Án Paipel Kewe Kapas Eis Ra Pélú

Itá a wor popun an a wor ach ei fénúfan?

Ach ei fénúfan chék a fich an epwe wor manaw wóón. A watte konik me ina ewe mi kon lamot ngeni manaw. Itiitin, rokopwálin, me fetálin ewe fénúfan, iir meinisin ra túmúnú pwe ewe mataw ete féúló are fisikkar. Pwal ewe ásepwál wóón fénúfan me ewe manaman mi usun chisakú mi pwelli fénúfan ra túmúnú fénúfan seni sókkun manaman mi efeiengaw. A mmen amwarar ekkewe kókkót mi rifengeni ekkewe mettóch mi manaw usun irá me man. Ina popun, chómmóng aramas ra lúkú pwe ach ei fénúfan a fférútá fán iten eú popun.​—Álleani Aisea 45:18.

Nge eli kopwe ekieki, ‘Iwe itá ra kapachelong riáfféú me pwúngúngaw lón ena popun?’​—Álleani Tuteronomi 32:4, 5.

Epwe itá pwénúetá ewe popun fénúfan a fférútá?

Ewe fénúfan a fférútá pwe epwe eú leeni mi apwapwa fán iten ekkewe aramas mi asamolufengeniir me tongei ewe Chón Fériir. Ina pwata, ewe popun an a férata aramas a kon auchea lap seni ewe popun an a fératá irá are man. Sia tongeni weweiti ié na ewe Chón Férikichetá me ingeiti me áppirú an tong me pwúng.​—Álleani Än Salomon Afalafal 12:13; Mika 6:8.

Ewe Chón Férikich a tongeni apwénúetá meinisin minne a akkóta. Ina popun sia tongeni lúkúlúk pwe epwe áwesaaló riáfféú me pwúngúngaw me féri ach ei fénúfan pwe epwe eú leeni mi fókkun múrinné fán iten aramas.​—Álleani Kölfel 37:11, 29; Än Salomon Fos 2:21; Aisea 55:11.