Áwewe fán Iten Manawach me Ach Angangen Afalafal Mwich
JANUARY 3-9
PWÓRÓUS AÚCHEA SENI KAPASEN KOT | SOUKAPWÜNG 15-16
“Angangen Rawangaw—Eú Féffér mi Fókkun Ngaw!”
Rawangaw Eü Esissillen pwe Sia Nom lon ekkewe Ränin Lesopwoloon!
4 Ewe äeüin pworaus ina pworausen Telila ewe Soukapwüng Samson a tongei me i emön mi tipächem solä. Samson a mochen emmweni ewe maun ngeni chon Filistia fän iten nöün Kot kewe aramas. Nimmön ekkewe samolun Filistia eli ra silei pwe Telila ese tüppwöl lon an tongei Samson. Ra sotun ngeni watteen moni fän iten an epwe ereniir ewe popun Samson a kon pöchökkül pwe repwe tongeni nielo. Ewe mi tipemmong, Telila, a etiwa met ra ngeni. Nge an kütta popun än Samson pöchökkül a sopwongaw fän ülüngät. Iwe nge ese fangetä, a “arianikisi Samson rän me rän o echimwa.” Iwe, Samson “a mos ren pwe a mochen mäla.” A ereni neminnewe pwe esap mwo fän eü an ffich möküran, nge ika epwe ffich esap chüen pöchökkül. An a silei popun än Samson pöchökkül, Telila a annutalo Samson woon pechen me a köri emön an epwe fichielo möküran. Iwe a ngeni chon koputan kewe, me a mut ngeniir ar repwe för ngeni minne ra mochen. (Souk. 16:4, 5, 15-21) A wesewesen ngaw minne a föri! Pokiten Telila a tipemmong, iwe, a rawangawei ewe mi tongei i.
Menlapen Poraus Seni Ewe Puken Soukapwung
14:16, 17; 16:16. Engingi me lalapat ren an epwe aumwesi emon epwe tongeni atai ewe ririoch lefiler.—An Salomon Fos 19:13; 21:19.
Rawangaw Eü Esissillen pwe Sia Nom lon ekkewe Ränin Lesopwoloon!
15 Ifa usun ekkewe mi pwüpwülü ra tongeni apöchökküla ar tüppwöl ngeni pwülüwer? Än Kot Kapas a apasa: “Meseikeiti ewe föpwül [are alüwöl] ka pwülüeni lupwen om alüal, [are föpwül]” me, “Oupwe manaufengen fän pwapwa me pwülüom ka tongei.” (SalF. 5:18; SalAf. 9:9) Atun ekkewe mi pwüpwülü ra mukolo, repwe föri mettoch meinisin ra tongeni föri pwe repwe ririöch lon pekin inis me memmeef. A wewe ngeni ar repwe pacheöch fengen, äfänni fengeni osupwanger, me awora ar fansoun fengen. A lamot repwe achocho le tümünü ar pwüpwülü me ar riri ngeni Jiowa. Ar repwe föri ei, a lamot repwe käeö fengen ewe Paipel, angang fengen lon ewe angangen afalafal iteitan, me iotek fengen pwe Jiowa epwe efeiöchüür.
AKKAMWÖCHÜ OM TÜPPWÖL NGENI JIOWA
16 Lon ewe mwichefel a wor chokkewe mi föri tipis watte me iir ra küna kapwüng mi chou pwe repwe pöchökkül lon ar lükü. (Tait. 1:13) Pokiten ar föfför, ekkoch ra katowu seni mwichefel. Ren “chokewe mi angei ei sokun apwüng,” ewe angangen apwüng epwe älisiir le ririöchsefäl ngeni Kot. (Ipru 12:11) Nge ifa usun ika a wor emön aramasach are chiechiach a katowu? Minne sia föri ren ei mettoch, epwe pwäraatä ika sia tüppwöl ngeni emönnewe are ngeni Kot. Sipwe tüppwöl ngeni Jiowa. I a nennengeni ika kich mi älleasochisi an allük ren ach sisap chiechi ngeni ese lifilifil iö mi katowu.—Älleani 1 Korint 5:11-13.
Kúkkútta Pwóróus Aúchea
w05 3/15 27 ¶6
Samson A Sópwéch ren án Jiowa Péchékkúl!
