1 Korinto
16 Ovano mwaha wa kobiri dhinfunenyu wavaha akoddeli, mufware malago avahilemi milogo dh’o Galásia. 2 Siku noroma na sumana dhotedhene, muttu ddi muttu, akoyevo kobiri dhaye bari ejile epuriliye wila vahikosiwe sokela miyo ddigafiya. 3 Ddigafiya wenewo ddinele waruma ena o Jeruzalemi wila adhowena kobiri evahilenyu na murima wotene, ddinàrume alobwana alogilenyu mmakartani wi munowaroromela. 4 Vano, egoneya wi jofuneya miyo vina odhowawo, ninele odhowa wenewo vamodha.
5 Mbwenyi ddinele odha ouwonaniwo ddigavira o Masedónia, sabwani ddinubuwela ddivire o Masedónia. 6 Txino, ddinele okala na nyuwo nsaka ning’onovi obe mpaka ovira nsaka noridha wila muddivelele vang’onovi mudila ddigadhowaga onfunemi. 7 Sabwani kaddinfuna ouwonani bahi ddigaviraga, ddinfuna ddikale na nyuwo nsaka ning’onovi, Yehova agafuna. 8 Vano ddinakalevi okuno o Éfezo mpaka ovira mattanga a Pentekosti, 9 sabwani ddivahiwa gari enddimuwa* ya wira mabasa aga. Mbwenyi akalawo attu enjene anddipambiha.
10 Timóteo agafiya wenewo, mmukamihedhe wi ahove agakala na nyuwo, sabwani onlaba mabasa a Yehova dhahene ninga miyo. 11 Nona ahikalewo muttu onimpwaza. Mmurume na murenddele wila adhe addifanye, sabwani ddinomujedhela vamodha na abali ena.
12 Apolo, mbalihu, ddihimudidela venjene wi adhe auwoneniwo vamodha na abali ena. Iyene kanadhe ovanene, mbwenyi onele odha mudhidhi wofwanyelela.
13 Mukale mento, mulibihege nroromelo nenyu, mulibe murima vina mulibegevi. 14 Dhotedhene dhinkosinyu, mukosege na okwela.
15 Ddikaana yowukokomezani, abali: Nyuwo munoziwa wi attu a ntakulu na Estéfana, baromile okala anamafwara o Akáia vina awene ahiviperhekela wakamihedha akoddeli. 16 Nyuwo vina mwawiwelelege s’ohapambiha attu ninga abo, vamodha na otene anlaba na guru dhotedhene akamihedhaga vamodha na awene. 17 Miyo ddihagalala venjene na odha wa Estéfana, Fortunatu na Akayiku, awene addikamihedha vaddiddi mudhidhi wahalinyu veneva. 18 Vowi awene addilibiha miyo vina ahulibihani nyuwo. Nona, mwarihege attu ninga abo.
19 Milogo dha Ázia dhinouperhekelani malejelo. Ákila na Priska vamodha na mulogo ontugumana vatakulu vawa, anouperhekelani malejelo na murima wotene, nyuwo anamafwara a Nabuya. 20 Abali otene anouperhekelani malejelo. Mulejelanege muttu na mukwaye na beju yobali.*
21 Ddi miyo Paulo onulejelani, ddinleba na mada aga.
22 Akala muttu kanimukwela Nabuya, agwihedhiwe ntowa. Nabuya wehu, mudhe! 23 Mahala a Nabuya Yezu, akale na nyuwo. 24 Okwela waga okale na nyuwo motene, muli mumodhani na Kristu Yezu.