Kataween Osukosuk lón Pekin Business

Ewe aposel Paulus a áweweei lón 1 Korint 6:1-8 usun án ekkewe Chón Kraist kapwúng lefiler. A pwári an lichippúng ren án ekkóch Chón Kraist lón Korint feiló ren ekkewe “soukapwüng” chón lúkún. (Wokisin 1) Paulus a affata ekkewe popun mi lamot án ekkena Chón Kraist itá resap féri kapwúng lefiler lón imwen kapwúng nge repwe ataweei ar osukosuk me ren ekkewe emmwen mi kawor ngeni ekkewe mwichefel. Sipwe mwo pwóróusfengen wóón ekkóch popun an a kawor ei kapasen emmwen mi pop seni Kot me pwóróusfengen wóón ekkóch pwóróus ese kapachelong lón ei kapasen emmwen.

Ika a wor ach osukosuk lón pekin business are osukosuk wóón fénú ngeni emén Chón Kraist, sipwe akkomw ataweei me ren án Jiowa emmwen nge esap me ren pwisin ach. (Än Salomon Fos 14:12) Usun chék met Jesus a apasa pwe a kon múrinné ach sipwe mwittir ataweei ewe osukosuk mwen epwe lapóló ngawan. (Mateus 5:23-26) Iwe nge a elichippúng pokiten ekkóch Chón Kraist ra fókkun tipeweires pwal mwo nge uwealó ar kewe osukosuk lón ekkewe imwen kapwúng. Iei met Paulus a apasa: “Ämi uwala lon kapwüng fitikokon lefilemi a pwärätä pwe oua kuf.” Pwata? Eú popun mi lamot, pokiten ekkena sókkun féffér epwe eitengawa ewe mwichefel me ewe Kot sia fel ngeni. Ina popun sia mochen lefareni án Paulus ei kapas eis: “Ifa usun, esap fen öch än eman epwe föri mine a mwäl ngenikemi?”​—Wokisin 7.

Paulus a pwal áweweei pwe Kot a fen ngeni ewe mwichefel eú kókkót mi múrinné ren kataween chómmóng osukosuk. Ekkewe Chón Kraist mwán mi ásimaw ra eáni tipachem pwe ra silei ewe enlet seni Paipel, me Paulus a apasa pwe ra “tongeni apwüngü fitikokon lefilen” ekkewe Chón Kraist usun “ekewe mettochun lon ei manau.” (Wokisin 3-5) Jesus a áiti ngenikich pwe ekkewe osukosuk usun féffér mi ngaw mi chou usun chék pweni me angangen otuputup, repwe tawe ren ekkeei úlúngát mettóch mi tettelitiw. Áeúin, achocho le ataweei ewe osukosuk lefilemi chék me ekkewe a wor ámi osukosuk. Oruuan, ika ese pwák ren ewe áeúin, iwe oupwe eweina rúúemén are úlúmén chón pwáraatá. Aúlúngátin, ika ese pwák ren ewe oruuan, iwe oupwe uwealó ewe osukosuk ngeni ewe mwichefel weween ren ekkewe mwán mi ásimaw mi tupuni ewe mwichefel.​—Mateus 18:15-17.

Pwúngún, sap minne ekkewe Chón Kraist mwán mi ásimaw, iir lawyer are chón business mi wisen awora emmwen usun allúkún mwú are pekin business. Rese pwal féri allúkún án Chón Kraist repwe ataweei ar osukosuken business are osukosuken fénú lefiler. Nge ra achocho le álisi ekkewe mi kapachelong lón ewe osukosuk le apwénúetá met Paipel a apasa me tipeeúfengen wóón kataween ewe osukosuk fán kinamwe. Nge ren ekkewe osukosuk mi watte, ekkewe mwán mi ásimaw repwe tongeni kútta emmwen seni ewe mwán mi ásimaw mi wisen sáifetál are seni án Chón Pwáraatá Jiowa we keangen ofesilap. Iwe nge, mi wor ekkóch osukosuk rese kapachelong lón án Paulus we kapasen emmwen. Ikkefa?

Lón ekkóch mettóch, a lamot an epwe wor kapwúng me ren allúkún mwú pwe epwe tawe ewe osukosuk fán kinamwe me kókkótéch. Áwewe chék, kapwúng ina chék alen án emén epwe tongeni mu seni pwúlúwan, án emén epwe angei pwúúng le wisen onómu emén semirit, apwúngaló ewe úkúkún moni epwe ngeni pwúlúwan we me lóóm, angei moni seni insurance, an epwe pwúng eché taropween emwirinimá me án emén kapachelong lein chókkewe mi mutawu liwinimmang ngeni eú business mi fen bankrupt. A pwal tongeni fis pwe ren án emén pwiich epwe kúna túmún, epwe meefi lamoten an epwe kapwúng ngeni emén mi fen kapwúng ngeni.a

Ika emén a féri ekkena sókkun kapwúng nge esap fán eú napanap mi tipeweires are tipeférea, iwe ese ú ngeni án Paulus we kapasen emmwen mi pop seni Kot.b Iwe nge, lap seni meinisin emén Chón Kraist epwe alamota pinilóón iten Jiowa we me ewe kinamwe me tipeeú lón ewe mwichefel. Ekkewe chón tapweló mwirin Kraist ra ákkáeúin silleló ren ar tong me ena esin “tong . . . esap kutta pwisin letipan.”​—1 Korint 13:4, 5; Johannes 13:34, 35.