Samson a úppós le apwénúetá minne a mochen féri, ina an epwe maun ngeni chón Filistia. Ewe popun Samson a nónnóm lón imwen emén fin lisowu lón Kasa pwe epwe maun ngeni ekkewe chón oputa Kot. A lamot epwe wor eú leeni ia epwe nóm ia lepwin me lón telinimwen chón koputan kewe, me a kúna ena me lón imwen ewe fin lisowu. Samson ese ekieki an epwe méúr ngeni neminna. A ló seni ena imw lukenipwin, a kamwéch asamalapen ewe telinimw me úran kewe ruuofóch, me uweiiretá wóón ungen eú chuuk kkan ngeni Hepron, towauan úkúkún 37 mwail [60 km]. Ei a tipeeú ngeni letipen Kot me a fis ren an álillis.—Soukapwüng 16:1-3.
JANUARY 10-16
PWÓRÓUS AÚCHEA SENI KAPASEN KOT | SOUKAPWÜNG 17-19
“Álleasolap Ngeni án Kot Allúk A Emmwen Ngeni Osukosuk”
it-2 390-391
Maika
1. Emén chón Efraim. Maika a atai ewe awaluen allúk lón ewe Allúk Engol (Eks 20:15) ren an angei 1,100 féún moni silifer seni inan we. Lupwen a pwári minne a féri me eliwini, neminna a erá: “Iei üa apini ai silifer fän iten ewe Samol mi Lapalap, pwe ewe anümamau esap küw nei ei. Eman epwe falei eu uluulun anümwäl o apachatä silifer won. Iei üpwe aliwini ngonuk ewe silifer.” Neminna a angei 200 féún moni silifer me ngeni emén chón fal, ewe a wisen féri “eu uluulun anümwäl o apachatä silifer won,” me ló, ló, ló, a nóm lón imwen Maika we. Maika, emén mi wor “eu an lenien fel,” a féri eché úf itan efot me eú ululun me seikaatá emén me lein néún kewe mwán an epwe souasor. Inaamwo ika ei kókkót a usun itá fán iten an epwe elingaaló Jiowa, nge a fókkun mwáál pún a atai ewe allúk usun fel ngeni ululun (Eks 20:4-6) me a aúcheangawa án Jiowa imwenfel me ewe angangen souasor. (Sou 17:1-6; Tut 12:1-14) Mwirin, Maika a angei Jonatan, emén mwirimwirin néún Moses we mwán itan Kersom, me ewisa ngeni ei alúwél re Lifai an epwe néún souasor. (Sou 18:4, 30) Maika a fókkun pwapwa ren ena, a erá: “Iei üa silei pwe ewe Samol mi Lapalap epwe afeiöchüei.” (Sou 17:7-13) Nge saminne Jonatan seni familien Aaron, ina minne ese fich ngeni an epwe wiseni ewe wis souasor, ena a fen alapaaló tipisin Maika.—Num 3:10.
it-2 391 ¶2
Maika
Ekiseló mwirin, Maika me chienan kewe mwán ra cheei ekkewe chón Tan. Lupwen ra kkan ngeniir me ekkewe chón Tan ra eisiniir ika met pwóróus, Maika a apasa: “Ämi oua angei ai kewe kot üa föriir me nei we souasor o süla far.” Iwe, ekkena chón Tan ra ereni chón Maika pwe ika repwe sópweló le cheer me ánini ngeniir, repwe feiengaw. Lupwen Maika a kúna pwe ekkewe chón Tan ra kon péchékkúl seniir me chienan kewe, iwe ra liwiniti leenier. (Sou 18:22-26) Mwirin ei, chón Tan ra maunei Lais me kenaló, me ra aúsefálietá pwe epwe eú telinimwen Tan. Jonatan me néún kewe ra wisen souasor ngeni ewe einangen Tan, iir kewe mi túmúnú “förien Maika we uluulun anü mi fal a nom ikenan lon ükükün fansoun ewe imwen Kot a nom lon Silo.”—Sou 18:27-31.
