwisin fós ngeni aramas. Iei ewe áeúin fansoun me lein ekkewe úlúngát a mak lón ekkewe Puken Kapas Allim.—Ppii ekkewe study note wóón Mar 9:7; Jo 12:28.
En Nei: Atun an Jesus nóm láng, i ewe Néún Kot. (Jo 3:16) Atun a uputiw usun emén aramas, Jesus i emén “nöün Kot” usun chék Atam atun a chúen unuséch. (Luk 1:35; 3:38) Nge lón ei wokisin usun Kot a pwal pwári och me lúkún an chék affata ika ié Jesus. Ren an néúnéú ena itiitin kapas fiti an tiinatiw ewe ngún mi fel wóón Jesus, a pwáraatá pwe ewe aramas Jesus a wiliti Néún lón pekin ngún. Weween pwe Jesus a “upsefäl” me a wor an ápilúkúlúk le liwiniti manaw lón láng me a kepit ren ewe ngún mi fel pwe epwe King me Souasor mi Lap.—Jo 3:3-6; 6:51; apépé ngeni Luk 1:31-33; Ip 2:17; 5:1, 4-10; 7:1-3.
ua unusen pwapwa reom: Ena itiitin kapas a pwal mak lón Mat 12:18, ewe a aloni alon Ais 42:1 usun ewe Messaia are Kraist mi pwonetiw. Án Kot tiinatiw ewe ngún mi fel me met a apasa usun Néún we, a ánnetatá pwe Jesus i ewe Messaia mi pwonetiw.
nwtsty-E study note wóón Mar 2:28
Sounemenemen ewe ránin Sapat: Jesus a apasa ei ren pwisin i. (Mat 12:8; Luk 6:5) A áweweei pwe a tongeni angang lón ewe ránin Sapat an epwe féri ewe angang Seman we lón láng a allúkú ngeni. (Apépé ngeni Jo 5:19; 10:37, 38.) Lón ewe Sapat, Jesus a féri ekkewe manaman mi kon amwarar kapachelong an echikaraatá ekkewe mi samau. (Luk 13:10-13; Jo 5:5-9; 9:1-14) Ei a liosuetá ewe sókkun ngas epwe atoto ngeni aramas atun a nemenem lón an we Mwú, nge ena ngas epwe usun chék eú asésé atun ránin Sapat.—Ip 10:1.
April 23-29
PWÓRÓUS AÚCHEA SENI KAPASEN KOT | MARKUS 3-4
“Echikaraatá Aramas lón Sapat”
jy-E 78 ¶1-2
Met A Pwúng lón Sapat?
Lón pwal eú ránin Sapat, Jesus a feiló lón eú sinakok, neman lón Kalilea. Me ikena ie a kúna emén mwán mi pe peliefichin péún. (Lukas 6:6) Ekkewe senseen allúk me ekkewe Farisi ra akkattolafichi Jesus. Pwata? Ra pwáraaló met wesewesen masouen leluker atun ra eis: “Ifa usun, a ngau ngeni allükün ach lamalam an eman epwe apöchöküla eman aramas lon ränin sapat?”—Mateus 12:10.
Ekkewe néúwisin lamalamen chón Jus ra lúkú pwe lón ránin Sapat esap wor angangen echikara emén, chilóón chék ika a kon feiengaw pwe epwele máló. Áwewe chék, lón Sapat mi allúk án emén epwe álisi ié mi kup chúún are ru péún ika pechen, ekkeei sókkun mettóch emén esap máló ren. A ffat pwe ekkewe senseen allúk me ekkewe Farisi rese eisini Jesus ena kapas eis ren ar wesewesen tongei ewe mwán mi kon riáfféú. Ra fen kútta och popun minne repwe oturu Jesus wóón.
jy-E 78 ¶3
Met A Pwúng lón Sapat?
