Dhilebiwe na Luka
1 Attu enjene ahizuzumela oleba miselu na dhopadduwa dha esile dhinrumelihu, 2 dhahene ninga mwaddeliwehu omaromo-wene na abale onile dhipadduwaga vina ali anamoona a miselu esi. 3 Miyo vina mmalelimi opepesa dhotene dhipadduwile, ddigana wulebelani esidhá nyuwo Teófilo wottittimiheya ovenyana omaromelo, ddifwaraga mpadduwelani, 4 wila mukuluvele wi esile dhisunzihiwenyu s’ebaribari.
5 Nsaka na Herodi,* mwene w’o Judeya, wahikalawo namakutta wakuweliwa Zakariya wa nikuru na Abiya. Mwadhiye wali wa ziza na Aroni, wakuweliwa Elizabeti.* 6 Oheli annimukoddelela murima Mulugu, kaana mweddelo wosumuleleya, amfwara malamulo na dhoruma dhotedhene dha Yehova. 7 Vano kaana mwana, vowi Elizabeti kawodha obala, vina oheli àhuluvala.
8 Zakariya wela ottidda mabasa aye vamentoni va Mulugu ninga namakutta, vowi wahifiya mudhidhi wa mabasa a nikuru naye. 9 Mfiyedhe mudhidhi wa Zakariya omperheka lubani, iyene ovolowa mu santuwariyu mwa Yehova wila amperheke lubaniyá, dhahene ninga mwarumela malamulo, àlemelele anamakutta. 10 Mudhidhi waperhekiwa lubaniyá muttitti wotene wa attu àli otakulu akosaga malobelo. 11 Venevo ofiyavo anju wa Yehova, wemelile epaddi ya mono woja wa ebuwa vaddumeyiwa lubani. 12 Zakariya mmoneliye, ohova vina ogurumela vaddiddi. 13 Venevo anjuyá ohiloga: “Kuwove Zakariya, malobelo awo avuruwaniwa; mwadhiyo Elizabeti onele ombala mwana onanvahiwe nzina na Joau. 14 Weyo onele ohagalala, ottabe venjene vina attu enjene anele oziveliwa na obaliwa waye, 15 iyene onele okala munddimuwa vamentoni va Yehova, mbwenyi kamwe vinyu nne yomwa yina yolezeliha, onele odhaleliwa muya wokoddela masiki ahinatti obaliwa,* 16 onele wattukulela ana Izrayel enjene omwiyelela Yehova, Mulugu wawa. 17 Ottiya ejo, Mulugu onele omuruma osogorho na muya vina na guru ninga dha Eliya, wila arugunutxe mirima dha ababi dhikale ninga dha anawa, arugunutxe mirima dha attu ohiwelela dhikale dha eziwelo; wi àsasanyedhe attu anamulabelege Yehova.”
18 Zakariya ohiloga dhahi na anju: “Ddinawodhe dhavi okaana ebaribari ya esodhá? Miyo ddili mwanakalaba, mwadhaga vina mwanakalaba.” 19 Anjuyá omwakula dhahi: “Miyo ddili Gabriyel vina ddili vamentoni va Mulugu, ddirumeliwe ologa na weyo wi dduwaddele miselu esi dhapama. 20 Ovano weyo kunalogege ofiyedha siku ninapadduwe esidhá, vowi kurumelile mazu aga anakwanihedheye vansakaniva ninga mpimeleliwani.” 21 Esi dhotene dhipadduwaga, nlogo nannimujedhavi Zakariya vina nantikina vowi wela ogonelawo osantuwariyuwá. 22 Mbudduweliye otakulu, iyene kawodha ologa na attuyá, venevo awene ahizinddiyela wi bali osantuwariyu wahona yotikiniha, mbwenyi Zakariyayá waloga na mada, vowi kawodha ologa. 23 Mwakwanelani malabo attomeliwiye mabasa mumparhani mwa Mulugu, ohiyelela vatakulu.
24 Mvirele malabo mang’onovi, mwadhiye Elizabeti okaana yari vina wakala wolapelana na attu mwari mwa myeri mitanu, vowi wanloga dhahi: 25 “Jijene eddikosele Yehova masaka abano. Iyene oddubuwela; wirele wi agomihe manyazo aga vari va attu.”
26 Mwakwanihedhiye myeri mitanu na mmodha, Mulugu omuruma anju Gabriyel sidadi y’o Galileya, murudda w’o Nazareti, 27 wa namwali wahamuziwile mulobwana, weddeleliwa* na Jozé wa ntakulu na Davidi, nzina na namwaliyá nàli Maria. 28 Mfiyedhiye vàliye, ohiloga: “Murenddele okale na weyo, weyo odhalile mahala, Yehova oli na weyo.” 29 Vano Maria otikina venjene sabwa ya mazu aye, atamelaga ononelamo yatapulela olejeliwa okule. 30 Anjuyá omwaddela dhahi: “Maria, kuwove sabwani omukoddelela murima Mulugu. 31 Kewa! Ovano weyo onele okaana yari vina onele ombala mwana, onamvahiwe nzina na Yezu. 32 Iyene onele okala munddimuwa, vina onakuweliwege mwana wa Namadhulu-dhulu, Yehova Mulugu onele omvaha mpaddo wa babe Davidi, 33 onele okala Mwene namukalakala wa ntakulu na Jakob vina Omwene waye kunagome-wene.”
