1 Korinto
2 Abali, mudheli miyo oulaleyani dhoviteya dha Mulugu, kaddilogile na mazu ohinoneleyamo obe na eziwelo ya aziwitxi. 2 Ddigana ohiloga elo ehili mwaha wa Yezu Kristu, odduwene okomeliwe vapingirhizini. 3 Valimi na nyuwo ddali wowobana, wogurumela vina na wova onddimuwa; 4 dhologa dhaga na esile dhilaleyilemi, kadhali dha mazu a eziwelo y’otomolana murima, ottiya ejo dhoniha owodha wa muya wokoddela wa Mulugu, 5 wi nipara na nroromelo nenyu nihikale na zelu dha attu, mbwenyi nikale na guru ya Mulugu.
6 Vano iyo ninloga zelu dha abale anna nroromelo nowarala, mbwenyi kahiyo zelu dha alamuleli a elabo ejino, abuwene anfuna otolotxiwa. 7 Ninloga mwaha wa eziwelo ya Mulugu, yali yoviteya yaye, yalogiliye vamaromo-vene elabo ehinatti ottanddiwa wi ekale nttittimiho nehu. 8 Eji eziwelo ehifiyedhile oziwa nne mulamuleli mmodha wa elabo ejino, sabwani koziwa kagafiyedhile ompa Nabuya wehu wottittimiheya. 9 Jijuwene enloga malebo eraga: “Kawo wonile* vina kawo wiwale,* nne kawo muttu wobuwela wi Mulugu agahasasanyedhela esi abale anakweliye.” 10 Mbwenyi Mulugu oniziwiha dhilobo esi na muya waye. Muya obo onopepesa dhilobo dhotedhene, masiki na dhilobo dhoviteya-viteya dha Mulugu.
11 Muttu gani onziwa dhubuwelo dha muttu mwina? Kawo onziwa. Murima wa muttu yeka bunziwa, n’ekalelo yakakene kawo onziwa dhubuwelo dha Mulugu ohili muya wa Mulugu. 12 Iyo kanakelile muya wa elabo, nakelile muya ondha wa Mulugu, dhahene ninowodha ononelamo dhilobo dhinivahile Mulugu na opama waye. 13 Iyo ninologa dhilobo esi, ottiya na mazu asunzihiwehu na eziwelo ya attu, mbwenyi ninloga na mazu asunzihiwehu na guru dha Mulugu, nitapulelagamo ebaribari ya Mulugu.
14 Mbwenyi muttu oneddihiwa na dhubuwelo dha attu* kanrumela dhilobo dhinziwihiwa na muya wa Mulugu; iyene onona dhilobo esi ninga dhotolo. Iyene kanwodha ononelamo, sabwani muttu onwodha ononelamo ddule onkamihedhiwa na muya wa Mulugu. 15 Muttu oneddihiwa na muya wokoddela onononelamo dhotedhene, mbwenyi iyene kanttongiwa na muttu. 16 Malebo anloga: “Bani ofiyedhile oziwa yubuwelo ya Yehova wila awodhe omusunziha?” Vano iyo ninna yubuwelo ya Kristu.