Ovuhulela wa Joau

10 Miyo ddimona anju mwina woliba, wakita wirimu, wabalile murabo, wahikana musilibo* vamusorhoni vaye, kove yaye yali ninga nzuwa, myeddo dhaye* dhali ninga matxikwa a motto, 2 vina mmadani mwaye mwahikala rolu eng’ono yafuguliwe, ohika nnyalo naye n’epaddi yoja mbara, mbwenyi nnyalo n’epaddi yemara vamattakani, 3 iyene okuwa na lizu noliba dhahene ninga poddogoma agangoroma. Mukuweliye, jayi tanu na bili dhihiloga.

4 Mulogeli jayi esile tanu na bili, miyo ddafuna ddilebe, mbwenyi ddihiwa lizu nadha wirimu niddaddelile: “Kakoya moviteyani esile dhilogile jayi tanu na bili vina kulebe.” 5 Anju omonilemi wowimelene na nnyalo nimodha mbara nnyalo nina vamattakani, otapulela nlada naye noja wirimu, 6 vina omuddubelela Ole onkalawo okala n’okala-wene, ole ottanddile erimu na dhiliwodhá, elabo na dhilimodhá, bara na dhilimodhá, dhahi: “Kunagonele vina. 7 Wahalagawo mudhidhi mung’onovi wi anju wanotanu na wili amobe parhaza waye, txibarene enele wakwanihedheya yoviteya ya Mulugu, yalaleyeliye ninga miselu dhapama, adhari aye anamavuhulela.”

8 Vina ddihiwa lizu nadha wirimu niddaddelaga wili, lizuna niloga dhahi: “Kadhowa wattukule rolu eli yofuguwene mmadani mwa anju wimelile na nnyalo nimodha mbara, nnyalo nina vamattakani.” 9 Miyo ddimususela anjuyá vina ddimukumbirha wi addivahe rolu ejile eng’ono. Anju oddo oddaddela: “Kattukula rolu eji, oje; eji enele okosiha mbani mwawo owawa, mbwenyi mwano mwawo enele ottapirha ninga wiyi.” 10 Ddittukula rolu eng’ono mmadani mwa anju vina ddija, venevo mwano mwaga yanttapira ninga wiyi, mbwenyi mumalilemi oja, mbani mwaga mwanwawa. 11 Nowidhawo ddihaddeliwa: “Weyo onofwanyela ovuhulela wili mwaha wa malogo, dhilabo, dhilogelo vina amwene enjene.”