Ovuhulela wa Joau

11 Venevo ddivahiwa murazi waladdana na muri* oku iyene addaddelaga: “Kavenya, opime santuwariyu wa mparha wa Mulugu vamodha na ebuwayá, waapime vina abale anebedhamo. 2 Vano, epaddi ya otakulu ya santuwariyu wa mparha ottiye dhawene vina kupime, sabwani evahiwa attu a malogo, abo anele onyigala sidadi yokoddela mwa myeri 42. 3 Ddinele waruma anamoona aga eli wila avuhulele mwari mwa malabo 1.260 babalile saku.” 4 Abo anladdanihiwa na miri minli dha olivera vina na panti bili dhinddimuwa, ali owimelene vamentoni va Nabuya wa elabo ya vati.

5 Agakalawo muttu onfuna wawirela yabure, mwano mwawa munele obudduwa motto onatolotxe amwiddani awa. Agakalawo muttu onfuna wawirela yabure, onakwe dhahene. 6 Awene akaana owodha wa ofuga odhulu* ofiyedha ohirubwa muzogwe masiku otene anvuhulelani, vina akaana owodha wa osaddula manje bakala nikami vina otabutxa elabo ya vati na ezini ji ezini dila dhotene dhinfunani.

7 Agamala ovaha onamoona, enama yowopiha embudduwa mutxelani movaya* enele owana na awene, wapemberha vina wapa. 8 Miruttu dhawa dhinele okala rampa enddimuwa ya sidadi enddimuwa epiwe Nabuya wawa vapingirhizini. Sodoma na Ejipitu dhintonya sidadi ejo. 9 Attu a malogo, mahimo, dhilogelo na dhilabo anele wang’ana miruttu dhawa mwa malabo mararu na meya, kinarumelihiwe wi miruttu dhawa dhikiwe mwikuttani. 10 Abale ankala velaboni ya vati anele ottaba mwaha wa okwa wawa, anele oja mattanga vina operhekelana mivaho muttu na mukwaye, vowi anamavuhulela aba eli annatabutxa abale ankala velaboni ya vati.

11 Mvirele masiku abo mararu na meya, Mulugu ohavaha muya wa egumi, venevo awene ahimela vina abale àwonile attiddiwa wova onddimuwa. 12 Awene ahiwa lizu noliba nadha wirimu nawaddelaga: “Kawelani okuno.” Awela wirimu mmiraboni, amwiddani awa ahawona.* 13 Mudhidhene obo, opadduwa ottekenyeya ondddimuwa wa mattaka, epaddi yanokumi ya sidadi egwa; attu owakwana 7.000 akwa na ottekenyeya oko wa mattaka, awinjivayá ahova vina amuttittimiha Mulugu wa wirimu.

14 Moone! Ntowa nanawili nivira. Ntowa nanoraru ninodha momaguva.

15 Anju wanotanu nawili omoba parhaza waye. Wirimu ohiweya malizu oliba alogaga: “Omwene wa elabo okala Omwene wa Nabuya wehu na wa Kristu waye, vina iyene onelege olamulela okala n’okala-wene.”

16 Anddimuwa 24 àli ogilatene mmipaddoni mwawa vamentoni va Mulugu, akokora atibelaga kove dhawa vati vina amwebedha Mulugu, 17 alogaga: “Ninoutamalelani nyuwo Yehova Mulugu, Namawodha-wodha, ole onkalawo, wali, vowi muttukula owodha wenyu onddimuwa vina muroma ottonga ninga mwene. 18 Vano attu a malogo asilidheya vina odha owali wenyu, ofiya mudhidhi wapimeleliwe wi aliba okwa attongiwe vina mwattuvele adhari enyu, anamavuhulela vamodha na aroromeliyá,* abale anova nzina nenyu, aima vamodha na anddimuwaya, vina wila mwatolotxe abale antolotxa elabo ya vati.”

19 Venevo santuwariyu wa mparha wa Mulugu oli wirimu ofuguliwa, vina musantuwariyuni mwa mparha muhoneya yobo ya nipagano naye. Vina wahikala ozerima, ohiweya malizu, oruma wa jayi, ottekenyeya wa mattaka vina maralala menjene.