Akadda Éfezo
6 Nyuwo aima, mwawiwelelege amambalinyu mowiwanana na ejile enfuna Nabuya, sabwani jijene eli yapama okosa. 2 “Omurihe babo na mayo,” ntti tti nlamulo noroma ninna yopikirhela eji: 3 “Wila dhotedhene dhuweddelegeni deretu vina mugonele mwilaboni.” 4 Nyuwo amambali, kamwasilidhihege aninyu, vano mwalelege vina mwasunzihege mufwaraga malago a Yehova.
5 Nyuwo adhari, mwawiwelelege abale analabelinyu mabasa vati apano oku mwattittimihaga vina mwawovaga na murima wotene ninga munimwiwelelinyu Kristu, 6 mbwenyi kahiyo bahi mugang’aniwaga wila mwazivelihe attu, ottiya ejo, mwawiwelelege ninga adhari a Kristu vina mukosege ejile enimuzivela Mulugu, na egumi * yenyu yotene. 7 Mukale adhari a murima wapama ninga munimulabela Yehova, ottiya attu, 8 vowi munoziwa wi Yehova onele omuttuvela muttu ddi muttu opama okosiliye, masiki akale mudhari obe furu. 9 Nyuwo vina anabuya a adhari, mwaweddihegevi adhari enyu n’opama muhatxutxaga, vowi munoziwa wi nyuwo vamodha na aweneyá munna Nabuya mmodha oli wirimu, iyene kanna nsakulano.
10 Mwakelege owodha ondha wa Nabuya, sabwani guru dhaye dhinddimuwa. 11 Mwabale dhipano dhotene dhowanana dhinuvahani Mulugu wila mukale oliba vina murabele mirega dha oswaga wa Ddiabo; 12 sabwani iyo kaninwana na attu, mbwenyi ninwana na aguvernu, asogorheli na alamuleli a elabo ejino eli mwiddimani vina ninwana na adomonyo enjene ali wirimu. 13 Nona mwabale dhipano dhotene dhowanana dhinuvahani Mulugu wi nigafiya siku nabure, muwodhe ovilela vina mugamala wira dhotedhene, mukale olibene.
14 Mukale oliba, mwabale muyununi sintu ya ebaribari; mwabale vina yabalo ya mujila embarela peto,* eli oligana, 15 vina mwabale mmanyaloni mwenyu sandáliya dha miselu dhapama dha murenddele, mukalaga omala-nawale wi mulaleye. 16 Ottiya ejo, muttukule ebarelo* enddimuwa eli nroromelo, wila muwodhe ottimihana mattere otene a motto a mwiddani. 17 Mmwabale mmusorhoni mwenyu kapaseti, oli ovuneya, muttukule vina supadda na muya, nili nzu na Mulugu, 18 lobelaganivi mweddihiwaga na muya wokoddela, mudhidhi bu mudhidhi mukosege malobelo na murima wotene. Dhawene munele okala mento mulobelagavi na murima wotene, mwalobelelaga akoddeli, 19 muddilobelele miyo vina wila Mulugu addivahe mazu aye wi mudhidhi onalogegemi, ddilogege ddihovaga elo; dhahene ddinele owodha oziwiha yoviteya ya Mulugu ya miselu dhapama. 20 Mulugu ddule oddirumile miyo ninga namalaleya wa miselu dhapama, jijene ekalele miyo womagiwene na kurenti. Nona muddilobelele wa Mulugu wila ddiwodhe olaleya miselu dhapama ddihovaga elo, ninga munfuneliwana miyo.
21 Tíkiko, mbalihu wokweleya vina murumiwi wororomeleya wa Nabuya onele ouwaddelani dhotedhene dhilimi vina onele ouziwihani mabasa ankosimi. 22 Nona ddinomuruma wenewo olinyu, wila adhe auziwiheni dhilihu, vina aupangarhazeni.
23 Murenddele, okwela na nroromelo nindha wa Mulugu Baba, vina wa Nabuya Yezu Kristu dhikale na abali otene. 24 Mahala a Mulugu akale na otene abale animukwela Nabuyehu Yezu Kristu na okwela ohimmala.