Akadda Kolosi
4 Nyuwo anabuya a adhari, mwaweddihege adhari enyu n’opama vina n’oligana, vowi munoziwa wi nyuwo vina mukaana Nabuya oli wirimu.
2 Mudidelege olobela, mugakosa dhawene munokala txenjewa vina mutamalelege. 3 Munilobelelege vina iyo, wila Mulugu anivahe gari yolaleya nzu wi niwodhe ovuwiha yoviteya ya Mulugu mwaha wa Kristu, odduwene ofugeleliwe miyo mukambura, 4 wila ddiwodhe olaleya pama ninga munfuneliwana miyo.
5 Mweddegevi na zelu vari va attu ahinroromela, mulabagana pama mudhidhi wenyu.* 6 Mazu enyu akalege ozivela, olugiwa na mwinyu, wila muziwege omwakula muttu ddi muttu.
7 Tíkiko, mbalaga wokweleya, murumiwi wororomeleya vina onlabehuna mabasa vamodha mwa Nabuya, onele ouziwihani dhotedhene mwaha wa miyo. 8 Miyo ddinomuruma odha wenewo olinyu wila auziwiheni dhilihu vina apangarhaze murima wenyu. 9 Iyene ondha vamodha na Onezimu, mbali wororomeleya vina wokweleya, wakala wenewo na nyuwo; awene anele ouwaddelani dhotedhene dhimpadduwa okuno.
10 Aristarko ofugeliwe vamodha na miyo onouperhekelani malejelo vamodha na Marko mbali* wa Barnabé, (Marko, ddule ouwaddelileni iyo wi agadha wenewo ouwonani, mmwakele pama), 11 vamodha na Yezu onkuweliwa vina Justu, anouperhekelani malejelo. Aba baba atxetteliwe, babene alabile vamodha na miyo mabasa a Omwene wa Mulugu, awene addipangarhaza vaddiddi. 12 Epafra, mudhari wa Kristu Yezu wakala vamodha na nyuwo onouperhekelani malejelo, iyene onoulobelelani nyuwo na ntidi wila mukale owakwana vina mukane ebaribari yoliba ya esile dhotedhene dhinfuna Mulugu. 13 Miyo ddinomukalela namoona Epafra wi iyene onoulobelelani na ntidi nyuwo na abale ali o Laudiseya na o Hiyerápolis.
14 Luka, mbalihu wokweleya odduwene oli mediku, onouperhekelani malejelo vamodha na Demas. 15 Mwaperhekele malejelo aga abali o Laudiseya, mumperhekele malejelo vina Ninfa vamodha na mulogo ontugumana vatakulu vaye. 16 Mugamala wengesa karta eji, muperhekele mulogo w’o Laudiseya wila yengesiwewo, nyuwo vina mwengese karta endha o Laudiseya. 17 Mmwaddele dhahi Arkipu: “Tamela ottidda pama mabasa auvahile Nabuya, wila wakwanihe.”
18 Akelaní malejelo aga, ddi miyo Paulo, onleba na mada aga. Muhidduwale wi ddili wofugeliwene. Mahala a Mulugu akale na nyuwo.