2 Timóteo

1 Miyo Paulo, murumiwi wa Kristu Yezu na ofuna wa Mulugu mwaha wa nipikirhelo na egumi nindha mwa Kristu Yezu, 2 ddinomulebela Timóteo, mwanaga wokweleya:

Okaane mahala, ttagaraga na murenddele ondha wa Mulugu Baba na Kristu Yezu Nabuya wehu.

3 Ddinomutamalela Mulugu onimulabelimi mabasa, dhahene ninga mmulabelile mabasa azamani aga na mubuwelo* wotxena vina mudhidhi wotene ddinouwubuwela mmalobeloni mwaga, ankosimi na ntidi mattiyu na mutana. 4 Ddigobuwelaga mintori dhawo, ddinofuna venjene ouwona wila oddittabihe venjene. 5 Sabwani ddinowubuwela nroromelo nawo n’ohipela malago, nroromelo nakakene nana bibo Lóide na mamayawo Eunise. Ddinokuluvela wi weyo vina okaana nroromelo ntto.

6 Nona, ddinfuna dduwubutxedhe wi ogasele ninga motto mvaho wa Mulugu wakelilewe votapulelimi mada aga. 7 Txibarene, muya wokoddela onivahile Mulugu kunnoviha, mbwenyi ononivaha owodha, okwela vina wubuwela na malago. 8 Kukanele manyazo olaleya mwaha wa Nabuya wehu vina kuddikanele manyazo miyo, ofugeleliwe mwaha waye. Vano okuluvelaga guru ya Mulugu, ovilelege makattamiho mwaha wa miselu dhapama. 9 Iyene onivuna vina onikuwela wi nikale akoddeli, ottiya mwaha wa merelo ehu mbwenyi mwaha wa efunelo vina mahala aye. Ovenyana masaka a wale Mulugu onivaha mahala aye mwa Kristu Yezu, 10 ovano mahala abo a Mulugu ahoneya mwaha wa Mvuni wehu, Kristu Yezu, iyene ohigomiha okwa vina ononiha mwaha wa miselu dhapama wi okaana egumi vina maningo ahinvudda. 11 Miyo ddirumiwa ninga namalaleya, murumiwi vina namasunziha wa miselu eso dhapama.

12 Nona miyo vina ddinotabuwa mwaha wa dhilobo esi, mbwenyi kaddinkanela manyazo. Vowi ddinomuziwa Ole onimuroromelimi vina ddinokuluvela wila iyene onele owodha okoya ejile emuttiyedhimi ofiyedha siku ntto ninadhiye. 13 Ohittiye ofwara mazu apama ewaliwe na miyo na nroromelo vina okwela ondha mwaha wa okala mumodhani na Kristu Yezu. 14 Okoye dhilobo esi dhattima enddimuwa, esuwene dhakeliliwe na muya wokoddela, oli mwa iyo.

15 Weyo onoziwa wi otene a provinsia ya Ázia addinyanyala vamodha na Figelo na Hermógenes. 16 Nabuya aweddele ttagaraga attu a ntakulu na Onezíforo, vowi iyene oddipangarhaza dila dhinjidhene vina kakanile manyazo mwaha wa ofugeliwa waga. 17 Mottiyana-mwene, mudhidhi waliye o Roma, wahifwaseyela odditamela vina oddifwanya. 18 Nabuya Yehova amweddele ttagaraga siku ntto ninadhe. Weyo onoziwa wila iyene oddittiddela mabasa menjene o Éfezo.