Akadda Kolosi
3 Vano, akala muvenyihiwa mukwani na Kristu, mutamelegevi dh’odhulu oli Kristuyá wogilatene omononi woja wa Mulugu. 2 Mubuwelege esile dhili dh’odhulu, ottiya dha vati apano. 3 Sabwani nyuwo mukwa vina egumi yenyu evitiwa vamodha na Kristu, vowi ejo enowiwanana na ejile enfuna Mulugu. 4 Kristu, egumi yehu, agadha, nyuwo vina munele woneya vamodha na iyene na nttittimiho.
5 Mupe vyano dha maningo enyu mwaha wa ogonihana wonyakuwa,* dhotakala, wunlela ogonihana, dhifunelo dhabure, nrima, dhili webedha dhingamuttu. 6 Mulugu onowakanela owali abale ankosa esene. 7 Nyuwo vina wale mwedda dhahene, mukosaga dhilobo eso dhotakala.* 8 Ovano munofuniwana orabela esi dhotedhene: Owali, osilidhiwa, obure, oruwana, vina mwano mwenyu kamubudduwe mazu ovadda. 9 Kamuzivalelegena muttu na mukwaye. Murule mweddelo wa wale vamodha na mereloyá, 10 mwabale omuttu oswa okuwene onkalihiwa muswa na eziwelo ya ebaribari, onligana na omuttu wa Mulugu ottanddiliye, 11 na omuttu oku oswa, kawo Mugregu, Muyuda, wotxetteliwa, wohitxetteliwa, mwana-wedda, Sita,* mudhari nne furu, mbwenyi Kristu ddili otene mwa dhotedhene.
12 Vowi nyuwo musakuliwa na Mulugu ninga attu okoddela vina okweliwa, muttukule yeddelo ya ttagaraga, opama, oviyeviha, okurumuwa na ovilela. 13 Mvilelanege muttu na mukwaye vina mulevelelanege na murima wotene muttu na mukwaye, masiki mugaziwa wi muttegeliwa. Dhahene ninga Yehova ouleveleleni na murima wotene, nyuwo vina mukosege yakakene. 14 Opitta dhotedhene, mulagihege* okwela, sabwani okwela onowakwaniha wiwanana wa attu.
15 Vina, mureddele wa Kristu weddihege mirima dhenyu, vowi nyuwo muhikuweleliwa murenddele obo, wi mukale nningo nimodha. Mukale attu otamalela. 16 Mazu a Kristu akale na nyuwo, auvaheni ononelamo wotene. Muhitxelele osunzihagana vina olibihagana* muttu na mukwaye na masalmo; munvuwihaga Mulugu na jibo dhomuttittimihana vina dhomutamalelana. Mmwibelege Yehova na murima wenyu wotene. 17 Dhotedhene dhinkosinyu, na mazu obe na merelo, mukose dhotene na nzina na Nabuya Yezu, mmutamalelaga Mulugu oli Babi na nzina naye.
18 Nyuwo ateliwi, mwawiwelelege amamuninyu muhapambihaga, dhahene ninga munfunela Nabuya. 19 Nyuwo amamuni, mwakwelegevi awadhinyu vina muhawobelege owali. 20 Nyuwo aima, mwawiwelelege amambalinyu mwa dhotedhene, sabwani jijene enimuzivela Nabuya. 21 Nyuwo amambali, kamwasilidhihege* aninyu, wi awene ahojeye.* 22 Nyuwo adhari, mwawiwelelege anabuyenyu analabelinyu mabasa vati apano mwa dhotedhene, kahiyo bahi mugang’aniwaga, wila mwazivelihe attu; mbwenyi mwawiwelelege na murima wapama, mwaha wa omova Yehova. 23 Dhotene dhinkosinyu, mulabe na murima wotene ninga munimukosela Yehova, ottiya attu, 24 sabwani munoziwa wi ddi Yehova onauttuveni, auvahagani dhohalana dhakoyeliye attu aye. Mulabe ninga adhari a Nabuya, Kristu. 25 Txibarene, onira yabure, onele ottuveliwa obure waye, sabwani kavali nsakulano.