Atun Ka Chék Mochen Fangetá
KA FEN piin meefi watteen riáfféún letipom pwe kese chúen mochen manaw? Iwe, ese mwáál ka weweiti meefien Adriana na. A riáfféú ren an aúrek mi kon ssenúk ngawan me a úri semwenin letipechou.
Pwal ekieki alon emén re Japan itan Kaoru, mi wisen túmúnú seman kewe me inan iir mi chinnap nge ra kan sessemwen. A erá: “Lón ena atun, a pwal unusen áweires ngeniei ai we angang. Ló, ló, ló, use chúen mwon enei, me use tongeni annut kinamwe. Iwe, ua kan ekieki epwe ifan me ngaselóói ika upwe fen chék máló.”
Iei alon Ojebode, emén re Nigeria: “Ua kan leletipechou iwe ua kan chék kekkechiw. Ina popun ua kútta alen ai upwe pwisin angealó manawei.” Kilisou pwe Ojebode, Kaoru, me Adriana rese pwisin angealó manawer. Nge fitepúkú ngeréú aramas ra fen pwisin angealó manawer iteiten ier.
EWE IA SIA TONGENI KÚNA ÁLILLIS ME IE
Lape ngeni chókkewe mi pwisin angealó manawer, iir mwán, chómmóng me leir ra fókkun sáw le tingor álillis. Jesus a erá pwe a lamot ngeni chókkewe mi samau, tokter. (Lukas 5:31) Ina minne ika ka meefi lululóón óm letipechou me mochen angealó manawom, iwe kese mochen kosap sáw le kútta álillis. Chómmóng chókkewe mi semwenin letipechou ra kúna álillisin pioing le likiitú fán ar riáfféú. Ojebode, Kaoru, me Adriana ra kúna álillis seni tokter, me iei ra tufichin likiitú.
Ekkewe tokter ra tongeni áeá sáfei are ewe sókkun minen álillis, ina án ewe mi letipechou ukkuwawu meefian ngeni. A pwal lamot ngeni chókkewe mi riáfféú án chón ar famili me chiechier kewe tong me álillis. Nge chiechiach we mi múrinné lap seni meinisin, ina i Jiowa Kot, ewe mi álisikich ren an we Kapas, ewe Paipel.
ITÁ MI WOR MET EPWE ATAWEFÓCHEI?
Fán chómmóng, a lamot ngeni chókkewe mi semwenin letipechou álillisin me túmún seni tokter ren fansoun langattam, me mi lamot repwe féri siwil lón met ra kan eéreni le féri. Nge ika ka weires ren óm letipechou, ka tongeni eáni ewe ápilúkúlúk mi amwarar lón mwachkkan. Ina met Ojebode a meefi, a erá: “Ua mwétéresiti pwénútáán Aisea 33:24, ewe mi oesini usun ewe fansoun esap chúen wor emén wóón fénúfan epwe apasa ‘pwe a samau.’” Kopwe usun Ojebode le kúna ourur seni án Kot pwon usun ewe “fanüfan mi fö,” ikewe esap chúen wor “cheuch” ie. (Pwärätä 21:1, 4) A pwal kapachelong lón ena pwon wesilóón metekin letipach me ekiekich meinisin. Sisap chúen “chechemeni . . . o ekieki usun” metekin letipach.—Aisea 65:17.