SÓPWUN 11
‘Oupwe Asamolu Pupulu’
“Meseikeiti ewe föpwül ka pwülüeni lupwen om alüal.”—ÄN SALOMON FOS 5:18.
1, 2. Ifa ewe kapas eis sipwe pwóróus wóón? Pwata?
EN MI pwúpwúlú? Ika ewer, iwe mi apwapwa are áweires óm pwúpwúlú? A patapateló ámi pacheéchfengen me pwúlúwom we? Ka chék nóm ren fán ósópwisek nge kese pwapwaiti ámi pwúpwúlú? Ika ina, iwe ese mwáál ka meefi letipechou pwe ámi ririéch me mwan me pwúlúwom we a fen patapateló. Nge pokiten en emén Chón Kraist, iwe ka fókkun mochen pwe óm pwúpwúlú epwe elingaaló Jiowa, ewe Kot ka tongei. Ina popun, nónnómum iei a efisi lólilen me letipengaw. Iwe, kese kan mochen kosap ekieki pwe kese tongeni pwákini óm osukosuk.
2 Lón ei fansoun a wor ekkewe Chón Kraist pwúpwúlú mi ririéch, nge me lóóm ese péchékkúl ar riri. Nge ra kúna alen ar repwe apéchékkúla ar pwúpwúlú. Iwe pwal en, a pwal tongeni lapóló óm pwapwa lón óm pwúpwúlú. Ifa usun?
PACHEÉCH NGENI KOT ME PWÚLÚWOM WE
3, 4. Pwata ekkewe pwúpwúlú repwe pacheéchfengen ika ra achocho le pacheéch ngeni Kot? Áweweei mwo.
3 Ámi me pwúlúwom we, oupwe pacheéchfengen ika oupwe achocho le pacheéch ngeni Kot. Pwata? Ekieki mwo ei kapas áwewe: Anchangei mwo eú chuuk mi chéwatte me fan, nge mi kken me asan. Emén mwán a útá lepekin ena chuuk me fan me ewe epek, nge emén fefin a pwal útá me ewe epek. Iir me rúúemén ra poputá le téékaatá ewe chuuk me rúúepek nge ra towaufesen. Nge atun ra arap ngeni asachikin, ra kakkanefengen. Ka weweiti ewe lesen mi álilliséch lón ei kapas áwewe?
4 Óm achocho le unusen angang ngeni Jiowa a tongeni léllé ngeni óm achocho le tékaatá eú chuuk. Pokiten ka tongei Jiowa, ka fen achocho le tékaatá ewe chuuk lón kapas áwewe. Iwe nge, ika ámi riri me pwúlúwom we a patapateló, iwe usun itá oua tékaatá ewe chuuk nge en ka tétá me ewe epek nge pwúlúwom we a pwal tétá me ewe epek. Iwe nge, met epwe fis ika oua sópweló le tétá? Pwúngún, akkomwmwan oua towaufesen. Nge, ewin ámi achocho le pacheéch ngeni Kot ren ámi tékaatá ewe chuuk, pwal ina ewin ámi pacheéchfengen. Ren enletin, óm pacheéch ngeni Kot ina kiien óm pacheéch ngeni pwúlúwom we. Nge ifa usun kopwe wesewesen féri ena?
Ewe sile seni Paipel epwe apéchékkúla ámi ririin pwúpwúlú, ika oupwe apwénúetá
5. (a) Ifa eú alen án emén epwe tongeni pacheéch ngeni Jiowa me pwúlúwan we? (b) Ifa ekiekin Jiowa usun pwúpwúlú?
5 Eú mettóch mi lamot oupwe féri me pwúlúwom we atun oupwe tétá wóón ewe chuuk lón kapas áwewe, ina ámi álleasochisi ewe kapasen fén usun pwúpwúlú mi mak lón án Kot we Kapas. (Kölfel 25:4; Aisea 48:17, 18) Ekieki mwo án ewe aposel Paulus ei kapasen fén mi tichik: “Aramas meinisin repwe asamolu pupulu.” (Ipru 13:4, TF) Met weween ena? Ewe kapas “asamolu” a tongeni wewe ngeni afona me aúcheani. Ina wesewesen meefien Jiowa usun pwúpwúlú, a afona me aúcheani.
