Mabiskoyito avahiwe Anabwaga
“OMAROMO wa yaka ya 2014, ddelaga wedda musidade na anabwaga. Anamoona a Yehova afwanyilegimi musidade mburo dhahi, vakuvi na karinya dhawa dholaleyana, ahabala deretu vina annalejela attu otene avira venevale.” Ologile ddi Nick onkala murudda wa Oregon elabo ya Estados Unidos.
“Anamoona abale a Yehova, katonyihedha bahi opama attu, ahatonyihedha vina opama anabwaga. Siku dhahi Elaine, waligi vakuvi na karinya yaye wahavaha mabiskoyito anabwaga eli. Oromana labonene nttile, mudhidhi wotene waviremi venevale, anabwaga afuna adhowe vakarinyani avahiwe wili ‘mabiskoyito.’
“Dhahivira myeri dhing’onovi, anabwaga anziveliwa mabiskoyito oku miyo ddaziveliwa ologa vang’onovi na Anamoona a Yehova. Mbwenye kaddaziveliwa okala mudhidhi mwinjene ddilogaga na awene. Miyo ddana vyaka 70 dhobaliwa, mbwenye kaddaziwa esile dharumela Anamoona a Yehova. Ddahinyimuwa na makapela menjene, nona ddahigana omusunza Bibilia ddamunya.
“Mudhidhene obo ddanawona Anamoona ena a Yehova dhipaddi dhina dha sidadi na makarinya awa olaleyana. Awene vina ali attu ofiyedheya, anakula mavuzo aga amulabihedhaga Bibilia, eji eddittukulela odhowavi ddakuluvelaga venjene.
“Labo dhahi, Elaine oddivuza: ‘Weyo onorumela wi dhinenama nvaho wa Mulugu?’ Ddahimwakula: ‘Ndde, ddinorumela txibarene!’ Nanda Elaine wahiddengesela nlebo na Izaiya 11:6-9. Eji eddittukulela ofunavi omusunza Bibilia, masiki dhawene kaddafuna wakela nne nivuru nimodha na Anamoona a Yehova.
“Oromana venevale, ddahikana makani oziva na Elaine vina mamunaye, Brent. Awene ahiddivaha malago a wi ddengese oromana nivuru na Mateu ofiyedha nivuru na Merelo wi ddinonelemo entampulela okala Mukristu webaribari. Nanda jijuwene yakosilemi, nona kuwavirile mudhidhi mwinjene ddahirumela omusunza Bibilia na Brent na mwadhiye Elaine. Eji epadduwile velimweni yaka ya 2016.
“Ddanziveliwa venjene nsunzo nehu na Bibilia, odhowa omatugumanoni sumana dhotene vina ejile yasunziha Bibilia txibarene. Muvirile yaka modha na myeri dhing’onovi ddahibatiziwa ninga Munamoona wa Yehova, ovano ddina vyaka 79 dhobaliwa vina ddiziveliwa venjene sabwa yofwanya religiau yebaribari. Yehova oddiruriha vowi ddinokosa mpaddi wa alabeli aye, animulabela na murima wotene.”