Dhilebiwe na Luka
2 Masiku abale Sézari Agusto ogwiha nlamulo na olebeliwa malogo otene a attu. 2 (Olebeliwa oku woroma okosiwe Kerinu bali governador w’o Síria.) 3 Otene adhowa olebeliwa, muttu-muttu sidadi yaye. 4 N’eji Jozé ovenya o Galileya sidadi ya Nazareti, odhowa o Judeya sidadi ya Davidi enkuweliwa Belemi, vowi wali mwana-mmudhi wa ntakulu na Davidi. 5 Odhowa olebeliwa vamodha na Maria wamutelileyi ninga mwalogeliwani, Mariayá wali vakuvi n’obala. 6 Bali wenewo, nifiya nsaka na Maria obala. 7 Iyene ombala mwanaye woroma wa mulobwana, ompopottela na guwo, omuginantiha munekiwa dhoja dha dhinama vowi kafwanyile mburo munakeliwa aleddo.
8 Ahikalawo akumbuzi àli muddabo ang’anelaga dhinama dhawa na mattiyu. 9 Momaguva anju wa Yehova ohattanyuwela, nttittimiho na Yehova nihamoneya venevo awene ahova venjene. 10 Vano anjuyá ohiloga: “Kamove ddidhele wulaleyelani miselu dhapama dhinattabiha attu a malogo otene. 11 Muhibaleliwa ddabuno mvuni mu sidadi mwa Davidi, oli Kristu Nabuya. 12 Ezinddiyeloyá jiji, munele onfwanya mwana opopotteliwe na guwo, oginantihiwe munttiyiwa dhoja dha dhinama.” 13 Mohigonela afiya anju enjene* a wirimu, avitaganyiha na anju ole, aroma omwibela Mulugu alogaga: 14 “Mulugu attittimihiwe wirimu, vati apano murenddele okale na attu anakweliye.”*
15 Anjuyá mwiyelelani wirimu, akumbuzi abale aroma ologa dhahi, muttu na mukwaye: “Ndoweni o Belemi none dhipadduwilewo esile dhiniziwihile Yehova.” 16 Adhowa momaguva, ahinfwanya Maria na Jozé, vina mwanayá baginantihiwe mpule munttiyiwa dhoja dha dhinama. 17 Monelani esi, aloga dhotene dhaddeliwani mwaha wa mwanayá oddule. 18 Otene ewale atikina vaddiddi na esile dhawaddele akumbuzi, 19 Maria oroma okoya dhotene dhewiye atanalelaga mmurimani mwaye. 20 Akumbuziyá ahiyela amuttittimihaga vina amutamalelaga Mulugu sabwa ya dhotene dhiwalani vina dhonilani, dhahene ninga mwaddeliwani.
21 Mfiyedhe siku nanotanu noraru, mudhidhi wotxetteliwa anvaha nzina na Yezu, nzina navahiwiye na anju ahinatti orumaliwa.
22 Ottiya ejo, mfiyedhe mudhidhi wokoddelihiwa dhahene ninga mwarumela Nlamulo na Mizé, Jozé na Maria amuttukulela o Jeruzalemi wila amperhekele Yehova. 23 Dhahene ninga mulebeliwani Munlamuloni na Yehova wila: “Aima otene alobwana oroma obaliwa anofwanyela operhekeliwa Yehova.” 24 Vina aperheka mukutto ninga mwarumela Nlamulo na Yehova: “Majiwa meli obe kangayiwa bili dhing’ono.”
25 Wahikalawo mulobwana dhahi o Jeruzalemi wakuweliwa Simeau, wali muligani vina wororomeleya; oddoya wanjedha opangarhaziwa wa Izrayel vina muya wokoddela wali na iyene. 26 Ottiya ejo, Mulugu wahimuziwiha na muya waye wokoddela, wi kanafiyedhe okwa ahinatti omona Kristu wa Yehova. 27 Nona na guru ya muya wokoddela, ovolowa mumparhani; mudhelina Jozé na Maria, Yezu wila akose dharuma Nlamulo, 28 iyene omuttukula mwanayá mmadani, omuttittimiha Mulugu alogaga: 29 “Ovano Nabuya Wowodha-wodha, munomuttiya mwimeleli wenyu okwa na murenddele dhahene ninga mwalogilenyu, 30 sabwani ddimona mvuni omurumilenyu, 31 odduwene omurumilenyu vamentoni va malogo otene, 32 txeza engomiha eddima enakunela attu na nttittimiho na ana Izrayel, nlogo nenyu.” 33 Babe na maye antikina sabwa ya dhotene dhalogiwa addiwagana iyene. 34 Ottiya ejo Simeau oharuriha vina ohiloga dhahi na Maria mayi wa mwanayá: “Kavuruwana! Mwana oddu onakale nipara nokwakwattutxa vina na ovenya wa enjene a mu Izrayel, onakale ezinddiyelo enalogiwege na otene 35 (vano mwa weyo onele okubanya ninga olatiwe na supadda ninddimuwa), wi dhoneye dhubuwelo dha mmirimani mwa attu enjene.”
36 Wahikala vina namavuhulela wa muyana wakuweliwa Ana, mwana Fanuwel wa ziza na Aser; muyana oddu wali wawunuwelavo vina muteleliwiye* okalile na mamune vyaka tanu na bili bahi, 37 iyene wali mamukwela wanna vyaka 84 dhobaliwa. Mudhidhi wotene wakala mumparhani attiddaga mabasa a Mulugu mattiyu na mutana, attugaga vina alobelaga. 38 Mudhidhi obule iyene osusela valani oroma omutamalela Mulugu, awaddelaga mwaha wa mwanayá otene abale ajedhela ovuneya wa Jeruzalemi.
39 Dhahene mmalelani wakwanihedha dhotene dharuma Nlamulo na Yehova, ahiyelela o Galileya, sidadi y’o Nazareti. 40 Mwanayá wannunuwa na guru, na zelu vina Mulugu walivi na iyene.
41 Vyaka dhotedhene amambali aye andhowa o Jeruzalemi oja mattanga a Paskwa. 42 Mwakwanihedhiye vyaka 12 dh’obaliwa, awene adhowa omattanganiwa ninga mwalemelelani. 43 Mugomeli mattanga abale, awene aroma okosa oleddo wa wiyela, vano muzombwe Yezu ohala o Jeruzalemi, amambali aye ahiziwaga. 44 Obuwelaga wi iyene wali na nikuru nina, neyelanina vamodha, akosa oleddo wa siku nimodha, mmalelani aroma omutamela mwa amudhawa vina mwa akwawa. 45 Mbwenyi vonilani wi kanfwanyile ahiyelela o Jeruzalemi, afwaseyela omutamelawo. 46 Mvirele masiku mararu, ahinfwanya mumparhani bagilatile vari va anamasunziha, àvuruwanaga vina àkosaga mavuzo. 47 Otene anvuruwana antikina na zelu dhaye vina na dhowakula dhaye. 48 Venevo amambali a Yezu atikina mmonelani, mamayaye ologa: “Mwanaga okoseleni esidhá? Babo na miyo nàli ozuzumene nutamelaga.” 49 Venevo iyene ohiloga: “Mwadditamelela nni? Kamunziwa wi ddinofwanyela okala vatakulu va Babaga?” 50 Vano kanonelimo yatapulela dhalogiye.
51 Mmalelani Yezu ohiyelela o Nazareti na amambalaye vina wannawiwelelavi ahapambihaga. Ottiya ejo, mamayaye wankoya mmurimani mwaye dhotene. 52 Yezu wannunuwavi na malago vina na guru, Mulugu na attu anziveliwana.