En Mi Silei?

Itá ekkewe chón Rom ra mutatá peiasilóón emén mi ninniiló wóón efóch iráán ninni, áwewe chék ren Jesus?

CHÓMMÓNG ra silei pwe Jesus a eitiwetá wóón efóch iráán ninni lukanapen rúúemén chón atai allúk. (Mat. 27:35-38) Iwe nge, ekkóch ra lúkú pwe ese pwúng met ewe Paipel a erá pwe inisin Jesus a mmólnetá fán iten peias me ra waalong lón peiasan.​—Mark. 15:42-46.

Chókkewe mi ú ngeni ekkewe Puken Kapas Allim, ra lúkú pwe esap mumutá ngeni emén mi ninniiló an epwe peias, áwewe chék ren an epwe peias lón eú leenien peias. Ra fen lúkú pwe emén mi ninniiló pokiten an atai allúk, esap peias. Iei met Ariel Sabar a erá lón ewe puk Smithsonian usun popun án ekkóch eáni ena memmeef: “A fich án chókkewe mi unusen féfféringaw repwe ninniiló wóón efóch irápenges, me ekkóch sousile ra erá pwe a umwes án emén epwe lúkú pwe ekkewe chón Rom repwe mutatá peiasilóón ekkena sókkun aramas.” Ekkewe chón Rom ra mochen ásáwa ekkena chón atai allúk, ina popun ra likiti inisiir wóón ena iráán ninni pwe ekkewe man ra tongeni ocheer, nge met lusun, repwe chék péútaaló lón eú peias.

Iwe nge, chókkewe mi ttu fán pwúl ra kúna och mettóch mi sókkóló, áwewe chék ren ekkóch chón Jus mi ninniiló. Lón 1968, ra kúna chúún emén mwán mi ninniiló lón fansoun ekkewe aposel nge a nóm lón peiasen eú familien chón Jus kane ngeni Jerusalem. Falangen ena mwán a nóm lón eú pwóór. Chúún epinipinin a nóm lein falangan na. Epinipinin na a chúfél ngeni émwúch, nge ttamen chúfélún we 4.5 inis ttaman. Sabar a erá: “Iten ena mwán, Yehochanan minne ká chúún epinipinin ena, a awora pisekin ánnet mi pwári pwe pwóróusen peiasen Jesus lón ekkewe Puken Kapas Allim, a tongeni pwúng.” Pwal och, “chúún epinipinin Yehochanan, ewe mi peias atun fansoun Jesus we, ina eú pisekin ánnet pwe ekkewe chón Rom ra mutatá án chón Jus eérenien peias.”

Aramas ra eáni sókkopaten ekiek wóón itiitin inisin Jesus wóón ewe iráán ninni pokiten met ra kúna seni chúún epinipinin Yehochanan we. Nge ena pwóróus a affata pwe ekkóch chón atai allúk mi ninniiló, ra peias, nge rese chék péútiireló lón ese lifilifil peias. Ewer, minne ewe Paipel a erá usun peiasen inisin Jesus, a pwúng. Ekkewe pisekin ánnet ra ánnetatá pwúngún alon Paipel.

Nge met mi aúchea seni meinisin, Jiowa a fen oesini pwe Jesus epwe peias lón peiasen emén mwán mi wéúmmong, me esap wor emén a tongeni pinei pwénútáán alon Kot.​—Ais. 53:9; 55:11.