1 Tesalónika

1 Miyo Paulo, Silvano na Timóteo ninoulebelani nyuwo a mulogo w’o Tesalónika muli mumodhani na Mulugu Baba vamodha na Nabuya Yezu Kristu:

Mukane mahala a Mulugu vina murenddele.

2 Ninomutamalela Mulugu mudhidhi wotene onuwubuwelani iyo mmalobeloni mwehu, 3 vowi nigakala vamentoni va Mulugu wehu vina Baba, ninouwubuwelani mwaha wa mabasa enyu ororomeleya, ninowubuwela vina guru ekosilenyu na okwela vina ovilela wenyu mwaha wa omujedhela Nabuyehu Yezu Kristu. 4 Nyuwo abali munkweliwa na Mulugu, iyo ninoziwa wi iyene ousakulani, 5 sabwani kanulaleyileni miselu dhapama na mazu bahi, mbwenyi nihulaleyelani nikamihedhiwaga na muya wokoddela na guru vina na nikuluvelo ninddimuwa; miselu dhehu dhihukamihedhani venjene, nyuwo munoziwa mikalelo dhonihilehu mudhidhi walihu na nyuwo nirelaga opurelamo wenyu. 6 Nyuwo munitagiha vina mumutagiha Nabuya, vowi muhirumela nzu na ohagalala onddimuwa ondha na muya wokoddela, masiki vatabuwenyu venjene. 7 N’eji nyuwo mukala yotagiha ya otene aninfwara Yezu, ali o Masedónia na ali o Akáia.

8 Pumwenemo, nyuwo kamulaleyile nzu na Yehova o Masedónia na o Akáia bahi, mbwenyi mulaleya dhipaddi dhotedhene, vina attu a dhipaddi dhotedhene ahiwa omuroromela wenyu Mulugu, nona kaninna yina yologa. 9 Txibarene attu anologa anyene mwaha wa dila yoroma egumanilehu na nyuwo o Tesalónika, anologa vina mukalelo wattiyilenyu amulugu a ottambi wi mukale adhari a Mulugu oliwo vina webaribari, 10 wila mmujedhele Mwana Mulugu, odduwene ondha wirimu vina ovenyihiwe mukwani, kuloga, Yezu onanivune na owali wa Mulugu ondha.