Ovuhulela wa Joau

4 Mmalele esidhá, ddihona musuwo wofuguwene wirimu, vina lizu noroma niwalimi naloga na miyo nàli ninga oruma wa parhaza, lizuna nihiloga: “Kawela okuno, ddinele wulagiha dhilobo dhinfuna wireya.” 2 Mmalele eso momaguva-mwene ddihakela muya wokoddela, ddihona mpaddo wirimu vina ddimona muttu wagilatile vampaddoniva. 3 Ole wagilatile vampaddoniva wahikana ekalelo ya malugu a jaspe vina a sardio,* mpaddoya wahirugunuwiwa na musilibo* wanna ekalelo yoladdana na esmeralda.

4 Dhahikalawo mipaddo dhina 24, dharugunuweli mpaddoya obo, esuwene dhagilateliwe na anddimuwa 24, abalile guwo dhotxena vina anna mwereko dha woru. 5 Vampaddoniva vannoneya ong’anima wa jayi, malizu, na oruma wa jayi; dhahikalavo panti dhinddimuwa tanu na bili dhattidda vampaddoniva, panti eso dhintonya muya mitanu na minli dha Mulugu. 6 Osogorho wa mpaddoyá wahikala elobo yaladdana na nyaza ya manje a viduru, ninga kristal.*

Vari va mpaddo vina orugunuwa mpaddoyá dhahikalawo dhottanddiwa nayi dhinna egumi dhadhalile mento osogorho na mundduni. 7 Yottanddiwa yoroma enna egumi yaladdana na poddogoma, yottanddiwa yanawili enna egumi yaladdana na mwana-ng’ombe, yottanddiwa yanoraru enna egumi yahikana kove enladdana na ya muttu, yottanddiwa yanonayi enna egumi, yaladdana na epungu evavaga. 8 Mwa dhottanddiwa dhonayi dhinna egumi, yottanddiwa modha-modha enna egumi, yahikana makapwa matanu na nimodha vina yahidhala mento. Mutana na mattiyu dhinokuwa dhihimàlaga, dhilogaga dhahi: “Wokoddela, wokoddela, wokoddela ddi Yehova Mulugu, Namawodha-wodha, ole waligi, ole oliwo vina ole onadhe.”

9 Mudhidhi wotene oninvaha dhottanddiwa dhinna egumi, nttittimiho, nriho vina onimutamalelani Ole ogilatile vampaddoni, Ole onkalawo okala n’okala-wene, 10 anddimuwa 24 anokokora vamentoni va Ole ogilatile vampaddoni, anomwebedha Ole onkalawo okala n’okala-wene vina anottiya mwereko dhawa osogorho wa mpaddo alogaga: 11 “Ddi nyuwo, Yehova Mulugu wehu, onfwanyelela wakela nttittimiho, nriho, owodha, sabwani muttandda dhilobo dhotedhene vina na ofuna wenyu dhotedhene dhikalawo vina dhittanddiwa.”