NIPADDUWO 86
Alobwana Eeddihiwe Na Neneri
ONOWOONA neneri ejile enzerimela ejene entonya mmodha mwa alobwana aba? Muvenyelani mu Yeruzalemi, neneriya ehibudduwa. Alobwana aba andana Omadheelo wa Nzuwa, mabasa awa ba osunza dhineneri. Awene anokuluvela wila neneri eji eswa enowathukulela wa muthu wovuwa.
Alobwana aba mufiyelani o Yeruzalemi, awene ahivuza: ‘Mwana onfuna okala mwene wa Ayuda oli wuvi?’ “Ayuda” thi nzina niina na Aizraeli. Alobwanaya ahiloga dhahi: ‘Voroma nahoona neneriya ya mwana banili Omadheelo wa Nzuwa, nanda nidheeli omwebedha.’
Erodi oddwene oli mwene mu Yeruzalemi, mwiweliye mwaha wa eji iyene wahiludduwa. Iyene kanfuna wila mwene mwina athukule mburo waye. Noona Erodi wahatxemerha anamakutha a makamakaya nanda baavuza dhahi: ‘Mwene ororomelihiwe onabaaliwe wuvi?’ Awene ahakula: ‘Bibilia onloga wila o Belemi.’
Noona Erodi ohatxemerha alobwana ovenyedha Omadheelo wa Nzuwa, nanda ohiloga dhahi: ‘Kadhowani mwamutamele mwanamulobwanaya. Muganfanya muddiziwihe. Ddinfuna ddidhowe ddamwebedhe vina.’ Mbwenye mwa ebaribari, Erodi wafuna anfanye mwanaya wila ampe!
Mumalelani neneriya ehisusela vasogorho va alobwanaya bidhowa o Belemi, nanda wimela vadhulu va mburo vali mwanaya. Alobwanaya muvolowelani mu numba, awene ahinfanya Maria na Yezu muñgono. Awene ahiburutxa sagwati ahinvaha Yezu. Mbwenye musogorhomwa Yehova ohalaga alobwanaya mu orohani wila ahiyelele wa Erodi. Noona awene ahiyelela elabo yawa modheela dila yina.
Erodi muziweliye wila alobwana abale a Omadheelo wa Nzuwa ahidhowa mmudhi, iyene ohiludduwa vaddiddi. Noona iyene ohigwiha nlamulo wila analobwana otene a mu Belemi a vyaka biili dha obaaliwa mpaka mutxiddo apiwe. Mbwenye Yehova ohimulaga Zuze na othaga mu orohani, nanda Zuze ohidhowa wiJipito na murala waye. Vasogorhova, Zuze muziweliye wila Erodi ohikwa, iyene ohimuthukula Maria na Yezu nanda beyelela mmudhi o Nazareti. Ku wenewa wunuwile Yezu.
Weyo onoona ninga wakosihile neneri ejile eswa ozerimela bani? Kobuwela, voroma alobwana abale aadhowile o Yeruzalemi mumalelani woona neneriya. Satana Ddiabo wafuna ampe Mwana Mulugu, nanda iyene wahiziwa wila Mwene Erodi wa Yeruzalemi agahitamela ompa. Dhaene ddi Satana bahi wakosihile neneri ejile ozerimela.
Mateus 2:1-23; Mikeya 5:2.