Nunuwihaga Ewodhelo Yehu Mmabasani a Olaleya—Ovaha Onamoona Modheela Interfone (Telefoni ya Vamusuwo)

Ekalelini Yamakamaka: Ovaha Onamoona nilabihedhaga interfone mudhidhi mwina elobo yorutxa. Ninfanyeelela okosavo eni wi yorutxa ninga ejuwene enadhe wobaniha mabasa ankosihu? Ninofanyeela wubuwela wi ovaha onamoona nilabihedhaga interfone poddi okala marhe meena a wawaddelana attu eena miselu dhapama. (Rom. 10:14) Dhotagiha dhiina dhinloga wi onovahiwaga onamoona wopureleyamo modheela olabihedhiwa marhe ninga abuwene. (Koona mu Anuário de 2011 makuku 65-66, vina Anuário de 2000 nikuku 54, ddima 3) Kafara malago aba ali mutxiddo.

Ninakose Dhavi:

• Kasasanyedha mukalelo wolagiha womaguva vina olebe wi owodhe omwengesela mwanamuralaya ologelaga mu interfonini. Ejoya enele wenjedhedha nikuluvelo nawo. Vamaromo omwaddele edheeliwe. Kaloga nzina na mwanamuralaya akala ninowooneya va interfoniniva. Omamalelowa omuttiyedhe foliyeto obe revista dhinamukamihedhe ononelamo miselu dhinji.

• Kakala muttu wowandaneyana. Ogalogaga na muttuya onofanyeela olagiha mukalelo waderetu vina wa emwerumweru.

• Kuzuzume vina okale wologeyana. Ologe dhilobo dhonyaala vina na lizu nowiweya. Kulogege momaguva vaddiddi vina kukale muttu wowaalana vaddiddi ologawa.

• Kakaana moonelo waderetu. Miringotti dhinddimuwa munokala numba gwe dhina interfone dhologana anamuralaya. Mwa venevo weyo onofanyeela osakula numba ttaru bahi wi ologe na anamuralaya ogamala olebele numba esile dhilabile weyo. Akala onogonelavo vaddiddi va interfinini ofunaga wi walaleye anamurala etene onele wazuzumiha anamurala eena.

Otagihe Dhahi Mweri Obuno:

• Mudhidhi wa webedha wa ntakulo kakosa masunzo oshagihana olagihaga mukalelo wolabihedha interfone.