34 Maria ohinvuza dhahi anjuyá: “Ejiya enawodheye dhavi vowi miyo kaddinagonaga na mulobwana?” 35 Anjuyá omwakula dhahi: “Muya wa Mulugu onele outitela vina guru ya Namawodha-wodha enoukunela ninga mundduri, nona ole onambaliwe onakuweliwege mukoddeli, Mwana Mulugu. 36 Ziwá vina wi mmudhawo Elizabeti ole oniliwa kambala, onele ombala mwana mukalabani mwaye, obu mweri wanotanu na mmodha. 37 Vowi kayiwo elobo enimurutxa Mulugu.” 38 Maria ohiloga dhahi: “Miyo ddili mudhari wa Yehova eddipadduwele ninga munlogelinyu.” Neji, anju obudduwavo, odhowa.
39 Masiku abale, Maria ovenya nowaguva, odhowa murudda womwangoni sidadi y’o Judá, 40 ofiya vatakulu va Zakariya vina omulejela Elizabeti. 41 Mmwiwale Elizabeti, Maria amulejelaga, mwana wali mbani mwaye olupa vina Elizabetiyá ohidhaleliwa muya wokoddela. 42 Okuwa na lizu noliba: “Worurihiwa ddi nyuwo vari va ayana, worurihiwa vina ddi mwana onambalinyu! 43 Gari gani enna miyo, ya odha woniwa na mayi wa Nabuyaga? 44 Vowi mwiwale miyo lizu na olejela wenyu, mwana mbani mwaga olupa n’ottaba. 45 Wohagalala ddi nyuwo muroromelile, sabwani dhotene dhaddeliwenyu na Yehova dhinele wakwanihedheya-wene.”
46 Maria ohakula: “Miyo* ddinomuttittimiha Yehova, 47 vina murima waga kunattiye omuttabela Mulugu, Mvuni waga; 48 vowi iyene ohona oviyeviha wa mudhari waye wa muyana. Oromana ovanene attu a malogo otene anele oddikuwela wohagalala, 49 sabwani Namawodha-wodha oddikosela dhilobo dhinjidhene vina nzina naye ttokoddela, 50 mwa maziza otene ttagaraga yaye onowawirela abale animova. 51 Iyene ohoniha owodha waye, ohattamagiha attu anna dhubuwelo dhabure mmurimani mwawa. 52 Ohatitiha vampaddoni attu owodha, ohaweliha oviyeviha; 53 oharubaliha na dhilobo dhapama abale anna dala vina oharuma odhowa madavi anna dhorela, 54 iyene odha omvuna mwimeleli waye Izrayel obuwelaga ttagaraga yaye, 55 emwireliye Abrahamu na ziza* naye dhahene ninga mwàpikirheliye azamani ehu okala-nokala-wene.” 56 Maria okala na iyene myeri miraru, mmaleliye ohiyelela vatakulu.
57 Mfiyedhe nsaka na Elizabeti obala, iyene ombala mwana wa mwana-mulobwana. 58 Anamwanddamani aye na amudhaye mwiwalani wi Yehova omweddela ttagaraga venjene, attaba na iyene. 59 Siku nanotanu noraru adhowa omutxetteliha mwanayá, vina afuna amvahe nzina na babe, Zakariya. 60 Mbwenyi maye ohiloga: “Nne! Iyene onakuweliwege Joau.” 61 Venevo awene ahiloga: “Weyo kunna munammudhi onna nzina-nene ntti.” 62 Ahinvuza babeya na mada wi aloge nzina gani niganvahiliye mwanayá. 63 Iyene okumbirha mwana-tabwa olebavo: “Nzina naye ddi Joau.” Venevo otene àlivo atikina. 64 Mudhidhene obo, mulomo waye ofuguwa, nlumi naye nitapuwa, oroma ologa amuttittimihaga Mulugu. 65 Anamwanddamani aye otene attiddiwa wova; yopadduwa eji ehiroma ologiwa murudda wotene wa Judeya. 66 Otene ewa eso, ankoya mmirimani mwawa alogaga: “Mwanayá oddu onakale ani?” Sabwani owodha wa Yehova wali na iyene.
67 Vina babe Zakariya wahidhala muya wokoddela baroma ovuhulela alogaga: 68 “Attittimihiwe Yehova Mulugu wa Izrayel, vowi ohang’ana wili nlogo naye vina ohadhelana ovuneya. 69 Iyene onidhelana mvuni wowodha,* odhile muzizani mwa Davidi mudhari waye, 70 dhahene ninga mwalogiliye na anamavuhulela aye awale, okoddela murima, 71 wila anivune mmadani mwa amwiddani ehu na otene annitxiga; 72 wi aneddele ttagaraga yapikirheliye azamani ehu vina wi obuwele nipagano nakosiliye, 73 nlibelo nikosiliye na muzamani wehu Abrahamu, 74 na onivaha gari ya omuttiddela mabasa ottittimiheya nihovaga elo, mmalelihu woboliwa mmadani mwa amwiddani ehu, 75 na weddeyana vina na oligana murima vamentoni vaye masiku otene a okalawo wehu. 76 Ovano, mwana-wé onele okuweliwa namavuhulela wa Namadhulu-dhulu; sabwani Yehova onele wuruma osogorho wi osasanyedhe dila dhaye, 77 vina waziwihe attu a nlogo nawo ononelamo wa ovuneya ondha mwa oleveleliwa wa dhottega dhawa, 78 sabwa ya supaje enddimuwa ya Mulugu wehu. Mwaha wa supaje eji, txeza ya membesi endhana odhulu enele onimoneya, 79 wila yàvahe txeza abale agilatile mwiddimani na mmuruntini muntota okwa, vina eneddihe dila ya murenddele.”
80 Mwanayá ohunuwa vina oliba na muya wa Mulugu, iyene okalavi mwiddeddereni ofiyedha siku nivyonihiliye vamentoni va nlogo na Izrayel.