LESEN 17

Ikkefa Napanapen Jesus Kewe?

Printed Edition

Atun sipwe káé ekkewe mettóch Jesus a apasa me féri atun a nóm fénúfan, sipwe kúna ekkewe napanap mi efisi ach sipwe mochen chiechi ngeniir me Seman we, Jiowa. Ikkefa ekkóch me lein ekkena napanap? Me, ifa usun sia tongeni áppirú Jesus lón manawach?

1. Ifa usun Jesus a mwirifichi Seman we?

Atun Jesus a nóm láng, a kúna féfférún Seman we mi tong, me a káé seni ren fite billion ier. Ina popun, a mwirifichi lón an ekiek, memmeef, me féffér. (Álleani Johannes 5:19.) Ren enletin, Jesus a áppirúfichi napanapen Seman na, ina popun a erá: “Iö a künaei, a küna Semei.” (Johannes 14:9) Atun ka káé usun napanapen Jesus kewe, epwe lapóló óm silei Jiowa. Áwewe chék, napanapen án Jesus chúngú aramas, a pwári úkúkún án Jiowa chúnguk.

2. Ifa usun Jesus a pwári an tongei Jiowa?

Jesus a apasa: “Chon fanüfan repwe fokun silei pwe ngang üa echeni Semei. Ina popun ngang üa föri meinisin mine i a allük ngeniei.” (Johannes 14:31) Atun Jesus a nóm fénúfan, a pwári pwe a fókkun tongei Seman we ren an álleasochisi i pwal mwo nge atun a weires ngeni. Jesus a pwal sani le fóffós usun Seman we me álisi aramas ar repwe chiechiéch ngeni.—Johannes 14:23.

3. Ifa usun Jesus a pwári an tongei aramas?

Paipel a erá pwe Jesus a “pwapwa ren ekewe aramasen fanüfan.” (Än Salomon Fos 8:31) A pwári an tongei aramas ren an apéchékkúla letiper me pennúkúóló mochenin fán iter. Ekkewe manaman a fériir, rese chék pwári tufichin, nge ra pwal pwári an tongei aramas. (Markus 1:40-42) A kirekiréch ngeni aramas me ese eimwumwu ngeniir. Minne a apasa a oururu me atoto ápilúkúlúk ngeni meinisin chókkewe iir mi letipwenechar. Jesus a tipemecheres le riáfféú me máló pokiten a tongei aramas meinisin. Nge a ákkáeúin tongei chókkewe mi álleasochisi minne a eáni káit.—Álleani Johannes 15:13, 14.

KÚTTAFICHI

Ppii pwal ekkóch napanapen Jesus kewe, me ekieki ifa usun kopwe pwári tong me kisáseú usun chék i.

4. Jesus a tongei Seman we

Án Jesus leenien áppirú a áiti ngenikich ifa usun sipwe pwári ach tongei Kot. Álleani Lukas 6:12 me Johannes 15:10; 17:26. Mwirin álleaan eú me eú ekkena wokisin, pwóróusfengen wóón ei kapas eis:

Ifa usun sia tongeni áppirú Jesus ren ach pwári ach tongei Jiowa?

Jesus a iótek. — Jesus a tongei Seman we lón láng me a kan iótek ngeni fán chómmóng

5. Jesus a chúngú aramas lón ar osupwang

Jesus a akkomwa met mi lamot ngeni aramas lap seni pwisin i. Inaamwo ika a pekkus, nge a áeá an fansoun me péchékkúl le álisi aramas. Álleani Markus 6:30-44, me mwirin pwóróusfengen wóón ekkeei kapas eis:

Ikkefa ekkóch mettóch Jesus a féri me lón ekkeei wokisin mi pwári pwe a tongei aramas?—Ppii wokisin 31, 34, 41, me 42.
Met a amwékútú Jesus le álisi aramas?—Ppii wokisin 34.
Pokiten Jesus a áppirú napanapen Jiowa kewe, iwe met a áiti ngenikich usun Jiowa?
Ikkefa ekkóch mettóch sia tongeni féri pwe sipwe áppirú Jesus lón an tongei aramas?

Jesus a amwéngééni fitengeréú aramas ren chék nifféú pilawa me rúúemén kúkkún iik. Ekkewe chón káé ra eineti ekkewe mwéngé ngeni ekkewe mwán, fefin, me semirit.

6. Jesus emén mi kisáseú

Jesus a kisáseú inaamwo ika ese pwal chómmóng pisekin me wéún, me a pesekich ach sipwe pwal kisáseú. Álleani Föför 20:35, me mwirin pwóróusfengen wóón ei kapas eis:

Me ren Jesus, met a tongeni atoto ach pwapwa?

Fichi ei VIDEO, me mwirin pwóróusfengen wóón ei kapas eis.

VIDEO: “There Is More Happiness in Giving”—Excerpt (4:00)

Ikkefa ekkóch alen ach sipwe fangafangéch inaamwo ika kich mi osupwang?

En mi silei?

Paipel a áiti ngenikich ach sipwe iótek ngeni Jiowa lón iten Jesus. (Álleani Johannes 16:23, 24.) Atun sia féri ena, sia pwári pwe sia mirititi minne Jesus a féri pwe epwe álisikich le wiliti chiechien Jiowa.

EKKÓCH RA ERÁ: “Aramas ra kúna riáfféú pún ina kapwúngúúr me ren Kot.”