NIPADDUWO 8
Mikango Velaboni Ya Vati
KOWILIWA muthu muthuvi onoweedda bagodheela nanda iyeneya ddolapa ninga omusathini wa numba yawo, ogoonilemo dhavi? Muthu oddo agakalile mukango! Nsaka dhahi velaboni ya vati vaahikalaga wene mikango. Bibilia onolagiha wila ababi awa aali angelo aadhile odhulu. Eji egakalile dhavi?
Kobuwela wila, mungelo wabure Satana wahididela okosa makathamiho. Iyene wahifiyedha otamela wakosiha angelo a Mulugu okala abure. Na mudhidhi, ena mwa angelo aba aahiroma onvuruwana Satana. Awene aahimetxa mabasa aavahile Mulugu odhulu wila akosege. Nanda awene aahidha apano velaboni ya vati nanda aahivikosela maningo a omuthu. Weyo onoziwa sabwaya?
Bibilia onloga wila eji yapadduweli sabwani ana aba a Mulugu aahawoona ayana ookoddela velaboni ya vati nanda aafuna akalege na awene. Noona awene aahidha velaboni ya vati nanda aahatela ayana aba. Bibilia onloga wila eji yali yabure, sabwani Mulugu waakosile angelo wila akalege odhulu.
Angelo aba na ayana awa mwakaanelani ana, ana aba anthiyana na ana ena. Txino omaromowa awene kaathiyaniletxe. Mbwenye awene ela wunuwavi, nanda bagakalavi a guru, mpaka okala mikango.
Mikango esi dhali dhabure. Nanda sabwa yawila aali anddimuwa vaddiddi vina a guru, awene annavoreya athu. Awene antamela waamagelela athu otene okala abure ninga awene.
Enoki wahimala okwa, mbwenye velaboni ya vati vaahikala mulobwana wali waderetu. Mulobwana oddu watxemerhiwa Noe. Dila dhotene iyene wankosa ejile yafuna Mulugu wila iyene akose.
Siku nimodha Mulugu wahimpanga Noe wila wahifiya mudhidhi wa Iyene watolotxa athu otene abure. Mbwenye Mulugu wanfuna onvuna Noe, murala waye vamodha na dhinama dhinjidhene. Ndoweni noone mukalelo wakosile Mulugu eji.
Wita 6:1-8; Yuda 6.