Kúkkútta Pwóróus Aúchea
(Soukapwüng 19:18, NW) A pélúweni: “Ám aua feito seni Petleem lón Juta, pwe aupwele feiló ngeni chukuchukutáán ewe fénú Efraim mi towawoló, ia ua feito me ie. Ua feiló Petleem lón Juta, me iei upwele feiló ngeni imwen Jiowa we, nge ese wor emén mi etiwaeilong lón imwan.”
Eú Afféún Paipel mi Mecheres le Weweiti me Achchúngú Letipach
6 Lón ei fansoun, a pwal chómmóngóló ekkewe pisekin ánnet mi pwáraatá lamoten ach sipwe néúnéú iten Kot we, Jiowa. Lón ewe mineféén afféún New World Translation minen 2013 a mak fán 7,216 iten Kot we. Weween a lapóló wóón wonu lap seni minne a mak lón ewe afféún Paipel akkomw mwen ena. Ra apachaalong iten Kot we lón nimu wokisin pokiten minne ra kúna me lón ekkewe Dead Sea Scroll ekkewe sou káé usun Paipel ra kerán atowu. Ikkeei ekkewe nimu wokisin, 1 Samuel 2:25; 6:3; 10:26; 23:14, 16. Nge ewe awonuen wokisin ra pwal apachaalong iten Kot we lón, ina Soukapwüng 19:18 pokiten minne ra kúna seni ar sópweló le ekketittina ekkewe kapiin Paipel minen lóóm lóóm.
JANUARY 17-23
PWÓRÓUS AÚCHEA SENI KAPASEN KOT | SOUKAPWÜNG 20-21
“Sópweló le Kúkkútta án Jiowa Emmwen”
w11 9/15 32 ¶2
Ka Tongeni Áppirú Pineas Atun Ka Kúna Osukosuk?
Mwirin án ekkewe re Kipea, seni ewe einangen Peniamin reipei me nieló úlúpwúlúwen emén chón Lefi, ekkewe pwal ekkóch einang ra mmólnetá le maun ngeni chón Peniamin. (Souk. 20:1-11) Me mwen repwe maun, ra iótek me tingor án Jiowa álillis, nge fán ruu ra kkuf, me chómmóng me leir ra máló. (Souk. 20:14-25) Met, ra itá ekieki pwe Kot ese aúselinga ar iótek? Itá Jiowa a enletin mochen ar repwe apwúngú ekkewe chón Peniamin?
w11 9/15 32 ¶4
Ka Tongeni Áppirú Pineas Atun Ka Kúna Osukosuk?
Ifa ewe lesen sia tongeni káé seni? A wor ekkóch osukosuk lón mwichefel mi kan pippitá inaamwo ika ekkewe mwán mi ásimaw ra angang weires le angang wóón me tingor án Kot álillis. Ika a fis ena, a lamot pwe ekkewe mwán mi ásimaw repwe chechchemeni alon Jesus ei: “Oupwe tütüngor, [are iótek] iwe, oupwe angei, oupwe küküt, iwe, oupwe künakün, oupwe fichifich, iwe, epwe wor asam mi suk ngenikemi.” (Lukas 11:9) Ikaamwo usun itá án ekkewe mwán mi ásimaw iótek ese pélú, nge repwe lúkúlúk pwe Jiowa epwe pélúweniir lón eú fansoun a pwisin filatá.
Kúkkútta Pwóróus Aúchea
w14 5/1 11 ¶4-6
En mi Silei?
Ifa usun aramas lóóm lóóm ra néúnéú éúlún lón ar angangen maun?
Tafit a néúnéú efóch éúlún le nieló Koliat, emén mi mwánemmong. Ese mwáál Tafit a káé néúnéún éúlún ewe atun a kan mmas siip.—1 Samuel 17:40-50.
Napanapen ewe éúlún a pwá me lón néún ekkewe chón Isip me chón Asiria kewe chúnga lóóm lóóm. Ena éúlún a wor pantoon mi ffér seni silin man are mangaak me a wor ruuofóch selin. Ewe chón néúnéú ewe éúlún epwe waalong lón eú pwotou rúúeféú faw mi mwotoutou are kukkumwos, úkúkún féún epwe ruu ngeni úlúngát inis (5 ngeni 7.5 cm) me tiu aulus choun (250 g). Mwirin epwe nouti néún we éúlún asen chamwan me ásechaló efóch me lein selin kewe pwe ewe faw epwe ngúpwir le changeiti ikewe a mochen ánna ngeni.