ÓM ENLETIN TONGEI JIOWA, INA MET A AMWÉKÚTUK
6. Met a pwá lón alon Paulus we usun pwúpwúlú? Pwata a lamot ach sipwe chechchemeni ena?
6 Mi pwúng, pokiten ámi me pwúlúwom we oua angang ngeni Kot, iwe oua fen silei pwe pwúpwúlú mi aúchea, pwal mwo nge pin. Jiowa a pwisin akkóta ewe kókkótun pwúpwúlú. (Mateus 19:4-6) Iwe nge, ika oua kúkkúna osukosuk lón ámi pwúpwúlú iei, iwe ese chék naf ámi silei pwe pwúpwúlú a assamol an epwe amwékútúkemi le tongei me súféliti emén me emén leimi. Iwe met a tongeni amwékútúkemi le féri ena? Nengeniéchú ifa usun Paulus a áweweei ewe pwóróus usun pwáratáán assamol. Ese apasa pwe ‘pupulu mi asamol’ nge a apasa pwe “repwe asamolu pupulu.” Paulus a eáni eú kapasen fén nge esap chék ina pwisin meefian. Ren óm chechchemeni ena, neman epwe tongeni amwékútuk le asamolusefáli pwúlúwom we. Pwata a pwúng ena?
7, 8. Met a tongeni amwékútuk le álleasochisi ewe kapasen fén usun asamolun pwúpwúlú?
7 Ekieki mwo meefiom ren ekkóch án Paipel kewe allúk, áwewe chék usun ewe allúk pwe sipwe álisi aramas le wiliti Chón Kraist. (Mateus 28:19) Pwúngún, fán ekkóch neman a weires ach sipwe apwénúetá ena allúk. Chókkewe ka afalafal ngeniir neman resap sani. Iwe nge, ka chúen afalafala ewe pwóróus usun Mwúún Kot. Pwata? Pokiten óm enletin tongei Jiowa a amwékútuk le álleasochisi an kewe allúk. (1 Johannes 5:3) Ifa ewe lesen sia káé?
8 Óm enletin tongei Kot a amwékútuk le álleasochisi ewe allúk le afalafal inaamwo ika a wor eppetin. Iwe pwal ina usun, óm tongei Jiowa a tongeni amwékútuk le álleasochisi án Paipel ei kapasen fén: ‘Oupwe asamolu pupulu,’ inaamwo ika usun itá a weires. (Ipru 13:4; Kölfel 18:29; Än Salomon Afalafal 5:4) Án Kot efeiéchú óm achocho le fiffiti ewe angangen afalafal, epwe pwal ina usun an efeiéchú me áfánni óm achocho le asamolu óm pwúpwúlú.—1 Tesalonika 1:3; Ipru 6:10.
9. Ikkefa ekkewe ruu mettóch sipwe pwóróus wóór?
9 Iwe nge, ifa usun an epwe wor assamol lón óm pwúpwúlú? A lamot kopwe túmúnuk seni ekkewe féffér repwe atai ewe kókkótun pwúpwúlú. Pwal eú, a lamot kopwe féri met epwe apéchékkúla óm we ririin pwúpwúlú.
TÚMÚNUK SENI KAPAS ME FÉFFÉR MI ASÚFÉLÚNGAWA PWÚPWÚLÚ
10, 11. (a) Met sókkun féffér a asúfélúngawa pwúpwúlú? (b) Ifa ewe kapas eis kopwe eisini pwúlúwom we?
