Dhilebiwe na Mateu

7 “Muttiye wattonga attu ena, wi nyuwo vina munadhe muttongiwe; 2 na muttongelo onattongana nyuwo attu ena, nyuwo vina munele ottongiwana; na mpimo ompimana nyuwo, munele opimeliwana vina. 3 Weyo onang’anela nni nani nili munintoni mwa mbalawo, oku ohonaga muri oli munintoni mwawo? 4 Obe onwodha dhavi ologa na mbalawo, ‘Kaddittiye ddiburutxemo nani nili munintoni mwawo,’ oku weyo buna muri munintoni mwawo? 5 Mugwarhagwambi wé! Karoma oburutxamo muri oli munintoni mwawo, dhawene onelege wona pama ogaburutxagamo nani nili munintoni mwa mbalawo.

6 “Kamwavahe anabwa dhattima dha Mulugu, kamurayilele guluwe myarha dhenyu dhattima* wi dhinadhe onyigala, dhigamala dhuzugunuweleni, dhulumeni.

7 “Kadidelani okumbirha munele ovahiwa; kadidelani otamela munele ofwanya; kadidelani okopela munele ofuguleliwa; 8 vowi ole onkumbirha onovahiwa, ole ontamela onofwanya, ole onkopela onofuguleliwa. 9 Bani mwa nyuwo oninvaha mwanaye nlugu, mwanayeyá agamukumbirha pawu? 10 Obe bani oninvaha mwanaye nowa, agamukumbirha oba? 11 Nona, akala nyuwo attu abure,* munowodha wavaha dhapama aninyu, kito Babinyu wa wirimu kanavahe dhilobo dhapama abale animukumbirha?

12 “Nona, dhotene dhinfunenyu wi mukoseliwege na attu ena, nyuwo vina mwakoselege awene. Txibarene, sisene dhinruma Nlamulo na Mizé na masunzihoyá a Anamavuhulela.

13 “Kavolowani musuwo mung’ono, sabwani musuwo munddimuwa vina dila enddimuwa dhinowattukulela attu wukwani, enji anvira mwenemo; 14 mbwenyi musuwo mung’ono vina dila eng’ono sinattukulela attu wigumini, ang’onovi banfwanya.

15 “Porhe-porhe na anamavuhulela a ottambi, anufiyedhani na ekalelo ya nibila oku mmurimani mwawa pulí merelo a mwiji. 16 Munele waziwa elani monaga merelo awa. Ngani enowodheya ohapa uva vamurini wa minga, obe enowodheya ohapa figu vamakupuni a minga? 17 N’ekalelo yakakene, muri wapama ombala milima dhapama, muri wabure ombala milima dhabure. 18 Kinwodheya-wene muri wapama obala milima dhabure, muri wabure obala milima dhapama. 19 Muri ohimbala milima dhapama, onogwaddiwa buponyedhiwa vamottoni. 20 Txibarene, nyuwo munele oziwa elani, monaga merelo awa.

21 “Onvolowa Mumweneni wa wirimu kahiyo ole onddikuwela, ‘Nabuya, Nabuya,’ onvolowamo ddule onira ofuna wa Babaga oli wirimu. 22 Siku-ntto enji anele ologa na miyo dhahi: ‘Nabuya, Nabuya, iyo kanilaleyile na nzina nenyu, kanittamagihile muya dhabure na nzina nenyu vina kanikosile matikiniho menjene na nzina nenyu?’ 23 Miyo ddinele wawakula: ‘Kadduziwileni-wene, kaddivenyelenivo, nyuwo munira dhotakala!’

24 “Nona, ole wetene oniwa masunziho aga avirihamo, onoligana na mulobwana wamalago, omagile nyumba yaye vamaluguni. 25 Muzogwe orubwa, minje dhitepuwela otakulu vina efwanyiwa pevo ya mutokora, mbwenyi nyumbayá kigwile, sabwani yamagiwe vamaluguni. 26 Vano wotene ole oniwa masunziho aga ahivirihamo, onliganihiwa na muttu wotowa malago, omagile nyumba yaye vamutxesani. 27 Muzogwe orubwa, minje dhitepuwela otakulu vina efwanyiwa pevo ya mutokora, mbwenyi nyumbayá ebwanyuwa, egwa yotene.”

28 Mmalele Yezu ologa dhotedhene esi, edhile opadduwa jawi muttitti walivo otikina na masunziho aye, 29 vowi iyene wasunziha ninga muttu wavahiwe owodha, ottiya ninga mwakosela anamasunziha magano awa.