Merelo a Arumiwi
12 Nsakanene nttile, mwene Herodi oroma watabutxa attu ena a mmulogoni. 2 Iyene ohimpiha na supadda Tiago mbali wa Joau. 3 Moneliye wi esidhá dhanazivela Ayuda, ohimmagiha vina Pedro, (esidhá dhipadduwile masiku ajiwa Pawu Dhotowa Emela.) 4 Iyene omuttidda vina ohinfugeliha mukambura, aperhekelaga makuru manayi a anyakoddo amwang’anela, nikuru-nikuru nana anyakoddo anayi; wafuna wi àperhekele attu a nlogo* Paskwa agamala. 5 Vano Pedro balivi mukambura wofugeliwene, mulogo wandidela omulobelela Mulugu mwaha waye.
6 Herodi wannubuwela omperheka Pedro; omattiyu-wene obule Pedro wela ogona bamagiwe na kurenti bili vari va anyakoddo eli, vina osogorho wa musuwo wahikala ang’aneli ang’anela kamburayá. 7 Morurumutxa-mwene, anju wa Yehova ofiyavo, txeza emoneya mukamburamwá, anjuyá omuddiginya Pedro, ohinvenyiha alogaga: “Kavenya nowaguva!” Venevo kurenti dhamagiweyina mada dhimotta. 8 Anjuyá omwaddela: “Kàbala guwo na sandáliya dhawo.” Iyene ohabala. Omamalelowa iyene ohilogana: “Kàbala mukumi wawo, oddifwarege.” 9 Venevo iyene ovenya, oroma omfwara; vano kaziwa wi esile dhapadduwa modhela anju dhali dhebaribari. Txibarene iyene wobuwela wi onoroha. 10 Avira mburo woroma wa ang’aneli, wanawili, afwanya musuwo munddimuwa wa fero wattukulela musidadimwá; musuwoyá ofuguwa woka. Mmalelani obudduwa, afwara dila vina momaguva anjuyá omuttiya. 11 Pedro munoneliyemo dhapadduwa, ohiloga dhahi: “Ovano ddihiziwa, kaddinaganyedha wi Yehova omuruma anju waye vina oddivuna mmadani mwa Herodi na dhotene dhajedhela nlogo na Ayuda wi dhipadduwe.”
12 Mmaleliye ononelamo eso, odhowa vatakulu va Maria mayi wa Joau waziwiwa na nzina na Marko; vatugumanile anamasunza enjene, alobelaga. 13 Mvadeliye musuwo munddimuwa wa vamavolowelo, mudhari dhahi wa muyana wakuweliwa Rode odhowa omona bani wavada musuwoyá. 14 Muzinddiyeliye lizu na Pedro oziveliwa venjene ofiyedha ohifugula musuwoyá, mbwenyi ottamagela mba, odhowa wawaddela wi Pedro wali vamusuwo. 15 Awene ahiloga: “Weyo ohitadduwa.” Mbwenyi mudhariyá wandidela ologa wi ebaribari. Awene anloga: “Oddo ddi anju waye.” 16 Vano Pedro ohimelavi avadaga musuwo, mfugulelani vina amona Pedro, atikina. 17 Pedro ohikosa ezinddiyelo na mada wi àmalihe, ohawaddelelamo dhotene dhakosile Yehova wi amburutxe mukambura vina ohiloga: “Mmwaddele esidhá Tiago na abali ena.” Dhahene ohibudduwavo, odhowa mburo mwina.
18 Muyele vati anyakoddoyá àli ozuzumene avivuzaga txini yampadduwele Pedro. 19 Herodi ofwaseyela omutamela vano ninga kanfwanyile, ohavuza ang’aneliyá vina oruma wi adhowe atxinutxiwe; mmaleliye obudduwa o Judeya, odhowa o Sezareya vina okala wenewo mudhidhi mung’onovi.
20 Herodi wahisilidhiwa venjene* na attu o Tiro na o Sidoni, anya a dhilabo eso agula dhoja sidadi dhalamuleliwa na Herodi. Awene ahiwanana, adhowa ologa na Blastu odduwene wali mwimeleli wa ntakulu na Herodi. 21 Siku dhahi, Herodi ohabala guwo dh’omwene, ogilati va tribunali vina oroma ologa osogorho wa attu otene. 22 Dhahene attu atugumanilevo aroma okuwa eraga: “Lizu ntto tta mulugu, kahiyo na muttu!” 23 Mudhidhene obo anju wa Yehova omugwihedha eredda Herodi, sabwani kamuttittimihile Mulugu, iyene ohijiwa mittipa vina ohikwa.
24 Nzu na Yehova nammwadheya vina attu enjene anrumela.
25 Mmalele Barnabé na Saulo ogomiha mabasa awa okamihedha o Jeruzalemi, ahiyela vina amuttukula Joau waziwiwa na nzina na Marko.