Siarhi Ya Nabuya Ba Mattanga Animuttittimiha Mulugu

AKRISTU anorumiwa Okosa Mattanga a Wubuwela okwa wa Kristu. Mattanga aba anotxemerhiwa vina ‘Siarhi ya Nabuya.’ (1 Korinto 11:20) Txini elitxi ya ntapulelo na mattanga aba? Ankosiwa siku gani vina anfanyeela okosiwa dhavi?

Yezu Kristu wetile mattanga aba yaka ya 33 E.C. mattiyu wa Paskwa wa Ayuda. Paskwa wali mattanga aakosiwa dila modha bahi kadda yaka siku na 14 mweri wa Nisani wa Ayuda. Wila Ayuda aziwe data ejile ninga munooneyelani awene aajikira siku na nsaka na meza, mudhidhi wakalawo siku na ottamagela mawora 12 a mutana vina mawora 12 a mattiyu. Wooneya wa mweri muswa waddamana ekinosio ya kasikasi nali labo noroma na mweri wa Nisani. Paskwa wakoseya masiku 13 vasogorhova, nzuwa baniddowelile.

Yezu wahikosa mattanga a Paskwa na arumiwi aye, wahimpaganya Yuda Iskarioti, mumaleliye beeta Siarhi ya Nabuya. Siarhi eji ehali vamburoni va Paskwa wa Ayuda, noona enofanyeela okosiwa dila modha bahi kadda yaka.

Muttaka wa Mateu onloga dhahi: ‘Yezu wahittukula mukatte, nanda mumaleliye oreeliha, wahimenya baavaha anamasunza aye bagaloga dhahi: “Kaakelani, kajani. Obu ontapulela maningo aga.” Wahittukula vina ekai, nanda mumaleliye otamaalela, iyene wahavaha awene bagaloga dhahi: “Kamwanimo nyuwo motene; sabwani eji entapulela ‘nikami naga na nipagano,’ nttene ninakuttuleliwe oderetu wa attu enjene wila dabi dhileveleliwe.”’​—Mateu 26:26-28.

Attu eena anororomela wila Yezu wahisaddula mukatte bukala wene maningo aye vina yawila wahisaddula vinyu banikala wene nikami naye. Mbwenye, mudhidhi waperhekile Yezu mukatte obu, maningo aye aali antero. Arumiwi a Yezu ela oja wene maningo aye vina ela omwa wene nikami naye? Nne, sabwani eji egakalile oja nyama ya muttu vina oku ogakalile olupa nlamulo na Mulugu. (Wita 9:3, 4; Onamakutha 17:10) Mowiwanana na Luka 22:20, Yezu walogile dhahi: ‘Ekai eji entapulela nipagano niswa mowiwanana na nikami naga, nttene ninfuna okuttuleliwa oderetu wenyu.’ Ekai ejile yahisadduwa wene bikala ‘nipagano niswa’? Eji kigawodheyile, vowila nipagano, oku olagana, kayo etagano enwodha oddiginyiwa.

Noona, mukatte na vinyu esi dhizinddiyelo bahi. Mukatte ontapulela maningo owakwana a Kristu. Yezu walabihedhile mukatte watxeleeliwe va mattangani a Paskwa. Mukatteya wakosiwe s’ohikiwa emela. (Obudduwa 12:8) Bibilia mudhidhi mwinji onolabihedha emela ninga ezinddiyelo ya dabi obe ovirigana. Noona mukatte ontapulela maningo owakwana abale aperhekile Yezu. Maningo aba kaana dabi.​—Mateu 16:11, 12; 1 Korinto 5:6, 7; 1 Pedro 2:22; 1 Joau 2:1, 2.

Vinyu yofila entapulela nikami na Yezu. Nikami ntti ninolabiha nipagano niswa. Yezu walogile wila nikami naye nakuttuleliwe ‘oleveleliwa dabi.’ Dhahene attu a omaningoni poddi okala ootxena vamentoni va Mulugu vina poddi okala na Yehova mu nipaganoni niswa. (Ahebreu 9:14; 10:16, 17) Nipagano ntti, ninowawodhiha Akristu abale oororomeleya a 144.000 odhowa odhulu. Odhulu wene oko awene anelege olaba ninga amwene vina anamakutta wila nlogo notene na attu nireelihiwe.​—Wita 22:18; Jeremiya 31:31-33; 1 Pedro 2:9; Ovuhulela 5:9, 10; 14:1-3.

Bani onfanyeela oja dhizinddiyelo esi dha Mattanga a Wubuwela Okwa wa Yezu? Txibarene, anfanyeela oja ba abale ali mu nipaganoni niswa bahi​—kuloga dhahi, abale ana njeedhelo na odhowa odhulu​—banfanyeela oja mukatte na vinyu. Muya wokoddela wa Mulugu onowalagiha deretu abene yawila awene ahisakuliwa wila akale amwene a odhulu. (Roma 8:16) Awene vina ali mu nipaganoni na Omwene vamodha na Yezu.​—Luka 22:29.

Ki abale ana njeedhelo na okalawo na mukalakala Mparaizu velaboni ya vati? Awene anowiwelela nlamulo na Yezu vina anodhowa o Siarhini ya Nabuya, mbwenye awene andowa o Siarhini ya Nabuya ninga aliba woona a nriho, ottiya oja siarhiya. Dila modha kadda yaka nzuwa nigamala oddowela va Nisani 14, Anamoona a Yehova anokosa Mattanga a Siarhi ya Nabuya. Masiki ozugunuwa elabo yotene attu matxikwi mang’onovi bahi vanlogani wila ahikaana njeedhelo na odhowa odhulu, mattanga aba ba makamaka wa Akristu otene. Obu mudhidhi onawodhe awene otene otanaalela okwela wopitta wa Yehova Mulugu vina wa Yezu Kristu.​—Joau 3:16.