2 Korinto

2 Ddigana wi dila yanawili enfuna miyo odha ouwonaniwo, ddihukubanyiheni. 2 Ddigaukubanyihani, bani onfuna okala wenewo wi addagalalihe, ahili abale àkubanyihilemi? 3 Esile dhulebeleni miyo, ddileli wi ddigafiya wenewo ddihikubanye mwaha wa abale afwanyela oddagalaliha, sabwani ddinokuluvela wi enddagalaliha miyo, enouwagalalihani vina nyuwo motene. 4 Vowi ddulebeleni na okubanya onddimuwa na oribiwa murima vina na mintori dhinjene. Kahiyo wila ddukubanyiheni, mbwenyi wi muziwe okwela onddimuwa onukwelanina miyo.

5 Akala muttu otota okubanya, kaddikubanyihile miyovi, mbwenyi oukubanyihani nyuwo vina—vano kaddinfuna ologetxa mwaha wa ejiya. 6 Osaddeyiwa oku okoseliwe mulobwana oddo na attu enjene, ohakwana, 7 vano enofuneya nyuwo, mmulevelele na murima wotene vina mumpangarhaze wila okubanya waye onattabwe. 8 Nona ddinoukokomezani wi monihe wi munomukwela. 9 Jijene yulebeleni miyo wi ddone akala munowoniha wi munowiwelela dhotedhene. 10 Akala munomulevelela muttu mwaha wa elobo-elobovi, miyo vina ddinomulevelela. Txibarene, elevelele miyo (akala ddilevelela elobo) ddireli wi murumeliwe vamentoni va Kristu, 11 wila nihipemberhiwe* na Satana, sabwani ninoziwa esile dhinfuna iyene.*

12 Mfiyedhe miyo o Tróade wi ddilaleye miselu dhapama mwaha wa Kristu, ddivahiwa gari ya wira mabasa a Nabuya.* 13 Murima waga kuwafwasile mwaha wa ohinfwanya mbalaga Tito. Venevo ddihapaganya abali a wenewo, ddidhowa o Masedónia.

14 Mbwenyi ddinomutamalela Mulugu, vowi mudhidhi wotene onoddisogorhela munviremi na Kristu ninga anyakoddo opemberha. Oziwa wa Mulugu ononukela pama, iyene onorumela mabasa animwirelihu wila àttukulele attu a mimburo dhotedhene wiwa onukela oku! 15 Iyo ninimulaleya Kristu, nili ninga yonukela vamentoni va Mulugu, onukela oku onowafwanya abale anavuneye na abale anatolotxiwe. 16 Mwa abale anatolotxiwe, onukela wokwa onadhowiha wukwani. Mwa abale anavuneye, onukela wa egumi onafwanyiha egumi. Bani onfwanyelela okosa mabasayá aba? 17 Iyo ninofwanyela, sabwani kanili anamaguliha* a nzu na Mulugu ninga munkosela attu enjene. Mbwenyi ninologa na ebaribari ninga arumiwi a Mulugu, ndde, vamentoni va Mulugu vina niveleliwaga na Kristu.