Dhilebiwe na Mateu
3 Masiku abale Joau Batista oroma olaleya mwiddeddereni y’o Judeya, 2 eraga: “Karugunutxani murima, vowi Omwene wa wirimu oli vakuvi.” 3 Txibarene, oddu, ddule walogiwe na namavuhulela Izaiya na mazu awi: “Nihiweya lizu na muttu mwiddeddereni nalaleya dhahi: ‘Kasasanyedhani dila ya Yehova! Kogolelani diladhá.’” 4 Joau wàbala guwo yaluwiwe na moya wa kamelo vina wammaga muyununi sintu ya ttebe y’ovadda. Oja waye wali mabalaga na wiyi wa mukokolani. 5 Attu a mu Jeruzalemi, vina a mu Judeya mwetemwene na otene akala waddamana na Jordau, andhowa vàliye; 6 awene ambatiziwa* na Joau Mmwinjeni Jordau vina ambweka dhoddawa dhawa.
7 Mwawoneliye Afarizi na Asaduseu àddamelaga mburo w’obatiziwa, iyene ohiloga: “Nyuwo ziza na dhivili, bani wupangileni wi munele owodha ottawa owali wa Mulugu onadhe? 8 Mubale milima dhinoniha orugunutxa wenyu murima. 9 Kamugaye mulogaga wi, ‘Nili ana Abrahamu.’ Vowi miyo ddinouwaddelani, enowodheya Mulugu osaddula malugu aba, bakala ana Abrahamu. 10 Matxaddo omala wettekeliwa mitxitxi dha miri. Muri wotene ohimbala milima dhapama onogwaddiwa ovokeliwe vamottoni. 11 Miyo ddinubatizani na manje sabwa yotxinuwa dhottega dhenyu, mbwenyi ole ondha mundduni mwaga, okaana guru opitta miyo. Miyo kaddinfwanyela nne omurula sandáliya dhaye. Odduwene ddinaubatizeni na muya wokoddela vina na motto. 12 Iyene okaana mmadani mwaye paya y’omuttiyanihana tirigu na maveya, vina onele okuputta mukuputtelo vamburoniva. Tiriguyá onele omuttukulela vanddarani, maveyayá onele oddumeya vamottoni ohinttimiheya.”
13 Yezu ovenya o Galileya odhowa ogumana na Joau omwinjeni Jordau wi abatiziwe. 14 Mbwenyi iyene okodda, eraga: “Ddi miyo onfwanyela obatiziwa na nyuwo, vano nyuwo munodha wi miyo ddubatizeni?” 15 Yezu omwakula: “Kattiya wi yireye dhahene, wi nakwanihedhe dhinfuneya.” N’eji Joau orumela ombatiza. 16 Yezu mmaleliye obatiziwa, momaguva-mwene obudduwamo mmanjenimwa; venevo erimu efuguwa vina ohona muya wa Mulugu omutitelaga n’ekalelo ya kangayiwa. 17 Novenya, nihiweya lizu nadha wirimu naloga: “Oddu ddi Mwanaga, wokweleya, odduwene onimurumelimi.”