A chómmóng néún ekkewe chón maun éúlún lóóm ra pwá atun aramas ra ttu pwúl lón ewe Middle East. Úkúkún mwittirin féún néún ekkewe chón maun mi angéch éúlún 100 ngeni 150 mwail lón eú awa (160 ngeni 240 km/h). Ekkewe sou káé rese tipeeúfengen wóón menni lein ewe éúlún me ewe nikáppich (bow) a kon ngúpwir, nge ewe éúlún a pwal efeiengaw usun chék ewe nikáppich.—Soukapwüng 20:16.
JANUARY 24-30
PWÓRÓUS AÚCHEA SENI KAPASEN KOT | RUT 1-2
“Pwáppwári Tong Enlet”
Áppirú Chiechien Jiowa Kewe
5 Án Rut famili a nónnóm Moap. A tongeni liwinitiir me iir ra tongeni túmúnú i. A fen eérenaaló aramasen Moap, ar fós me ar eéreni. Nge Naomi ese tongeni pwonei ngeni Rut pwe epwe kúna ekkena esin feiéch me lón Petleem. Naomi a lólilen ika esap tongeni kúnékún pwúlúwen Rut are awora ngeni leenian. Ina popun a ereni Rut an epwe liwiniti Moap. Usun met sia álleani, Orpa “a fen liwinla ren aramasan me an kewe kot.” (Rut 1:9-15) Nge Rut a filatá an esap liwiniti aramasan kana me ar kewe kot chofona.
Áppirú Chiechien Jiowa Kewe
6 Usun Rut a silei Jiowa seni pwúlúwan we are seni Naomi. A káé pwe Jiowa mi sókkóló seni ekkewe koten Moap. Rut a tongei Jiowa me a mirititi pwe mi fich ngeni Jiowa an epwe tongei me fel ngeni. Ina popun Rut a féri eú kefil mi múrinné. A ereni Naomi: “Aramasom repwe pwal aramasei, nge om Kot epwe pwal ai Kot.” (Rut 1:16) A chúng letipach lupwen sia ekieki án Rut tong ngeni Naomi. Nge ewe sia kon ingeiti ren Rut, ina an tong ngeni Jiowa. Poas a pwal ingeiti Rut, i a mwareiti ren an feito ren Jiowa ‘pwe epwe op fän pöün.’ (Álleani Rut 2:12.) Minne Poas a apasa a tongeni áchema ngenikich án emén appanen machchang opolong fán túmúnúen péúkásin seman. (Kölf. 36:7; 91:1-4) Pwal ina chék usun, Jiowa a tongei Rut me túmúnú me efeiéchú an lúkú i. Esap fán eú an epwe wor och popun Rut epwe niamam ren met a filatá.
Kúkkútta Pwóróus Aúchea
Menlapen Poraus Seni Ewe Puken Rut
1:13, 21—Jiowa wesewesen ewe popun manauen Naomi a maras me fitikoko? Aapw, me Naomi ese tipi ngeni pwe Kot a fori minne mi ngau. Iwe nge, pokiten minne a fis lon manauan, Naomi a luku pwe Kot a likitalo. Letipan a maras me a fokkun letipechou. Ina ewe fansoun aramas ra luku pwe nounou eu feioch seni Kot me emon fefin mi rit a anumamau. Naomi a tongeni luku pwe Jiowa a asaua i pokiten noun kewe mwan ra malo me esor nour kewe.
JANUARY 31–FEBRUARY 6
PWÓRÓUS AÚCHEA SENI KAPASEN KOT | RUT 3-4
“Féri Minne Epwe Álisatá Itéchum”
w12 10/1 22 ¶5
“Eman Fefin mi Mürina”
Ese mwáál, Rut a meefi kinamwe lupwen a rong pweteteen léúwen Poas. Átewe a apasa: “Kopwe feiöch me ren ewe Samol mi Lapalap, nei föpwül. Ei föförün kirikiröch ka föri a fen lapala seni ewe ka föri me mwan ngeni inen pwülüom we. Pun kosap tapwela mürin ekewe alüal, ika ra wöüngau ika pisekisek.” (Rut 3:10) Ei itiitin “ewe ka föri me mwan,” a weneiti án Rut tong enlet le fitaaló Naomi ngeni Israel me túmúnú. Ei itiitin “ei föförün kirikiröch ka föri,” a weneiti minne Rut a féri lón ei atun. Poas a apasa pwe emén fépwúl mi usun Rut neman epwe mochen kút pwúlúwan me lein ekkewe alúwél, ese lifilifil ika mi wéúéch are mi wéúngaw. Nge Rut a fen féri met mi múrinné esap chék ngeni Naomi nge pwal ngeni pwúlúwen Naomi we mi fen máló pwe epwe wor mwirimwirin me lón pwisin leenian we. A ffat pwe Poas a ingeiti neminna pokiten an ese chék ekieki pwisin i.
