1 Joau

1 Ddinoulebelani mwaha wa ole wali ovenyana omaromo, odduwene odhilena mazu amvaha egumi, omwiwalehu, omonilehu na mento ehu, onilehu merelo aye vina omuttiddilehu na mada ehu. 2 (Iyo nidha oziwa vina ononelamo egumi yohimala enonihile Baba vina ninovaha onamoona nulaleyelagani nyuwo egumi eji), 3 ejile yonilehu vina yiwalehu ninoulaleyelani vina nyuwo, wila nyuwo vina mukale mumodhani na iyo; iyo nili mumodhani na Baba vamodha na Mwanaye Yezu Kristu. 4 Iyo ninoulebelani dhilobo esi wila ottaba wehu wakwane.

5 Muselu wiwalehu vina onulaleyelani iyo bubu: Mulugu txeza vina mwa iyene kamuli eddima. 6 Akala ninologa wi: “Nili mumodhani na iyene,” oku neddagavi mwiddimani, ninozivala vina kaninvirihamo ebaribari. 7 Vano akala ninedda mutxezani dhahene ninga Mulugu oli mutxezani, nili mumodhani muttu na mukwaye vina nikami na Yezu Mwana Mulugu ninonikoddeliha mwa dhottega dhotene.

8 Nigaloga wi: “Kaninna yottega” ninovinyengetta nanya vina ebaribari kili mwa iyo. 9 Nigarumela wi nili attegi, Mulugu ononilevelela dhottega vina onokoddeliha dhovirigana dhehu dhotedhene, vowi iyene ddororomeleya vina ddoligana. 10 Akala ninologa wi: “Iyo kanittegile,” ninimwira Mulugu muttambi, vina nzu naye kanili mwa iyo.