10 Me lóóm, iei alon emén Chón Kraist fefin: “Ua iótek ngeni Jiowa pwe epwe apéchékkúlaei le likiitú.” Likiitú fán met? A áweweei: “Pwúlúwei we a eáni kapas mi ámmetekiei. Ese pwá kinásei me lúkún, nge an tunochif a ekinasa letipei. A kan ereniei ‘Ka mmen eriáfféúei!’ me ‘Ese wor lamotóm!’” Alon ei fefin ei, a eppiietá eú mettóch mi alólilen, weween án pwúpwúlú eáni kapas mi ámmetek.
11 A eletipechou ika ekkewe pwúpwúlú Chón Kraist ra eáni kapas mi ámmetek lón ar sipélúfengen lefiler mi efisi kinásen letiper esap tongeni mwittir mó! A ffat pwe ika emén me leir are iir me rúúemén ra kan eáni kapas mi ámmetek, iwe esap ina eú pwúpwúlú mi assamol. Nge ifa usun óm pwúpwúlú? Ren óm kopwe silei, kopwe tipetekison le eisini pwúlúwom we: “Ai kapas a kan ámetekuk?” Ika pwúlúwom we a meefi pwe fán chómmóng óm kapas a kan ámeteki letipan, iwe a lamot kopwe tipemecheres le siwili napanapom pwe epwe múrinnéló óm pwúpwúlú.—Kalatia 5:15; Efisos 4:31.
12. Ifa usun óm fel epwe lamotongaw me ren Kot?
12 A lamot epwe fataffatéch ngonuk pwe napanapen óm kapas ngeni pwúlúwom we a tongeni kkúú óm riri ngeni Jiowa. Ewe Paipel a apasa: “Are eman a ekieki pwe i eman souläng, nge esap nemeni chönawan, ewe aramas a püsin atupu i, nge an souläng a lomotongau.” (James 1:26) Óm kapas a riri ngeni óm fel ngeni Kot. Ewe Paipel ese apasa pwe ika ka angang ngeni Kot, iwe ese pwal lamot napanapom lón imw. Kese mochen kosap pwisin otupuk. A fókkun lamot ena mettóch. (1 Petrus 3:7) Neman en emén mi tinikken me lipwákéch, nge ika ina turun tipóm pwe kopwe ekinása letipen pwúlúwom we ren kapas mi ámmetek, iwe ka asúfélúngawa ewe kókkótun pwúpwúlú me a lamotongaw óm fel me ren Kot.
13. Ifa usun emén mi pwúpwúlú a tongeni ámeteki letipen pwúlúwan we?
13 A pwal lamot ngeni ekkewe rúúemén ar repwe túmúnú pwe resap efisi metekin letipen emén me emén leir lón eú napanap rese tepereni. Ekieki mwo ekkeei ruu pwóróus: Emén in ese wor pwúlúwan a kan soun fós wóón phone ngeni emén Chón Kraist mwán mi pwúpwúlú lón ewe mwichefel. A kan kéri pwe epwe kútta álillis me a langatattam ar fósfengen. Pwal emén Chón Kraist mwán mi lipich a kan soun fiti emén Chón Kraist fefin mi pwúpwúlú le afalafal iteiten wiik. Neman me ren ekkena mi pwúpwúlú, a éch met ra féri. Nge met meefien pwúlúwer kewe ren met ra féri? Iei alon emén fefin mi pwúpwúlú mi kúna ena esin: “A ámeteki letipei ai kúkkúna án pwúlúwei awora watteen fansoun ngeni emén fefin lón ewe mwichefel me áfánni. Ena mettóch a ámmeef ngeniei pwe ese wor lamotei.”
En mi áteneki pwúlúwom we me ngeni ewe fansoun me tong mi chék fich ngeni?
14. (a) Ifa wisen ekkewe pwúpwúlú Keneses 2:24 a menlapei? (b) Met kopwe pwisin eisinuk?