w12 10/1 23 ¶1
“Eman Fefin mi Mürina”
Ese wor tipemwaramwar pwe Rut a fókkun pwapwa atun a kan ekieki án Poas we apasa pwe a silleló me lein aramas meinisin pwe i “eman fefin mi mürina.” Ese mwáál, a kúna iteúéch pokiten an mochen silei Jiowa me angang ngeni. I a pwal pwári an enletin kirekiréch me chúngú Naomi me aramasan kewe, tipemecheres le manaweni ewe mineféén manaw a eáni me fiti ar kewe ééreni. Ika sia áppirú án Rut lúkú, sipwe fókkun súféliti aramas me súféliti manawer me éérenier kewe. Ika sia féri ena, sipwe pwal iteúéch.
w12 10/1 24 ¶3
“Eman Fefin mi Mürina”
Poas a pwúlúweni Rut. Mwirin ena, Paipel a apasa: “Ewe Samol mi Lapalap a afeiöchü pwe a pwopwo o nöüni eman ät.” Ekkewe fin Petleem ra efeiéchú Naomi me mwareiti Rut ren angang múrinnéén ngeni Naomi lap seni án fúmén néún át repwe angang ngeni. Mwirin, sia silei pwe néún Rut na át a wiliti semelapen King Tafit. (Rut 4:11-22) Iwe, Tafit a wiliti semelapen Jesus Kraist.—Mateus 1:1.
Kúkkútta Pwóróus Aúchea
Menlapen Poraus Seni Ewe Puken Rut
4:6—Met popun emon a pwungun mooni fonuen aramas mi malo esap mochen mooni ewe fonu? kkom, ika emon mi osupwang a amomolo fonuan, ukuukun ewe liwin ewe chon mooni ewe fonu epwe wattiu epwe alongolong won ukuukun ekkewe ier lusun mwen ewe ierin Supili. (Lifitikos 25:25-27) An fori epwe ekisalo aucheaan pisekin me fonuan. Pwal och, ika Rut epwe nounatiu emon at, noun Rut, nge esap noun ewe chon mooni ewe fonu, epwe alemwiri.
FEBRUARY 7-13
PWÓRÓUS AÚCHEA SENI KAPASEN KOT | 1 SAMUEL 1-2
“Pwár Ngeni Jiowa Enletin Masouen Letipom”
ia 55 ¶12
A Pwár Ngeni Kot Enletin Masouen Letipan lón Iótek
12 Hana a isetiw ngeni meinisin néún Kot aramas eú leenien áppirú usun ewe mettóch iótek. Fán tong, Jiowa a etiwa néún aramas ar repwe pwár ngeni i minne ra lólileniesini, resap pireir le fós ngeni, repwe lúkúlúkú usun án emén naw lúkúlúkú seman are inan mi tong. (Álleani Kölfel 62:8; 1 Tesalonika 5:17.) Fán emmwenien ewe ngún mi fel, ewe aposel Petrus a makkeei ekkeei kapas mi oururukich usun iótek ngeni Jiowa: “Oupwe likiti ngeni Kot ämi öürek meinisin, pun i a ekieki met oupwe feiöch ren.”—1 Pet. 5:7.
w07 3/15 16 ¶4
Usun án Hana Kúna Kinamween Letipan
Met sia tongeni káé seni ekkena mettóch meinisin? Atun sia iótek ngeni Jiowa usun ach kewe lólilen, sia tongeni ereni meefiach me minne sia mochen tingorei. Ika ese chúen wor met sia tongeni féri pwe sipwe pwákini ach osukosuk, sipwe isenalong lepéún Jiowa. Ina met sia tongeni féri mi álilliséch.—Än Salomon Fos 3:5, 6.
