1 Pedro
3 N’ekalelo yakakene, nyuwo ayana oteliwa, mwawiwelelege amamuninyu, wila akala awene kaniwelela nzu na Mulugu, mweddelo wenyu wapama wawodhihe wiwelela masiki muhilogilena elo, 2 sabwa ya awene wona merelo enyu okoddela na nrihona ninddimuwa. 3 Okoddela wenyu kukale wotakuluvi—na mattitti oluweya, wabala dhilobo dhisasanyedhiwe na woru obe guwo dha muttengo munddimuwa— 4 okoddela oko okale wa mmurimani, ohinoneya, ohinvudda, ononiwa na murima wofwasa vina wokurumuwa, sabwani okoddela oku okaana ttima enddimuwa vamentoni va Mulugu. 5 Ayana vina ororomela a masaka a mundduni amujedhela Mulugu, àbala dhahene, awiwelelaga amamunawa ahapambihaga, 6 ninga Sara wamwiwelela Abrahamu amukuwelaga nabuya. Weyo vina onele okala mwanayene ogadhowagavi okosaga opama vina ogahittiye opemberhiwa na wova.
7 N’ekalelo yakakene nyuwo vina alobwana mutelile, mudhowegevi mwaweddihaga* awadhinyu na nriho,* mwanonelagamo, mwattittimihege dhahene ninga yobo ehinrutxa onongeya, sabwani awene vina anele wakela mahala a egumi vamodha na nyuwo, mugahikose dhawene Mulugu kanavuruwanege malobelo enyu.
8 Nona, motene mukane yubuwelo mmodhene, mutanalegena, mukane okwelana w’obali, ttagaraga vina mukale woviyeviha. 9 Muttu agawirelani yabure, kammwiyihedhe yabure yakakene, mugaruwaniwa kamuruwane vina, ottiya ejo mwawirelege dhapama attu otene, vowi Mulugu oukuweleleni ejuwene, wila mwakele dhapama.
10 Vowi “ole onkwela egumi, vina onfuna okalawo masiku menjene n’ohagalala onofwanyela orabeliha nlumi naye ologa dhotakala vina attawihe mulomo waye ologa dhottambi. 11 Arabele wira dhabure, akosege dhapama, atamele murenddele vina eddegenavi. 12 Sabwani mento a Yehova anowawang’ana attu oligana, vina maru aye anovuruwana malobelo animukoselani na ntidi, vano Yehova onowawika ekotti abale ankosa dhabure.”
13 Txibarene, bani onaukoseleni yabure akala nyuwo munozuzumela wira dhapama? 14 Mbwenyi masiki mutabuwaga mwaha wa oligana, munele ohagalala. Vano kamovege esile dhinovani* vina kamuzuzume. 15 Mbwenyi mmuttittimihege Kristu ninga Nabuya mmurimani mwenyu, mukalaga omala-nawale wila mmwakule n’opama ole onuvuzani mwaha wa njedhelo nenyu, vano mwakulege n’okurumuwa vina na nriho ninddimuwa.
16 Mukane mubuwelo* wapama wila mudhidhi wotene onlogiwenyu bure, abale anulogani atoteye manyazo mwaha wa mweddelo wenyu wapama ninga anamafwara a Kristu. 17 Vowi japama otabuwa mwaha wa okosa dhapama, Mulugu agattiya wi ejoyá epadduwe, ehili otabuwa mwaha wa okosa dhabure. 18 Vowi Kristu oli woligana okwa dila modha bahi mwaha wa dhottega dha attu ahili oligana wila auttukuleleni wa Mulugu; iyene okwile na maningo a omuttu mbwenyi ohakela egumi na maningo omuyani. 19 Dhahene iyene odhowa olaleyela muya dhabure dhafugeliwe, 20 dhahamwiweleli Mulugu, mudhidhi wajedhiye n’ovilela oku Nowé amusasanyaga pangaya mwenemo mudhile ovuneya attu ang’onovi bahi, kuloga attu atanu na araru avuneyile mmanjeni.
21 Enligana na ejuwene ku obatizo, obatizo oku onouvunani ovanene mwaha wa ovenyihiwa mukwani wa Yezu Kristu. Obatizoyá kahiyo okoddelihiwa wa dhotakala dha maningo, mbwenyi omuloba Mulugu na mubuwelo* wapama. 22 Kristu oli omononi woja wa Mulugu, vowi owela wirimu, wenewo anju, onddimuwa na owodha wetene dhinomwiwelela.