Dhilebiwe na Mateu
15 Novenya Afarizi ena vamodha na anamasunziha magano adhana o Jeruzalemi amususela Yezu, ahinvuza: 2 “Anamasunza enyu anlupela nni magano a yeddelo ya attu a nsaka nawale? Motagiha, awene kannawa mada agafunaga oja.”
3 Iyene ohawakula dhahi: “Kito nyuwo munlupela nni dhoruma dha Mulugu, sabwa ya yeddelo yenyu? 4 Motagiha, Mulugu ohiloga dhahi, ‘Omurihe babo na mayo,’ vina ‘Onimuruwana babe obe maye, apiwe.’ 5 Vano, nyuwo munloga dhahi, ‘Onimwaddela babe obe maye eraga: “Dhotedhene dhinna miyo dhafunemi ouvahani ddinfuna ddimperhekele Mulugu,” 6 oddo kanfwanyela omuriha babe.’ N’eji nyuwo munopwaza nzu na Mulugu mwaha wa yeddelo yenyu. 7 Agwarhagwambi nyuwo, Izaiya ohivuhulela ebaribari yenyu mulogeliye: 8 ‘Nlogo ntti ninddittittimiha na mulomo bahi, mbwenyi murima wawa oli wolapelana na miyo. 9 Oddebedha wawa kampurana elo, vowi ansunziha magano a attu.’” 10 Nowidhawo oruma wi muttitti omwaddamele vina ohawaddela: “Kavuruwanani vina munonelemo entapulelani: 11 Enimukwaruliha muttu kahiyo ejile envolowa mwano mwaye, enimukwaruliha jijile enbudduwa mwano mwaye.”
12 Venevo anamasunza aye amususela amwaddela: “Munoziwa wi Afarizi akwakwattuwa n’esile dhilogilenyu?” 13 Yezu ohawakula: “Muri bu muri ohitxeyile Babaga oli wirimu onele odduliwa. 14 Kamwazuzumele. Abale aliba ohona, anaweddiha aliba ohona akwawa. Akala muttu wohona, onomweddiha muttu wohona mukwaye, oheli anogwela muttoloni.” 15 Pedro omwakula: “Munitapulelemo yoladdaniha eji.” 16 Yezu ohavuza: “Nyuwo vina kamunanonelamo? 17 Nyuwo kamunziwa wi dhotedhene dhinvolowa mwano, dhinvira mbani badhigomela oponddo? 18 Vano dhotedhene dhimbudduwa mwano dhinda mmurimani, sisuwene dhinimukwaruliha muttu. 19 Ninga motagiha, mmurimani munobudduwa dhubuwelo dhabure: Opanga, olupa matelo, ogonihana wonyakuwa,* wiya, ozivala na mazu onveyihana Mulugu. 20 Sisene dhinimukwaruliha muttu; mbwenyi onja ahinawile mada,* kankwarula.”
21 Yezu mvenyeliye venevale, odhowa elabo y’o Tiro na y’o Sidoni. 22 Muyana dhahi wa mukadda Fenísia wakala murudda obo, omususela akuwaga: “Nabuya, Mwana Davidi, muddeddele ttagaraga. Mwanaga wa mwana-muyana onotabutxiwa venjene na muya wabure.” 23 Yezu kamwakulile elo, nona anamasunza aye amususela, amukumbirha: “Kamurumeni-to adhowe, sabwani ononifwaravi akuwaga.” 24 Iyene ohawakula: “Ddirumeliwe mabila orimela a nlogo na Izrayel.” 25 Venevo muyanayá osusela vàliye, omukokorela amunlelaga: “Nabuya, kaddikamihedheni!” 26 Iyene omwakula dhahi: “Kinkala ottukula oja wa aima wavokela ana-anabwa.” 27 Iyene omwakula: “Ndde Nabuya, mbwenyi ana-anabwayá anoja dhimmottela mutxiddo mwa meza mwa anabuyawa.” 28 Yezu omwakula: “Muyana wé, nroromelo nawo tti ninddimuwa-nene; yireye ninga munfuneliwe.” Ovenyana venevale mwanayeyá ovulumuwa.
29 Mmalelani, Yezu ovenya, odhowa vakuvi na nyaza y’o Galileya, vasogorhova owela vamwangoni ogilati venevo. 30 N’eji, muttitti mwinjene odhana vàliye aragali, akwettenkwe, aliba ohona, aliba ohiloga na ena enjene, animperhekela, vina iyene wannavulumutxa. 31 Nona, muttitti wahitikina venjene awonaga aliba ohiloga alogaga, akwettenkwe avulumutxiwaga, aragali eddaga, aliba ohona onaga; venevo annimuttittimiha Mulugu wa Izrayel.
32 Yezu owakuwela anamasunza aye, ohawaddela: “Ddinowaweddela ttagaraga attu aba, vowi malabo mararu bali na miyo vina kanna yoja, kaddinfuna wattiya odhowa na dala, anadhe ahileye mudila.” 33 Anamasunza aye ahinvuza: “Mburo obu kunkaliwa, iyo ninafwanye wuvi oja onakwanele muttitti obu wotene wa attu?” 34 N’eji Yezu ohavuza: “Munna pawu ngasi?” Awene amwakula: “Tanu na bili na ana-oba ang’onovi.” 35 Mmaleliye okumbirha wi attu agilati, 36 ottukula pawu esile tanu na bili na obadhá, olobelela, ohagawela anamasunza aye, vina anamasunza aye aroma ogawela muttitti. 37 Otene aja, ahakwanana vina addoddela pedaso dhahalilevo, badhakwanela middanga dhinddimuwa* mitanu na minli. 38 Otene ajile, àli alobwana 4.000, ahikontariwaga ayana na aimayá. 39 Mpaganyeliye muttitti, owela mmwanddiyani ahabuwela kobela y’o Magadán.