Dhilebiwe na Mateu
1 Nivuru na mapadduwo* a Yezu Kristu,* mwana Davidi, mwana Abrahamu:
2 Abrahamu ombala Izaki;
Izaki ombala Jakob;
Jakob ombala Juda vamodha na abalaye ena;
3 Juda ohimutela Tamar ahimbala Perez na Zera;
Perez ombala Ezrom;
Ezrom ombala Ram;
4 Ram ombala Aminadabi;
Aminadabi ombala Nazom;
Nazom ombala Salmoni;
5 Salmoni ohimutela Rahab ahimbala Bowaz;
Bowaz omutela Ruti ahimbala Obed;
Obed ombala Jesé;
6 Jesé ombala Davidi odhile okala mwene.
Davidi na muyana wali mwadhi Uriya ahimbala Salomau;
7 Salomau ombala Roboau;
Roboau ombala Abiya;
Abiya ombala Aza;
8 Aza ombala Jozafáti;
Jozafáti ombala Jeorau;
Jeorau ombala Uziya;
9 Uziya ombala Jotau;
Jotau ombala Akaz;
Akaz ombala Ezekiya;
10 Ezekiya ombala Manasé;
Manasé ombala Amoni;
Amoni ombala Joziya;
11 Joziya ombala Jekoniya vamodha na abalaye ena nsaka nattukuleliwa ana Izrayel o Babilónia.
12 Mmalelani ottukuleliwa o Babilónia, Jekoniya ombala Salatiyel;
Salatiyel ombala Zorobabel;
13 Zorobabel ombala Abiyudi;
Abiyudi ombala Eliyakim;
Eliyakim ombala Azor;
14 Azor ombala Zadoki;
Zadoki ombala Akim;
Akim ombala Eliyudi;
15 Eliyudi ombala Eliyazar;
Eliyazar ombala Matan;
Matan ombala Jakob;
16 Jakob ombala Jozé mamuni wa Maria, mayi wa Yezu, onkuweliwa Kristu.
17 Maziza otene baba: Oromana Abrahamu ofiyedha Davidi, àli maziza 14; oromana Davidi ofiyedha ana Izrayel ottukuleliwa o Babilónia, àli maziza 14; oromana nsaka nifuruliwe ana Izrayel o Babilónia ofiyedha obaliwa wa Kristu, àli maziza 14.
18 Obaliwa wa Yezu opadduwile dhahi: Mudhidhi weddeleliwa Maria mayi wa Yezu na Jozé, Mariayá wahikaana yari na owodha wa muya wokoddela;* esodhá dhipadduwile aweneyá ahinatti otelana. 19 Vowi mamunaye Jozé wali muttu woligana murima, wahigana omuttiya moviteyani attawaga omutota manyazo vanamwinjini. 20 Mbwenyi obuwelagavi esodhá, anju wa Yehova* ohinfiyedha murohani, ohimwaddela: “Jozé, mwana Davidi, kuwove omuttukulela mwadhiyo Maria vatakulu-vawo, vowi yari eniyena kahiyo ya muttu, ewodheyile na muya wokoddela. 21 Iyene onele ombala mwana onamvahiwe nzina na Yezu,* vowi onele wawobolela attu a nlogo naye, dhottega dhawa.” 22 Esi dhipadduwele wi dhakwanihedheye esile dhalogile Yehova na namavuhulela waye, wi: 23 “Moone! Namwali ohimuziwile mulobwana onele okaana yari, ambale mwana onavahiwe nzina na Emanuwel,” nintapulela, “Mulugu Oli na Iyo.”
24 Muvenyele Jozé ohira dhahene ninga mwamwaddelele anju wa Yehova; iyene omuttukula mwadhiye, odhowana vatakulu-vaye. 25 Vano, Jozé kagonilena ofiyedha Mariayá ombala mwana onvahiliye nzina na Yezu.