KINIKIN 6
Upwufé A Siwili Eú Pwúpwúlú
“Nau eu lifang seni ewe Samol mi Lapalap.”—Kölfel 127:3
Án emén ménúkol uputiw a tongeni fókkun apwapwa me áweires ngeni ekkewe pwúpwúlú. Pokiten oua kerán néúnéú neman oupwe máirú le kúna pwe lap ngeni ámi fansoun me péchékkúl a chék ló ngeni túmúnún néúmi we. Nafangawen annut me eli fán ekkóch epwe ppiitá och memmeef mi tongeni áweiresi ámi riri. En me pwúlúwom we oupwe féri ekkesiwil pwe oupwe tongeni túmúnú néúmi we nge epwe chúen péchékkúl ámi ririin pwúpwúlú. Ifa usun án Paipel kapasen fén epwe álisikemi le ataweei ekkena osukosuk?
1 WEWEITI USUN ÁN EMÉN UPWUFÉ SIWILI MANAWOM
MET EWE PAIPEL A APASA: “Tong a songomang o kirokiroch.” Pwal tong “esap kutta pwisin letipan; esap pwal muttir ngeni song.” (1 Korint 13:4, 5, TF) Pokiten ka kerán emén in, a pwúkún fis pwe ka afóta chék le túmúnú noum we ménúkol. Iwe nge, neman pwúlúwom we epwele poputá le meefi pwe ka túmúnúngaw ngeni, nge kosap ménúki pwe pwal i a osupwangen óm fansoun me óm túmún. Ren óm mosonottam me kirekiréch, ka tongeni álisi pwúlúwom we le meefi pwe i mi lamot me pwal kapachelong lón túmúnún néúmi we.
“Ämi mwän kana, oupwe nonom ngeni pwülüemi kana fän mirit.” (1 Petrus 3:7) Kopwe weweiti pwe pwúlúwom we a áeá lap ngeni an fansoun fan iten néúmi we ménúkol. A wor mineféén wisan me neman a áweiresi, émélúlú me pwal mwo nge eletipechowu. Fán ekkóch neman epwe song ngonuk, nge achocho le mosonottam pokiten “eman mi mang ngeni song a mürina seni eman mi pöchökül.” (Än Salomon Fos 16:32) Pwáraatá mirit me awora ngeni álillis mi lamot ngeni. —Än Salomon Fos 14:29.
MINNE KA TONGENI FÉRI:
Ámi Sam kana: Álisi pwúlúwom le túmúnú néúmi we semirit pwal mwo nge lepwin. Aúkúkú ewe fansoun ka áeá fán iten ekkóch angang pwe epwe watte ewe fansoun ka tongeni áeá fán iten pwúlúwom me néúmi
Ámi In kana: Ika pwúlúwom we a apasa pwe epwe álisuk le túmúnú néúmi we ménúkol, iwe etiwa an álillis. Ika a angangaw, kosap esiita nge fen áiti fán kirekiréch
2 APÉCHÉKKÚLA ÁMI RIRI
MET EWE PAIPEL A APASA: “Repwe wiliti eu chök inis.” (Keneses 2:24) Ikaamwo a wor ewe upwufé lón ámi famili nge chechchemeni pwe en me pwúlúwom oua chúen “eu chök inis.” Akkachocho le apéchékkúla ámi riri.
Ámi fin pwúpwúlú, apasa ámi kilisou ren án pwúlúwemi álillis. Óm pwári óm kilisou a tongeni “atoto pöchökül.” (Än Salomon Fos 12:18) Ámi mwán pwúpwúlú, ereni pwúlúwemi ifa úkúkún oua tongei me aúcheani. Mwareiti ren napanapan an túmúnú ámi famili.—Än Salomon Fos 31:10, 28.
“Emon esap kutta minne chok epwe öch ngeni pwisin i, nge epwe pwan kutta minne epwe öch ngeni ekkewe ekkoch aramas.” (1 Korint 10:24, KG) Fansoun meinisin kopwe féri minne epwe échiti pwúlúwom. Pokiten ámi pwúpwúlú, oupwe awora fansoun le pwóppwóróusfengen, mwareitifengenikemi me aúseling ngeni emén me emén lefilemi. Kosap ekieki pwisin mochenum lón pekin lisowu. Ekieki minne a lamot ngeni pwúlúwom. Ewe Paipel a erá: “Ousap amwöchü inisimi seni pwülüemi are ousap akomwen tipeeufengen won.” (1 Korint 7:3-5) Ina popun oupwe pwóróus fán wenechar wóón ei mettóch. Ámi mosonottam me weweéch epwe apéchékkúla ámi riri.
MINNE KA TONGENI FÉRI:
Kesap ménúki le awora fansoun fán iten chék ámi me rúúemén
Féri ekis mettóch pwe epwe ámmeef ngeni pwúlúwom we pwe ka tongei, áwewe chék ren óm makkeei ekis taropwe ngeni are ngeni och liffang
3 ÁKKÁITI NOUM WE
MET EWE PAIPEL A APASA: “Seni chök lekükünum ka silei kapasen ekewe Toropwe mi Pin, ra tongeni atipachemok o emwenuk ngeni om kopwe küna manau.” (2 Timoty 3:15) Akkóta met kopwe féri fán iten asukulen noum we. A wor an tufichin káé mi amwarar pwal mwo nge me mwen an uputiw. Lupwen a chúen nónnóm lón ewe leenien ménúkol, a tongeni esilla ngingium me meefi met ka eáni memmeef. Állea ngeni atun i mi chúen ménúkol. Ikaamwo esap weweiti met ka álleani nge ina met a tongeni álisi i le pwapwaiti állea atun a wattetá.
Noum we upwufé ese kon kúkkún pwe esap tongeni rongorong óm fós usun Kot. Atun ka iótek ngeni Jiowa, epwe pwal rongorong óm iótek. (Tuteronomi 11:19) Pwal mwo atun oua kukkunoufengen, fós usun ekkewe mettóch Kot a fératá. (Kölfel 78:3, 4) Atun noum na semirit epwe mááritá epwe meefi óm tong ngeni Jiowa me epwe káé an epwe pwal tongei.
MINNE KA TONGENI FÉRI:
Tichik le tingorei Jiowa óm tipachem pwe kopwe tongeni ákkáiti noum we
Enniwili ekkewe kapas me pwóróus mi lamot ngeni noum we pwe epwe mwittir le poputááni an káé