Yezu Ohattanyuwela Anamattadda

Yezu mmaleliye wattanyuwela arumiwi, musogorhomwa Pedro ohivenya odhowa ottadda o Nyaza ya Galileya. Anamasunza anfwarile baba: Tomé, Tiago, Joau na eena. Awene attadda omattiyu wotene kapile elo.

Mudhidhi wa ebembe, ahimoona muttu bemelile kobela ya mwinje. Iyene ohakuwela, ohilogana: ‘Muhipa obadha?’ Awene amwakula: ‘Nne!’ Iyene ohawaddelavi: “Tuputxedhani mulaba epaddi y’omononi woja wa mwanddiya, munopa.” Mukoselani, mulabaya ohipa oba dhinjene dhahawodhani owetela otakulu. Joau ozinddiyela wila mulobwanaya oddule wali Yezu, nanda ohiloga: “Oddu ddi Nabuya!” Pedro mwiweliye wi ddi Nabuya, ohaguvela otupuwela mmanjeni, ovaddela wali Yezu. Akwaye ahalile mmwanddiyani atxapaga.

Mvaddelelani, afwanya vamakarhani oba vina mukatte. Yezu ohakuwela wi adhena oba dhing’onovi wi enjedhedhenavo. Nowidhawo ohakuwela eraga: “Dhawunoni muje.”

Mmalelani oja, Yezu onvuza Pedro: “Onoddikwela opitta aba?” Pedro omwakula: ‘Nabuya nyuwo munnona wi ddinoukwelani.’ Yezu ologa: “Sapihagá mabilaga.” Yezu onvuza wili: ‘Pedro weyo onoddikwela-wene?’ Pedro omwakula: ‘Nabuya nyuwo munoziwa wi ddinoukwelani.’ Yezu ologavi: “Sapihagá ana-mabilaga.” Yezu onvuza dila yaneraru: ‘Pedro onoddikwela-wene?’ Apa Pedro oribiwa murima. Omwakula: “Nabuya nyuwo munnona dhetene. Munoziwa pama wi miyo ddinoukwelani.” Yezu omwaddela: “Sapihagá mabilaga.” Mmaleliye ologane: “Oddifware!”

Mwa malabo 40 mvenyiheliwiye, Yezu ohattanyuwela anamafwara aye dila dhinjene.