Jibo Dhiswa dha Webedhana!
1 Mutugumano okosiwe ovanenevi wa Watch Tower Bible and Tract Society of Pennsylvania, okosiwe siku 4 na Otuburu, 2014, ohisasanyedhiwa wi nivuru nehu na wibana nenjedhedhiwe. Txibarene dhali miselu dhohagalaliha! Aalivo etene ahubutxedhiwa wi jamakamaka wibaga jibo dha Omwene mmebedhoni mwehu.—Masal. 96:2.
2 Txino weyo onotikina, ‘Ekalelini ya makamaka wenjedhedha jibo mu nivuruni nehu na wibana?’ Vahikala sabwa dhinjene. Voroma, ononelamo wehu Malebo onodhowavi bugakala woziweya vaddiddi, ejoya enopatta oyesa wa jibo dhehu. (Gano. 4:18) Sabwa yina ekalelani yamakamaka osunzeliwa dila yina: Dhologa dhinjene na mazuya anlabihedhiwa mwari mwa nivuru ntti na jibo ninttiddihedhiwa mabasa ovanene niniwanana na Mazu anfanyeya mBibiliani wa Tradução do Novo Mundo wawale. Ovano Mazuya abo anofanyeela osunzeliwa dila yina wi ewanane na Tradução do Novo Mundo muswa. Vowi enofuneya okosa mabasa oliba vaddiddi wi dhisunziwe jibodha esi na mukalelo wozivela, vahifiyedha wubuweliwa wi jamakamaka wenjedhedhiwamo jibo dhiswa dhing’onovi munivurunimwa na jibo.
3 Ninofanyeela ojeedha wi nipidiwe nivuru niswa na jibo nihinaroma olabihedha jibodha eso dhiswa? Nne kahiyo mwenemo. Ninowagala olaleya wi meri dhindawo dha musogorho, jibo eso dhiswa dhinele oburutxiwa mu Web site, jw.org. Jibodha eso dhiswa dhigaburutxiwa, mpaddi wa Mutugumano wa Mabasa onelege odhana mutonyo ogaloga “jibo eswa.”
4 Ninasunze Dhavi Jibodha eso Dhiswa: Masaka meena enorutxa vaddiddi osunza jibo eswa. Mowiwanana na Namaleba wa Masalmo ninfuna nibe mmatugumanoni a mulogo vina ‘txipo kaninamaale.’ (Masal. 30:12) Wi nisunze jibodha eso dhiswa ninofanyeela ofara ttarho esi dhovevuwa.
• Kavuruwana dila dhinjene dhogaravariwa dha jibodha dhinekiwe mu Web site. Ogavuruwana dila dhinjene dhogravariwadha, kunarutxiwe wubuwela jibodha.
• Wibe jibodha bugafariha yogravariwa. Kakosa dila dhinjene mpaka osunza deretu jibodha.
• Katagiha jibo dhing’onovi dila dhinjene mwari mwa mudhidhi wa webedha wa ntakulu mpaka anamudhi awo anonelemo vina alemeelele jibodha.
5 Musogorho jiboya eswa akala jomarihana Mutugumano wa Mabasa, omaromo anamewa anele ovuruwana bahi yogravariwa ya marhimba. Mwa venevo anamewa anele wiba bagafara yogravariwa ya marhimba dhahene ninga munkoselihu na jibo dhiina.
6 Weyo ogobuwela esuwene, wiba mmatugumanoni mwehu onowenjedhedha wagalala wehu wa otaganyiha lizu nehu nimwibelaga vina nimuttittimihaga Yehova. Noona kaninfanyeela okaana elemeelelo ya obudduwela otakulu omaromo wa jibo mmatugumanoni mwehu a Okristu.
7 Vahikala mukalelo mwina wa olagiha ekuluvelo na wagalala wa jibo dhehu dhokoddela. Mmatugumanoni a murudda vamodha na matugumano a ttattamwa, onokalagawo mudhidhi wa orumiha jibo epaddi ehinatti oroma. Dila biili wa kadda yaka abali na arogora ovivelela ozugunuwa elabo yotene anokosaga oleddo na muhaku wawa adhowaga o Patterson, Nova York, wi agravari jibo dhaderetu wi nilabihedhe mabasa mmebedhoni mwehu. Noona akala mwimeleli wa epaddi ononiwoba wi nigilati wi nivuruwane esasanyedhiwe na mparha wa jibo txibarene ninofanyeela ogilati. Okosa ejuwene onele onikamihedha osasanyedha mirima dhehu wi niwodhe ovuruwana mowakwana dhologa dhinfarela dha porograma.—Ezdra 7:10.
8 Omamalelo wa matugumano ehu a ddabuno, ninele wiba Jibo modha eswa ena musorho “O Reino já Governa!” Jiboya eji, elogeliwe vamatugumanoni a yaka, esasanyedhiwe wi etonye labo nakwanihile vyaka 100 dha obaliwa wa Omwene.
9 Jibo esi dhiswa txibarene “dhilobo dhaderetu” dhinda wa Yehova. (Mt. 12:35a) Iyo notene ninokokomeziwa wi nisunze jibodha esi wi nibe na murima ninvahaga nttittimiho ninddimuwa Mulugu wehu!—Masal. 147:1.