Kot Wesewesen Emön?

Pölüwan me ren Aramas:

◼ “A nom ekis meinisin, lon mettoch meinisin. A ussun ewe äsepwäl.”

◼ “Ina och manaman mi tipatchem, nge esap wesewesen emön.”

Met Jises a apasa?

◼ “Mi wor chomong ruum lon imwen Semei.” (Jon 14:2) Jises a apasa pwe ussun itä nge a wor imwen Seman we are leenian.

◼ “Üa feito seni Semei o feitiu fanüfan. Nge iei üpwe towu seni fanüfan o liwinsefälila ren Semei.” (Jon 16:28) Jises a lükü pwe Kot wesewesen Emön me a nonnom lon pükün leenian.

JISES ese apasa fän eü pwe Kot och chök manaman. Nge a foffos me ikkiotek ngeni Kot. Fän chommong a erä pwe Kot, i Seman we lon läng, iwe, a änneta pwe a wesewesen pacheöch ngeni Kot.​—Jon 8:19, 38, 54.

A enlet pwe “ese mo wor emon mi küna Kot” me “Kot mi ngun.” (Jon 1:18; 4:24, TF) Sap minne a wewe ngeni pwe esor inisin. Ewe Paipel a äiti ngenikich: “Are a wor eu inis sokun fituk, epwe pwal wor eu inis sokun ngün.” (1 Korint 15:44) Iwe, a wor inisin Jiowa, inisin ngün?

Ewer. Lupwen Jises a manausefäl, a “tolong lon läng o a nonom mwen mesen Kot iei fänäsengesich.” (Ipru 9:24) Ena wokisin a äiti ngenikich ruu pworaus mi fokkun lamot ussun Kot. Äeüin, a wor leenian. Oruuan, a ffat pwe Kot wesewesen emön, nge esap och chök manaman mi nom ekis meinisin.

Iwe, ifa ussun Kot epwe tufichin nemeni mettoch meinisin ekis meinisin? Kot a tongeni tinalo an we ngün mi fel, are an manaman, ekis meinisin. Ren chök awewe, eü tenkiya a kan nonnom lon leenian we, nge a tongeni awora fiifi lon unusen ewe leeni. Pwal ina chök ussun, seni leenian we lon läng, Kot a tongeni äeä an we ngün mi fel pwe epwe apwönüetä an kewe kokkot ekis meinisin.​—Kölfel 104:30; 139:7.

Pokiten Kot wesewesen Emön, a pwal wor napanapan, me meefian, minne a sani me minne a oput. Ewe Paipel a erenikich pwe a tongei nöün kewe aramas, a pwapwaesini minne a föfföri, a oput än aramas fel ngeni ululun, me a meefi letipechou ren föfföringaü. (Keneses 6:6; Tuteronomi 16:22; 1 King 10:9; Kölfel 104:31) I emön Kot mi pwapwa. Ina pwata, Jises a apasa pwe sipwe tongeni ämääraatä ach tong ngeni ei Kot ren unusen letipach!​—Mark 12:30.a

[Footnote]