Okkufu ewe Féfférún Pwisin Urumwotei Pisekin fán Maas

Ewe féffér pwisin urumwotei pisekin fán maas a efisi ewe napanap mi alapaaló án emén ekieki chék pwisin i, me ekieki mettóch mi ngaw. Nge ina eú féffér mi eletipengawa Kot. Neman emén mi pwisin urumwotei pisekin fán mesan a ekieki pwe ekkewe ekkóch iir chék leenien angasangas. A poputá le ekieki pwe ewe féfférún lisowu esap chúen ina féfférún án rúúemén pwárfengeni ar tong, nge ina chék eú féffér epwe apwapwaai inisin lón fansoun mwochomwoch me ekinamweii. Nge ena kinamwe epwe mwittir móróló. Ren enletin, ewe féfférún pwisin urumwotei pisekin fán maas ese ámálói ekkewe kifetin inis ren “sokopaten föförün lisowu, lüangau, mocheisou” nge a fen amanaweretá.​—Kolose 3:5.

Ewe aposel Paulus a éúréúra ekkewe Chón Kraist ar repwe limeti pwisin iir seni meinisin sókkun limengawen inis me ekiek me repwe manaweni eú manaw mi unusen pin lón ar niwokkusiti Kot. (2 Korint 7:1) Ika a weires ngonuk le álleasochisi ekkeei kapas, iwe kosap ápilúkúlúkúngaw. Jiowa a mmólnetá fansoun meinisin le “amusala tipis” me álisuk. (Kölfel 86:5; Lukas 11:9-13) Ren enletin, letipom mi kan apwúnguk me óm achocho le okkufu féfférum, a pwári pwe ka eáni ekiek mi múrinné inaamwo ika fán ekkóch ka liwinsefáliti féfférum kewe. Kopwe pwal chechchemeni pwe “Kot mi lapalap seni letipach o a fen sinei mettoch meinisin.” (1 Johannes 3:20, TF) Jiowa ese chék kúna tipisich, nge a pwal kúna ika kich met sókkun aramas. Pokiten a silei mettóch meinisin usuch, iwe fán kirekiréch a tongeni aúseling ach kewe sié fán iten úméúméch. Ina popun sisap achanú le ikkiótek ngeni Kot seni letipach fán tipetekison, usun chék án emén nau feffeiló ren seman atun a nóm lón osukosuk. Jiowa epwe ngonuk eú letip mi limeliméch. (Kölfel 51:1-12, 17; Aisea 1:18) Pwúngún, a lamot ngonuk óm kopwe etipeeúfengeni féfférum ngeni óm kewe iótek. Áwewe chék, kopwe achocho le ttii sonuk meinisin sókkun sasingin me kachitoon kapasingaw me pwal ekkewe chiechi mi ngaw.a

Ika a chúen sópwósópwóló óm osukosuk ren óm urumwotei fán mesom, kese mochen fós ngeni emén sam are in Chón Kraist are chiechiom mi ásimaw lón pekin lúkú mi tongeok usun ena mettóch.b​—Än Salomon Fos 1:8, 9; 1 Tesalonika 5:14; Titus 2:3-5.