Vamaromo Muteyihane na Mbalawo—Dhavi?

Kobuwela dhahi, weyo onkala o’Galileya nsaka na Yezu. Ohivenya ohikosa oleddo odhowaga o’Jeruzalemi oja Mattanga a Misasa. Attuya ali ohagalalene mukwattinimwa na anamebedha eena andela wolapela. Weyo onfuna omperhekele Yehova mukutto. Ottukula nibila, oroma weeda bugavira mmarampani a mukatti mudhaliwe na attu, odhowaga mumparhani. Ofiyaga mumparhanimwa, weyo wawoona attu enjene ali mwenemo anfuna vina operheka mikutto dhawa. Ovano ofiya mudhidhi wawo wila wavahedhe anamakutta nibila nawo. Mudhidhene obo, weyo omubuwela mbalawo oli mwenemwale-mwenemwale mumparhani obe epaddi yina onna yammirimani na weyo. Yezu otapulela enfwanyeliwe okosa. (Kengesa Mateu 5:24.) Weyo na mbalawo osilidheyile munawodhe dhavi oteyihana ninga mulogeli Yezu? Mwa ddima esi dhili mutxiddo, ottikitte osogorhowa mwa yowakulaya yomyala.

WEYO ONOFWANYELA. . .

• ologa na mbalawoyá akala onoubuwela wi iyene ohisilidhiwa-wene na weyo

• omukamihedha ogomiha magudulanoya omutapulelagamo mowakwana-mwene akala onowoona wi iyene kanrutxa osilidhiwa obe onokosa mpaddi wa makaniya

• omvuruwane mbalawo nofwaseya agaloga, masiki akala kunnonelamo deretu, vina omukumbirhe nlevelelo sabwa ya dhikosiliwe obe dhilogiliwe

MBALAWO ONOFWANYELA . . . 

• otamela nikamihedho na eena a mmulogoni mwa wapanga eniwamo iyene

• wusisigula, ononelamo deretu makaniya vina woona akala ddi weyo oviriganile

• wubuwela oviyeviha vina oliba murima olagihiliwe wukosihile onfiyedha vina aulevelele na murima wotene

Masiki niziwaga wi webedha wehu masaka abano kuntaganyiheya na mikutto ya dhinama, txini esunzihile Yezu mwaha wa wiwanana onna oteyihana na mbalihu, na webedha onrumeela Mulugu?