14 Sia weweiti pwe met a fis ngeni neminna me chókkewe mi kúna ena esin osukosuk lón ar pwúpwúlú, a efisi metekin letiper. Pwúlúwer kewe ra tunaló án Kot ei kapasen emmwen usun pwúpwúlú: “Eman mwän epwe likiti saman me inan o pachei ngeni pwülüan.” (Keneses 2:24) Pwúngún, chókkewe mi pwúpwúlú ra chúen súféliti semer kewe me iner. Iwe nge, me ren án Kot we kókkót pwe ekkewe mi pwúpwúlú repwe akkomwa pwúlúwer kewe pún ina wiser mi nampa eú me ren Kot. Pwal ina usun, Chón Kraist ra fókkun tongei chiener kewe chón lúkú nge repwe akkomwa pwúlúwer kewe pwe ina wiser we mi nampa eú. Ina popun, atun Chón Kraist mi pwúpwúlú ra awora watteen fansoun ngeni emén esap pwúlúwer are kon chiechiéch ngeni, iwe epwe tongeni osukosuka ewe ririin pwúpwúlú. Itá ina ewe popun oua osukosuk lón ámi pwúpwúlú? Kopwe pwisin eisinuk: ‘Ua wesewesen áteneki pwúlúwei we me ngeni ewe fansoun me tong mi chék fich ngeni?’
15. Me ren Mateus 5:28 pwata Chón Kraist mi pwúpwúlú repwe túmúnúúr pwe resap kon áteneki ekkewe esap pwúlúwer?
15 Pwal och, ekkewe Chón Kraist pwúpwúlú mi kon áteneki ekkewe esap pwúlúwer, ra pwisin atolonger lón feiengaw. A eletipechou pwe ekkóch Chón Kraist mi pwúpwúlú ra poputá le sani chókkewe ra kon chiechiéch ngeniir. (Mateus 5:28) Mwirilóón, ena sókkun chiechiéch a emmwen ngeni eú féffér mi fókkun asúfélúngawa pwúpwúlú. Sipwe ppii met ewe aposel Paulus a apasa usun ena.
“KIEKIN PUPULU EPWE LIMELIMOCH”
16. Ifa ewe kapasen éúréúr Paulus a eáni usun pwúpwúlú?
16 Mwirin án Paulus eáni ewe kapasen fén, mi erá ‘oupwe asamolu pupulu,’ a pwal eáni ei kapasen éúréúr: “Kiekin pupulu epwe limelimoch; pun Kot epwe apungu ekkewe mi lisou [“lisowumwáál,” NW] o ekkewe mi mocheisou.” (Ipru 13:4, TF) Paulus a néúnéú ei kapas “kiekin pupulu” fán iten ewe féfférún lisowu. Nge ena féffér a “limelimoch” ika epwe chék fis lón ewe kókkótun pwúpwúlú. Ina popun, Chón Kraist ra álleasochisi ekkeei kapas seni Kot: “Kopwe pwapwaiti pwülüom o meseikeiti ewe föpwül ka pwülüeni lupwen om alüal.”—Än Salomon Fos 5:18.
17. (a) Pwata Chón Kraist resap tipetipeló ren án chón fénúfan ekiek usun lisowu lúkún pwúpwúlú? (b) Ifa usun sipwe áppirú Hiop?
17 Chókkewe mi lisowu lúkún pwúpwúlú ra fókkun ésúfélúngawa án Jiowa kewe allúk. Lón ei fansoun, chómmóng ra ekieki pwe ese wor ngawen án emén lisowu lúkún pwúpwúlú. Ese lifilifil met aramas ra ekieki usun lisowu lúkún pwúpwúlú, nge Chón Kraist resap tipetipeló ren. Ra mirititi pwe mwirilóón, esap aramas nge “Kot epwe apungu ekkewe mi lisou [“lisowumwáál,” NW] o ekkewe mi mocheisou.” (Ipru 10:31; 12:29) Ina popun, Chón Kraist mi enlet ra kamwéchúnnúk án Jiowa ekiek usun ei mettóch. (Rom 12:9) Chechchemeni alon ewe semelap Hiop ei: “Üa föri eu pwon ngeni mesei.” (Hiop 31:1) Ren án Chón Kraist mi enlet repwe túmúnúúr seni ar repwe pwal mwo nge féri eú féffér epwe tongeni emmweniir ngeni lisowu lúkún pwúpwúlú, ra túmúnú meser me rese fókkun nennengeni emén fán mochenia nge esap pwúlúwer.—Ppii ewe kinikin Pwal Ekkóch Áwewe itelapan “Minne Paipel A Apasa Usun Mufesen me Imufesen.”
