1 Korinto
6 Akala munokana muladdu na mbali, mundhowelanani muladduyá ottongiwa otribunali na attu ahiniwelela malamulo a Mulugu, ottiya odhowa ottongiwa na akoddeli a mmulogoni? 2 Txibarene nyuwo munoziwa wi akoddeli anele ottonga elabo. Kito, akala munele ottonga elabo, kamunwodha ottonga makani mang’ono? 3 Kamunziwa wi ninele wattonga anju? Akala eli dhawene, munkoddelani ottonga makani mang’ono ampadduwa mwilaboni? 4 Akala mukaana muladdu onfunenyu wi ottongiwe, munatamelelani abale ahinrumeliwa na mulogo wi auttongeni? 5 Ddinlogela ejo wi ddutoteni manyazo. Koddi vari venyu kavo muttu onna eziwelo ya wattonga abali? 6 Ottiya ejo, mbali onomuttukulela mbali mwina otribunali wi attongiwe na attu ahinroromela!
7 Txibarene, oku ogonjihiwa wenyu, mugattukulelagana otribunali mukalelinyu. Kigakalile yapama opujeya? Kigakalile yapama oputtuleya? 8 Ottiya ejo, nyuwo munowapuja vina munowaputtula abalinyu!
9 Obe kamunziwa wi abale anira dhohiligana kanavolowe Mumweneni mwa Mulugu? Kamunyengetteye.* Abale anira dha ogonihana wonyakuwa,* anebedha dhingamuttu, anlupa matelo vina abale angonihana alobwanavi,* 10 ambava, aliba nrima, anamalezela, anamaruwana, abale anatxutxa attu wi attukule dhili dhawa, kanavolowe Mumweneni mwa Mulugu. 11 Jijuwene yali nyuwo wale, ovano nyuwo mumala osuwiwa, mumala okoddelihiwa, mumala wiriwa aligani na nzina na Nabuya wehu Yezu Kristu, na muya wa Mulugu wehu.
12 Miyo ddinorumelihiwa okosa dhotedhene, mbwenyi kahiyo dhotedhene dhimpuriha, miyo ddinorumelihiwa okosa dhotedhene, mbwenyi kaddinattiye weddihiwa na elo. 13 Yoja ekoseliwe nipu, vina nipu nikoseliwe yoja, mbwenyi Mulugu onele ogomiha-mugomihedho dhobili. Maningo kakoseliwe ogonihana wonyakuwa, * akoseliwe Nabuya, Nabuya ddi mwinya wa maningo. 14 Mulugu ohinvenyiha Nabuya, onele onivenyiha iyo vina mukwani na owodha waye.
15 Kamunziwa wi maningo enyu, vyano dha Kristu? Kito egahikala miyo ottukula vyano dha Kristu ddigumaniha na jeberuwa? Nne, kigakalile-wene! 16 Kamunziwa wi ongona na jeberuwa onkala nningo nimodha? Sabwani Mulugu ohiloga: “oheli” anakale “nningo nimodha.” 17 Vano ole oli mumodhani na Nabuya, onkaana yubuwelo yakakene na ya Nabuya. 18 Muttawe ogonihana wonyakuwa!* Yottega ji yottega enkosa muttu kintakaliha maningo aye, mbwenyi ole onira dha ogonihana wonyakuwa, onottegela maningo aye. 19 Kamunziwa wi maningo enyu mparha wa muya wokoddela oli mwa nyuwo, ovahiwenyu na Mulugu? Nyuwo muli attu a Mulugu, 20 sabwani Mulugu oupitxelani muttengo munddimuwa. Nona mmuttittimihe Mulugu na maningo enyu.