Iwe nge, Jesus a silei ar ekiek mi pworoingaw. A silei pwe ar ekiek usun ewe allúkún Sapat a kon luló me a ú ngeni kapasen Kot. (Ekistos 20:8-10) Jesus a fen kúna watteen esiit pokiten ekkewe mettóch mi pwúng a féri lón Sapat. Iwe iei, Jesus epwele féri och mettóch mi amwarar epwe asonga ekkewe néúwis, a apasa ngeni ewe mwán mi pe péún: “Kopwe feito ikei mwen ekewe aramas.”—Markus 3:3.
nwtsty-E study note wóón Mar 3:5
fán an song, nge a pwal letipeta: Ewe soumak Markus chék a makkeei meefien Jesus atun a kúna úleférean letipen ekkewe néúwisin lamalam lón ei atun. (Mat 12:13; Luk 6:10) Neman Markus a silei seni Petrus, emén mi mwittir chúng letipan, wesewesen meefien Jesus lón ena atun.—Katol ewe video “Introduction to Mark.”
Kúkkútta Pwóróus Aúchea
nwtsty-E study note wóón Mar 3:29
kapasen turunufas usun ngún mi fel: Kapasen turunufas a wewe ngeni kapasen eitengaw are kapasen kirikiringaw ngeni Kot are och mi pin. Pokiten ewe ngún mi fel a pop seni pwisin Kot, án emén unusen ú ngeni are amam me ese etiwa angangan a wewe ngeni eú kapasen turunufasa Kot. Usun met a mak lón Mat 12:24, 28 me Mar 3:22, ekkewe néúwisin lamalamen Jus ra kúna angangen án Kot ngún mi fel wóón Jesus atun a féri ekkewe manaman nge ra apasa pwe a fériir fán manamanen Satan ewe Tefil.
tipis esap wor komusolóón lón fansoun esemuch: A wewe ngeni án emén pwúkún mochen féri tipis nge epwe sópwongaw feilfeiló. Ese wor sókkun asor epwe tongeni omusa ena esin tipis.—Ppii ewe study note wóón kapasen turunufas usun ngún mi fel lón ei wokisin.
Ka Weweiti Weween?
6 Met sia káé seni ei kapas áwewe? Akkomw, mi lamot sipwe mirititi pwe sise tongeni nemeni an ewe chón káé feffeitá lón ewe enlet. Ach tipetekison epwe álisikich le túmúnú ach sisap eriáni emén chón káé pwe epwe papatais. Kich meinisin sia tongeni álisi ewe emén, nge fán tipetekison sipwe mirititi pwe epwe pwisin filien ewe chón káé ika epwe fangóló manawan ngeni Kot. An féri ena kefil epwe itá pokiten letipan a chúng ren an enletin tongei Kot. Ina chék ewe popun Kot epwe tongeni pwapwaiti án eménna fangóló manawan ngeni.—Kölf. 51:12; 54:6; 110:3.
7 Oruuan, ach weweiti ewe lesen lón ei kapas áwewe epwe álisikich ach sisap letipengaw lupwen sise kúna uwaan ach angang me lepoputáán. Mi lamot sipwe mosonottam. (Jas. 5:7, 8) Ika sia féri úkúkún ach tufich le álisi ewe chón káé nge ese uwa, sipwe mirititi pwe esap weween nge sise tuppwél ngeni Kot. Jiowa a mut ngeni ewe pwikilin enlet an epwe máár lón chék ewe sókkun letip mi tipetekison, ewe mi tipemecheresin féri ekkesiwil. (Mat. 13:23) Ina minne, mi lamot ach sisap alónga lipwákéchúch lón ewe angangen afalafal ren chék uwaan ach angang. Nge me ren Jiowa, sópwéchún ach angangen afalafal ese lóngólóng wóón án aramas etiwakich are rese. Nge Jiowa a aúcheani ach tuppwél le angang ngeni ese lifilifil minne a fis lón ach angang.—Álleani Lukas 10:17-20; 1 Korint 3:8.
8 Aúlúngátin, fán chómmóng sise tongeni kúna ekkewe ekkesiwil a fiffis lón letipen aramas. Áwewe chék, eú pean pwúpwúlú, néún emén misineri chón káé, ra ereni pwe ra mochen repwe wiliti chón afalafal esaamwo papatais. Ewe misineri a áchema ngeniir pwe ren an epwe fich ngeniir ena wis mi lamot repwe úkútiw le ún suupwa. Nge ewe misineri a máirú lupwen ra ereni pwe a fen fitu maram ar rese chúen ún. Pwata ra úkútiw? Ra mirititi pwe Jiowa a tongeni kúna ar ún suupwa, iwe itá met lamoten ar aopa seni aramas nge Jiowa a oput likótuputup. Ina minne, letiper a chúng le féri eú kefil, ika repwe chék ún mwen mesen ewe misineri are unusen péútaaló. Ar tong ngeni Jiowa mi kerán mááritá a álisiir le féri eú kefil mi pwúng. Ra feffeitá lón ar lúkú inaamwo ika ewe misineri ese tepereni pwe a fen fis ena siwil.