Kúkkútta Pwóróus Aúchea
Menlapen Poraus Seni ewe Puken Aewin Samuel
2:10—Pwata Hanna a iotek pwe Jiowa epwe “apochokkula noun we king,” nge esaamwo wor emon aramas mi wiisen nemeni Israel lon ewe wiis king? Lon ewe Allukun Moses, a fen mak eu oesini pwe epwe wor emon king epwe nemeni chon Israel. (Tuteronomi 17:14-18) Lupwen Jekop a lukunuma, a uwawu ei oesini: “Esap mwokut senuk, Juta, ewe asisilen samol.” (Keneses 49:10) Pwal och, iei alon Jiowa ussun Sara—inelapen chon Israel: “Epwe pwal wor king me lein mwirimwirum kana.” (Keneses 17:16) Ina minne, Hanna a iotek fan iten emon king epwap war.
FEBRUARY 14-20
PWÓRÓUS AÚCHEA SENI KAPASEN KOT | 1 SAMUEL 3-5
“Jiowa A Áfánni Meefien Aramas”
A Unusen Manaman Nge A Ekieki Meefien Aramas
3 Samuel a poputá le angang lón ewe imwenfel mangaku lupwen a chúen chék kúkkún. (1 Sam. 3:1) Lón eú pwinin, lupwen Samuel a fen annut, a fis och mettóch mi fókkun amwarar. (Álleani 1 Samuel 3:2-10.) A rongorong án emén kéri itan. Tittipan pwe ewe chinnap itan Eli, ewe Souasor mi Lap a kéri. Ina popun, Samuel a pwáátá me ssáló ren Eli me ereni: “Ngang iei, en ka kökköriei.” Nge Eli a ereni: “Ngang üsap köruk.” Nge lupwen a pwal fissefál fán ruu, Eli a mirititi pwe Kot ewe a kékkéri Samuel. Iwe, Eli a ereni Samuel met epwe apasa ika a pwal fissefál, iwe Samuel a álleasochis. Pwata Jiowa ese ereni Samuel me lepoputáán pwe I ewe a kékkéri? Ewe Paipel ese apasa. Nge neman Jiowa a féri ena pokiten a ekieki meefien Samuel.
A Unusen Manaman Nge A Ekieki Meefien Aramas
4 Álleani 1 Samuel 3:11-18. Án Jiowa Allúk a allúkú ngeni ekkewe semirit ar repwe súféliti ekkewe chinnap, ákkáeúin chókkewe mi wor ar nemenem. (Eks. 22:28; Lif. 19:32) Ina popun, ese mwáál a weires ngeni emén kúkkún át usun chék Samuel an epwe chuuri Eli lesossor, me atoura ngeni fán pwora án Kot we kapasen kapwúng mi chou. Ewe Paipel a erenikich pwe Samuel a “niuokus le apworausa ngeni Eli künan.” Iwe nge, Kot a affata ngeni Eli pwe I ewe a kékkéri Samuel. Ina popun, Eli a ereni Samuel an esap túkúmi och seni met Kot a ereni. Samuel a álleasochisi Eli me “a apworausa ngeni meinisin.”
Kúkkútta Pwóróus Aúchea
w05 3/15 21 ¶6
Menlapen Poraus Seni ewe Puken Aewin Samuel
3:3—Samuel a wesewesen méúr lón ewe Leeni mi Unusen Pin? Aapw. Samuel i emén chón Lefi seni lón án Kohat we famili, nge esap iir souasor. (1 Kronika 6:33-38) Ina minne, ese mumutá ngeni an epwe “katol ekewe mettoch mi pin.” (Numperis 4:17-20) Samuel a tongeni chék tolong lón kiánin ewe imwenfel mangaku me lúkún. Ese mwáál a kan annut ikena ie. Neman Eli a pwal annut lón eú kinikinin ena leeni. Ewe itiitin kapas “ia a nóm ie án Kot we pworofel” a weneiti ewe leeni ia ewe imwenfel mangaku a nóm ie.
