Tiago
3 Abalaga, kahiyo yofuneya vari venyu okalavo anamasunziha enjene, vowi nyuwo munoziwa wila ottongiwa wehu onele okala onddimuwa. 2 Sabwani iyo notene ninottega* dila dhinjidhene, akala muttu kanttega na mazu, ddowakwana, onowodha weddiha maningo aye otene. 3 Nigamagelela mujila omulomoni wa kavalo wila aniwelelege, ninowodha omweddiha kavaloyá wotene. 4 Mwawone vina apaporo, masiki onuwilevi vina atukumiwaga na pevo enddimuwa, aneddihiwa na lemi ning’ono-ng’ono, eddihedhiwaga onfuna nameddihayá.
5 N’ekalelo yakakene, nlumi epaddi eng’ono-ng’ono ya maningo, mbwenyi ninogaya na dhinjidhene. Konani vina, tatali eng’onovi ya motto enoddumeya takwa enddimuwa. 6 Nlumi vina nili ninga motto. Mwa vyano dhotedhene dha maningo, nlumi nihidhaleliwa dhotakala, sabwani ninoraviha maningo otene vina ninoddumeya egumi yotene, mottoya ondha mu Jehena.* 7 Vowi dhinama dhotedhene dha mwini, balame, dhinama dhonyongottowa na dhinama dha mwiko, dhotedhene dhinowodheya ofuwiwa na muttu. 8 Vano kawo muttu onwodha wang’anela* nlumi. Nlumi kanineddiheya, ttobure vina nihidhala veneno yopa. 9 Na nlumi, ninomuttittimihana Yehova, Babi vina na nlumi nakakene ninowalogana bure attu apaddutxiwe “moladdana na Mulugu.” 10 Na mulomo wakakene ninowaruriha attu, na mulomo wakakene vina ninowaloga bure attu.
Abalaga, kinkala wi dhilobo esi dhikoseyege dhahene. 11 Koddi fukuwa modha enowodha oburutxa manje oridha na manje owawa? 12 Abalaga, enowodheya muri wa mfigera obala milima dha milivera, muri wa uva obala figu? Yakakene vina, fukuwa ya manje a mwinyu, kinwodha wita manje oridha.
13 Vari venyu bani onna eziwelo vina ononelamo? Alagihe na merelo aye mabasa ankosiye n’okurumuwa, anoniha zelu. 14 Vano akala mmurimani mwenyu mudhala aje yottabwa na owana-wana, kamugaye vina kamuzivalele ebaribari. 15 Zelu eji kahiyo ya wirimu; zelu ya vati apano eneddihiwa na dhifunelo dhomaningoni vina ya adomonyo. 16 Sabwani vego vali aje na owana-wana vanokala vina ohiwanana na dhobure dhotedhene.
17 Vano, vamaromo-vene zelu ya wirimu j’ottorhorha, ngamala enodhana murenddele, enowiwananeyana, enowiwelela momaguva, edhala ttagaraga, enobala milima dhapama, kinna nsakulano vina kimpela malago. 18 Ottiya eji, milima dha oligana dhinaliwa na murenddele, na abale antamela okaliha murenddele.