April 30–May 6
PWÓRÓUS AÚCHEA SENI KAPASEN KOT | MARKUS 5-6
“A Wor án Jesus Manaman le Amanawasefáli Attongeach Kewe”
nwtsty-E study note wóón Mar 5:39
esap máló, pwe a chék méúr: Lón Paipel, máló a usun án emén annut. (Kf 13:3; Jo 11:11-14; Föf 7:60; 1Ko 7:39; 15:51; 1Te 4:13, NW) Jesus epwele amanawasefáli ewe nengngin, iwe neman a apasa ena pokiten epwe pwáraatá pwe usun chék án aramas tongeni neló seni ar annut, aramas ra tongeni manawetá seni máló. Án Jesus manaman le amanawasefáli ewe nengngin a feito seni Seman we, “ewe mi amanawatá ekkewe mi máló me fós usun ekkewe mettóch resaamwo pwénútá usun itá nge ra fen pwénútá.”—Ro 4:17, NW.
jy-E 118 ¶6
Emén Nengngin A Manawetá!
Lón ekkewe fansoun Jesus a echikaraatá ekkewe aramas, a fen allúkú ngeniir ar resap apwóróusafetálei met a féri fán iter, iwe a pwal apasa ena ngeni semen me inen ewe nengngin. Nge, ekkena sam me in mi fókkun pwapwa me ekkewe ekkóch ra achéúfetálei ewe pwóróus “won unusen ewe fanü.” (Mateus 9:26) Met, kosap pwal meseik le apwóróusa ngeni ekkewe ekkóch ika ka kúna emén attongeom a manawetá? Iei ewe oruuen pwóróus usun manawsefál Jesus a féri mi mak lón Paipel.
Kúkkútta Pwóróus Aúchea
nwtsty-E study note wóón Mar 5:19
apwóróusa ngeniir: Jesus a kan ereni aramas ar resap apwóróusafetálei pwóróusen an kewe manaman (Mar 1:44; 3:12; 7:36), nge lón ei atun, a ereni ei mwán an epwe apwóróusa ngeni aramasan kewe met a fis ngeni. Neman Jesus a ereni ena pokiten pwisin i esap tongeni afalafal ngeniir pún ekkewe aramas ra tingorei an epwe towu seni leenier we. Pwal och, neman epwe chéúfetál ekkóch pwóróus mi ngaw usun péútúlóón ekkewe pik, nge án ei mwán apwóróusa minne a wesewesen fis epwe tongeni áwena ekkena pwóróus.
nwtsty-E study note wóón Mar 6:11
wichikaaló pwúlún fán pechemi: Ei féffér a wewe ngeni pwe ekkewe chón káé ra pwáraatá pwe ra fen apwénúetá wiser mwen mesen Kot le sótun afalafal ngeni ekkewe aramas nge rese etiwa, iwe repwe chék likit ngeni Kot an epwe apwúngúúr. A pwal ina usun ewe itiitin kapas mi mak lón Mat 10:14 me Luk 9:5. Markus me Lukas ra pwal apachaalong ei itiitin kapas: epwe eu minen pwáraatá [are, “éúréúr”] ngeniir. Paulus me Parnapas ra fiti ena emmwen me lón Antiokia lón Pisitia (Föf 13:51), me atun Paulus a pwal féri ena sókkun lón Korint ren an wichikaaló pwúlún úfan, a pwal apasa ekkeei kapas: “Are ämi oua pöütmwälila, püsin tipisimi, nge sap tipisi!” (Föf 18:6) Neman ekkewe chón káé ra fen silei ekkena esin eéreni. Ekkewe chón Jus mi sái ngeni ekkewe fénúen chón Jentail ra wichikaaló pwúlún fán ipwer kewe, ewe a kon limengaw me rer, me mwen ar repwe tolongsefál lón fénúen chón Jus. Iwe nge, mi ffat pwe esap ina met Jesus a ekieki atun a allúkú ngeni néún kewe chón káé ar repwe wichikaaló pwúlún fán pecher.