FEBRUARY 21-27
PWÓRÓUS AÚCHEA SENI KAPASEN KOT | 1 SAMUEL 6-8
“Ié Ámi King?”
it-2 163 ¶1
Án Kot we Mwú
Án Aramas Tingor Emén Ar King. Arapakkan 400 ier seni ewe fansoun án chón Israel towu seni Isip me lap seni 800 ier seni ewe atun Jiowa a féri ewe pwonen etipeeú ngeni Apraham, ekkewe chón Israel ra tingor emén aramas epwe néúr king, usun ekkewe pwal ekkóch mwú mi wor néúr king. Ar na tingor, a affata pwe ra oput án Jiowa nemenem wóór. (1Sa 8:4-8) Mei pwúng, ekkewe aramas ra ekieki án Kot epwe fératá eú mwú ren an epwe tipeeú ngeni minne a eáni pwon ngeni Apraham me Jakop. Ra pwal alónga ar na ápilúkúlúk wóón án Jakop we emwirinimá ngeni Juta (Ken 49:8-10), wóón alon Jiowa we ngeni chón Israel mwirin ar towu seni Isip (Eks 19:3-6), wóón ewe pwonen etipeeú fán ewe Allúk (Tut 17:14, 15), me pwal mwo nge wóón kinikinin ewe pwóróus Kot a efisi pwe ewe soufós Palam a apasa (Num 24:2-7, 17). Hana, inen Samuel we mi tuppwél a pwal pani ei ápilúkúlúk lón an we iótek. (1Sa 2:7-10) Iwe nge, Jiowa ese mwo unusen pwáraaló ei “monomon” usun ewe Mwú me ese mwo ffat ineet ewe fansoun mi kefilitá an epwe aúetá ei mwú, are kókkótun me masouen ei mwú—ika epwe nóm wóón fénúfan are lón láng. Ina minne, ekkewe aramas ra lamalamtekia atun ra tingor emén aramas ar king.
w11 1/1 27 ¶1
A Likiitú Ngeni Kapas mi Eletipengaw
Ppii met Jiowa a pélúwen ngeni án Samuel we iótek ngeni usun ewe osukosuk: “Kopwe aüselinga alon ekewe aramas lon meinisin mine ra ürenuk. Pun resap pöütukela, nge ra pöütieila pwe üsap nöür king.” Ese mwáál ena a oururu letipen Samuel, iwe nge a ifan me kirikiringawen ekkena aramas ngeni ewe Kot mi Unusen Lapalap! Jiowa a ereni néún we soufós an epwe éúréúra ngeni ekkena chón Israel pwe repwe kúna watteen liwinin ar mochen epwe wor aramas ar king. Lupwen Samuel a ereniir ena, iir ra péchéú le apasa: “Apwi, äm aia mochen pwe epwe wor eman äm king.” Pokiten Samuel a kan álleasochisi Kot, iwe a feiló me seikaatá ewe king Jiowa a filatá.—1 Samuel 8:7-19.
A Letelo Napanapen Än Jiowa Nemenem!
9 Iwe, a letelo än Jiowa kapasen öüröür. A fis chommong fitikoko atun Israel a nonnom fän nemenien ekkewe king, äkkäeüin, ika ewe king ese tuppwöl ngeni Kot. Pokiten met a fis ngeni Israel, sise mäirü pwe tori ikenäi, a fen sopwongaw mwuun aramas rese silei Jiowa. Pwüngün, ekkoch sou nemenem ra tingor pwe Kot epwe efeiöchü ar achocho le efisatä kinamwe me nükünüköch, nge ifa usun epwe efeiöchüür ika rese älleasochisi i?—Kölf. 2:10-12.
Kúkkútta Pwóróus Aúchea
w02 7/1 22 ¶13
Pwata Kopwe Papatais?
