NIPADDUWO 47
Mbava Mu Izraeli
KAÑGANA eji entibeela mulobwana oddu mmusasani mwaye! Kapoti wokoddela, vina mwarha wa nddarhama na kobiri dhiñgonovi dha parata. Iyene othukulile mu sidadi ya Jeriko. Ki txini egafanyeeli okosiwa na dhilobo dha mu Jeriko? Weyo onowubuwela?
Esi dhathongeliwe otolotxiwa, nanda nddarhamaya na parata dhanfanyeela operhekiwa mpule munkoyiwa muhaku mu tabernakulu ya Yehova. Noona athu aba ahinvanya Mulugu. Awene ahiya elobo eli ya Mulugu. Nzina na mulobwana oddu ddi Aka, nanda aba ali na iyene ba athu ena a murala waye. Ndoweni noone txini epadduwile.
Mumaleli Aka wiya dhilobo esi, Josue oharuma alobwana ena wila awane na sidadi ya Ai. Mbwenye awene ahigonjihiwa mu koddonimwa. Ena aahipiwa, nanda abale ahalilevo ahithawa. Josue onokubanya vaddiddi. Iyene ohiginanti vati na vabani nanda ohilobela wa Yehova: ‘Muthiyelini eji onipadduwela?’
Yehova ohakula: ‘Kavenya! Izraeli ohithega. Awene ahithukula dhilobo dhafanyeela otolotxiwa obe operhekiwa o tabernakulu ya Yehova. Awene aahimwiya kapoti wokoddela nanda ahinvita. Kaddinoreeliheni mpaka nyuwo otolotxa esi, vamodha na oddule othukuli dhilobo esi.’ Yehova ohiloga wila iyene onela omulagiha Josue mulobwana oddu wabure bani.
Noona Josue ohagumaniha athu otene vamodhavi, nanda Yehova ohimutonya mulobwanaya wabure Aka. Aka ohiloga: ‘Ddihithega. Ddahimoona kapoti wokoddela, vina mwarha wa nddarhama na kobiri dha parata. Ddaahifuna vaddiddi mpaka othukula. Munela ofanya esi badhitibeeliwe mmusasani mwaga.’
Dhilobo esi mwafanyeliwani nanda badhidhowiwana wa Josue, iyene ohiloga na Aka: ‘Onitotelelini makathamiho? Ovanene Yehova onela wutotela makathamiho!’ Venevale athu otene ahinvokedha myarha Aka na murala waye mpaka okwa. Eji kinlagiha wila txipo kaninfanyeela othukula dhilobo dhihili dhehu?
Mumalelani Aizraeli ahidhowa wili owana na Ai. Dila eji Yehova ohikamiha nlogo naye, nanda awene ahipemberha koddoya.
Josue 7:1-26; 8:1-29.