18. (a) Me ren Jiowa, ifa úkúkún ngawen án emén lisowu lúkún pwúlúwan? (b) Ifa ewe mettóch lisowu lúkún pwúpwúlú me fel ngeni ululun ra lélléfengen wóón?
18 Me ren Jiowa, ifa úkúkún ngawen án emén lisowu lúkún pwúlúwan? Ewe Allúkún Moses a álisikich le silei meefien Jiowa usun ena mettóch. Lón Israel, lisowu lúkún pwúpwúlú me fel ngeni ululun ikkena ekkóch me lein ekkewe féfféringaw mi efisi kapwúngún máló. (Lifitikos 20:2, 10) Ka kúna met ekkena ruu mettóch ra lélléfengen wóón? Án emén chón Israel fel ngeni ululun, a atai an we pwon ngeni Jiowa. Iwe pwal ina usun ren án emén chón Israel lisowu lúkún pwúlúwan, a pwal atai an we pwon ngeni pwúlúwan we. Iir me rúúemén ra kirikiringaw. (Ekistos 19:5, 6; Tuteronomi 5:9; Malakai 2:14) Ina popun, iir me rúúemén ra ánioput mwen mesen Jiowa, ewe Kot mi tuppwél me alúkúlúk.—Kölfel 33:4.
19. Ifa usun emén epwe apéchékkúla an tipeppós le túmúnú seni lisowu lúkún pwúpwúlú? Iwe pwata?
19 Pwúngún, Chón Kraist rese nóm fán ewe Allúkún Moses. Nge ar chechchemeni pwe lisowu lúkún pwúpwúlú me ren ekkewe chón Israel lóóm, ina eú tipis mi chou, ina met epwe apéchékkúler lón ar tipeppós pwe resap féri ena féffér. Pwata? Ekieki mwo ei kapas áwewe: Itá kopwe tongeni tolong lón eú fal, fótopwásukutiw me iótek ngeni eú ululun? Kopwe apasa: ‘Usap fókkun féri ena! Nge itá kopwe féri ena ika emén a méénuk wóón watteen moni? Kopwe apasa: ‘Aapw!’ Ren enletin, a annou me ren Chón Kraist mi enlet ar repwe pwal mwo nge ekieki ar repwe kirikiringaw ngeni Jiowa ren ar fel ngeni ululun. Pwal ina usun, Chón Kraist repwe meefi announ ar repwe pwal mwo nge ekiekin kirikiringaw ngeni ar we Kot Jiowa, me ngeni pwúlúwer kewe ren ar lisowu lúkún pwúpwúlú inaamwo ika usun itá a apwapwa ewe féfférún tipis. (Kölfel 51:1, 4; Kolose 3:5) Sise fókkun mochen féri och mettóch mi apwapwaai Satan, nge mi fókkun ésúfélúngawa Jiowa me ewe kókkótun pwúpwúlú mi pin.