13 Sipwe akkom soulengilo mwen sipwe papatais me wiliiti Chon Pwarata Jiowa. An emon soulengilo pwisin filian pokiten a filata lon letipan pwe epwe tapwelo mwirin Jises Kraist. Ekkena aramas ra poutalo ekkewe foffor mi mwaal ra fen foffori me loom me ra achocho le fori minne mi pwung fan mesen Kot. Lon ewe Paipel, ekkewe kapas lon Ipru me Krik mi weneiti soulengilo ra wewe ngeni kulsefal, nennesefal. Ei foffor a wewe ngeni ach kul ngeni Kot seni efoch aal mi ngau. (1 King 8:33, 34) Soulengilo epwe wor “ekkewe fofor mi fich ngeni ar aier.” (Fofor 26:20) Sipwe su seni lamalam mi chofona, atipeeufengenni ach kewe foffor me allukun Kot kewe, me fel ngeni Jiowa chok. (Tuteronomi 30:2, 8-10; 1 Samuel 7:3) Ach soulengilo a siwili ekiekich, minne sia achocho ngeni, me lapalapach. (Isikiel 18:31) Sia “kulsefal” lupwen lapalapach rese fich ngeni Kot ra siwil ren ewe lapalap mi fo.—Fofor 3:19; Efisus 4:20-24; Kolose 3:5-14.
FEBRUARY 28–MARCH 6
PWÓRÓUS AÚCHEA SENI KAPASEN KOT | 1 SAMUEL 9-11
“Saul Emén mi Tipetekison me Lepoputáán”
Angang Ngeni Óm we Kot fán Tipetekison
11 Ekieki usun met a fis ngeni King Saul. Lealúwélún a mirititi aúkúkún tufichin, a pwal mwo nge pireir le etiwa ekkóch wis. (1 Sam. 9:21; 10:20-22) Nge mwirin och fansoun, a lamalamtekia me a féri minne itá esap féri. A poputá le ina usun mwirin an wiliti king. Lón eú atun ese mosonottam le witiwiti soufós Samuel. Saul ese tipetekison le lúkúlúk pwe Jiowa epwe wisen túmúnú néún kewe aramas, nge a fen eáni ewe asoren kek inaamwo ika ese wor an pwúúng le féri. Mwirilóón, Saul ese chúen kúna chen me ren Jiowa, me ló, ló, ló, ese chúen king. (1 Sam. 13:8-14) Sia mirit ika sia káé seni ena pwóróus me sisap féri ekkewe mettóch ese wor ach pwúúng le fériir.
Ifa Usun Sipwe Pwáppwáratá Ach Tipemecheres le Pennúkúóló Pwisin Mochenich
8 Pwóróusen ewe kingen Israel, King Saul, a eú minen éúréúr ngenikich ren ifa usun ach ekieki chék pwisin kich a tongeni atai ach mochen pennúkúóló pwisin mochenich. Lepoputáán án King Saul nemenem, i emén mi tipetekison. (1 Sam. 9:21) Ese mochen apwúngú ekkewe chón Israel mi ú ngeni i, inaamwo ika a tongeni meefi pwe a wor an pwúúng le apwúngúúr pwe epwe túmúnú wisan we me ren Kot. (1 Sam. 10:27) King Saul a onómu fán emmwenien án Kot we manaman mi fel, iwe a emmweni chón Israel lón ar maun ngeni chón Amon. Mwirin, a tipetekison ren an elingaaló Jiowa ren ar win.—1 Sam. 11:6, 11-13.
w95 12/15 10 ¶1
Ekkewe Chón Amon—Iir Aramas mi Liwini Koput Ngeni Kirekiréch
Ekkewe chón Amon ra liwini koput ngeni án Jiowa kirekiréch. Jiowa ese tunaló ei angangen kirikiringaw. “Lupwen Saul a rongorong ekei kapas [án Nahas], Ngünün Kot a fokun feitiu won. Iwe, a fokun song.” Fán emmwenien án Kot ngún mi fel, Saul a ionifengeni 330,000 soufiu pwe repwe atoropasafeili ekkewe chón Amon pwe “esap wor ruoman ra nonomfengen.”—1 Samuel 11:6, 11.
Kúkkútta Pwóróus Aúchea
w05 3/15 22 ¶8
Menlapen Poraus Seni ewe Puken Aewin Samuel
9:9—Met weween ekkeei itiitin kapas “ätewe mi iteni soufos ikenai a iteni souwo me lom”? Ekkena kapas ra tongeni wewe ngeni pwe atun ekkewe soufós ra iteféúló lón fansoun Samuel we me atun fansoun ekkewe king lón Israel, ewe kapas “souwo” a ekkesiwil ngeni ewe kapas “soufos.” Samuel i ewe áeménún me lein ekkewe soufós.—Föför 3:24.