NIPADDUWO 39
Mukongozo Wa Arau Ohisorha Marhuwa
KOONA marhuwa na misapo esi dhowithwa dhisorhile va mukongozoni obe mutogonyo obu. Obu bu mukongozo wa Arau. Marhuwa aba vamodha na misapodha dhowithwa dhisorhile va mukongozoni wa Arau omathiyu omodha bahi! Ndoweni noone sabwaya.
Mpaka ovanene Aizraeli eeddile dhuwa dhuwa mwiddedderini mudhidhi muñgonovi. Athu ena a nlogo kanoona ninga Moize onofanyeela okala musogorheliya, obe wila Arau onofanyeela okala namakuthaya munddimuwa. Kora ddi mmodha onoona dhaene, ninga vina Datani, Abirau vamodha na asogorheli a nlogo 250. Otene aba ahidha nanda ahimpanga Moize: ‘Nyuwo muviwelihedhini mwanya vadhulu va iyo ena notene?’
Moize ohimpanga Kora na anamafara aye: ‘Mangwana na membesi muthukule dhibale dha motho nanda mwikemo lubani. Mugamala mudhe va tabernakulu ya Yehova. Ninela omoona oddule onamusakule Yehova.’
Mmangwananimwa Kora vamodha na anamafara aye 250 ahidha va tabernakulu. Athu ena enjene ahidha vamodha wila aakamihe alobwana aba. Yehova ohiludduwa vaddiddi. Moize ohiloga dhahi: ‘Kabudduwanivo va misasani dha alobwana aba abure, munaddiginye elobo elobovi eli yawa.’ Athu ahivuruwana, nanda ahisusamo mmisasani dha Kora, Datani na Abirau.
Mumaleliye Moize ohiloga dhahi: ‘Modheela eji nyuwo munela omuziwa bani omusakuli Yehova. Mathaka anela ofuguwa nanda anela wamedha alobwana aba abure.’
Mohigoneela Moize mumaleliye ologa, mathaka ahifuguwa. Musasa wa Kora na dhilobo dhaye vina Datani na Abirau vamodha na otene abale ali na awene ahimothelamo, nanda mathakaya ahakuneela. Athu mwiwelani olila wa abale agweli mmathakani, awene ahikuwa: ‘Muthamage! Mathaka txino anonimedha vina iyo!’
Kora na anamafara aye 250 alivi waddamela tabernakulu. Noona Yehova ohiruma motho, nanda awene otene ahiddumeyiwa. Mumalelani Yehova ohimpanga Eliazar mwana wa Arau wila athukule dhibale esile dha motho dha alobwana abale akwile nanda akosena elobo yopepeya yokuneelana ebuwa ya mukutho. Yokuneelana eji ya ebuwa jawila elabege ninga nlago wa Aizraeli yawila kavo anfanyeela olaba ninga anamakutha a Yehova s’ohikala Arau na ana aye a alobwana.
Mbwenye Yehova onfuna oonihe deretu eji wila ddi Arau na ana aye abene asakuliye wila akale anamakutha. Noona iyene ohimpanga Moize: ‘Karuma wila musogorheli wa kadda ziza na Izraeli adhena mukongozo waye. Ziza na Levi, Arau onofanyeela odhana mukongozo waye. Ogamala wike kadda mukongozo mu tabernakulu osogorho wa kasha ya nipagano. Mukongozo wa mulobwana odduwene omusakulimi ninga namakutha onela osorha marhuwa.’
Mmangwananimwa na membesi, koona, Moize mwañganeliye mukongozo wa Arau, wahisorha marhuwa aba na misapo esi! Ovanene weyo onowoona sabwa yakosihedhi Yehova mukongozo wa Arau osorha marhuwa?
Olebeliwa 16:1-49; 17:1-11; 26:10.