APÉCHÉKKÚLEN ÓM RIRIIN PWÚPWÚLÚ
20. Met a fis ngeni án ekkóch ririin pwúpwúlú? Áweweei mwo.
20 Me lúkún óm kopwe túmúnú sonuk ekkewe féffér mi ésúfélúngawa pwúpwúlú, pwal ikkefa ekkewe mettóch kopwe féri pwe kopwe ésúfélúsefáli pwúlúwom we? Ren pélúwen ena kapas eis, kopwe ekieki pwe itá kan ewe kókkótun pwúpwúlú a usun chék eú imw. Mwirin, kopwe ekieki pwe ekkewe kapas mi fiti kirekiréch, féffér múrinné me ekkóch kapas mi pwáraatá assamol lefilen ekkewe pwúpwúlú, ra usun chék ekkewe minen eling mi elinga eú imw. Ika oua pacheéchfengen, iwe ámi pwúpwúlú a usun chék eú imw mi ling ren ekkewe minen eling mi efisi pwapwa. Ika óm tong a patapateló, iwe ekis me ekis ekkena minen eling repwe móróló, iwe óm pwúpwúlú epwe echipwang usun eú imw ese wor elingan. Pokiten ka tipeni le álleasochisi án Kot we allúk pwe ‘oupwe asamolu pupulu,’ iwe kopwe mwékút le emúrinnéló nónnómum. Pwúngún, a fich ngeni eú mettóch mi aúchea me assamol an epwe elingsefál are kaúsefál. Ifa usun kopwe féri ena? Án Kot we Kapas a apasa: “Eu imw a kaütä ren tipachem o nükünük ren mirit, nge ia a wor silelap ie, ekewe rumwen lon ra ur ren sokopaten pisek mi aüchea me mürina.” (Än Salomon Fos 24:3, 4) Ekieki mwo ifa usun ena wokisin a tongeni weneiti kókkótun pwúpwúlú.
21. Ifa usun ekkewe pwúpwúlú repwe apéchékkúla ar ririin pwúpwúlú ekis me ekis? (Ppii pwal ewe pwóór “Ifa Usun Upwe Emúrinnéló Ai Pwúpwúlú?”)
21 Tong enlet, niwokkusiti Kot me lúkú mi núkúchar, ikkena ekkóch me lein ekkewe “pisek mi aüchea” mi ouraló eú famili mi pwapwa. (Än Salomon Fos 15:16, 17; 1 Petrus 1:7) Ra efisi eú pwúpwúlú mi núkúchar. Me ren ewe wokisin lón Än Salomon Fos 24:3, 4, ifa usun ekkewe ruumw ra uroló ren pisek aúchea? A erá pwe “a wor silelap.” Ewer, ewe sile seni Paipel epwe ewilaaló ekiekin ekkewe pwúpwúlú me amwékútúúr le pwárisefáli ar tong lefiler, ika repwe apwénúetá. (Rom 12:2; Filipi 1:9) Ina popun, atun oua pwóróusfengen me pwúlúwom we wóón eú pwóróus seni Paipel, áwewe chék ren ámi álleani ewe lesenin rán, are ekkóch lesen seni Paipel lón Ewe Leenien Mas are Awake! mi weneiti pwúpwúlú, usun itá oua etittina eú eling mi fókkun lingéch epwe tongeni elinga imwemi we. Atun ámi tongei Jiowa a amwékútúkemi le apwénúetá lón ámi pwúpwúlú ewe kapasen fén oua kerán etittina, usun itá oua pacheetá eú minen eling lón “rumwen” imwemi we. Iwe, ewe pwapwa me tong oua pin eáni me lóóm, epwe worsefál.
22. Ifa feiéchún án emén achocho le féri wisan le apéchékkúla an pwúpwúlú?
22 Neman a lamot ngeni emén watteen fansoun me achocho ren an epwe pachesefálietá eú me eú ekkewe minen eling. Nge ika kopwe éttúres le féri wisom, iwe kopwe fókkun pwapwa le silei pwe ka ákkálleasochisi án Paipel ei allúk: “Oupwe fokun asamolufengenikemi lefilemi.” (Rom 12:10; Kölfel 147:11) Nge lapólóón, óm achocho fán tinikken le asamolu óm pwúpwúlú epwe onómuk lón ewe tongen Kot.