NIPADDUWO 6
Mwana Waderetu, Na Mwina Wabure
KAMWAÑGANE Kaini na Abeli ovanene. Oheeli ahimala wunuwa. Kaini wahidha okala namalima. Iyene waalima milima dha thaga vamodha na misapo vina mikwani.
Abeli wahidha okala mukumbuzi wa mabila. Iyene wanziveliwa okoya mabila mañgono. Aba ahunuwa mpaka okala mabila manddimuwa, nanda mwari mwa mudhidhi muñgonovi Abeli ohikaana nikuru na mabila wila añganelege.
Siku nimodha Kaini na Abeli ahimudheelana Mulugu mvaho. Kaini ohidhana dhoja dhaalimiliye. Nanda Abeli ohidhana nibila naderetuna nakaaniliye. Yehova ohiziveliwa na Abeli vamodha na mvaho waye. Mbwenye kaziveliwe na Kaini vamodha na mvaho waye. Weyo onoziwa sabwaya?
Kayo sabwa yawila mvaho wa Abeli bwakaliletxe bahi opitha wa Kaini. Sabwaya jawila Abeli muthu waderetu. Iyene onomukwela Yehova vina onomukwela mbali waye. Mbwenye Kaini muthu wabure; iyene kanimukwela mbali waye.
Noona Mulugu ohimpanga Kaini wila onofanyeela osaddula ekalelo yaye. Mbwenye Kaini kavuruwanile. Iyene ohisilidhiwa vaddiddi sabwani Mulugu waziveliwetxe na Abeli. Noona Kaini wahiloga na Abeli wila: ‘Ndowe omundda.’ Wenewale, balivo woka, Kaini ohimbubudda mbali waye Abeli. Ohimbubudda vaddiddivene mpaka ompa. Eji kayali elobo yowopiya vaddiddi yohifanyeela Kaini okosa?
Masiki Abeli mukweliye, Mulugu onomubuwelavi. Abeli wali muthu waderetu, nanda Yehova txipo kanimudduwala muthu ninga oddule. Noona siku sikuvi Yehova Mulugu onela omudhiha wili Abeli wila akalegewo. Nsaka nthile Abeli txipo kanaakwe viina. Iyene onela owodha okalawo apano velaboni ya vati na mukalakala. Kinakale yaderetu waaziwa athu ninga Abeli?
Mbwenye Mulugu kanziveliwa athu ninga Kaini. Noona Kaini mumaleliye ompa mbali waye, Mulugu wahimusothotha modheela omuthamagihedha wolapela na murala waye. Kaini adhowaga okala mpaddi mwina wa elabo ya vati, iyene wahimuthukula mmodha mwa arogori aye, nanda oddu wahidha okala mwadhiye.
Na ovira wa mudhidhi Kaini na mwadhiye aahiroma okaana ana. Ana alobwana na ana ayana ena a Adamu na Eva aahitelana, nanda awene vina aahikana ana. Mohigoneela velaboni ya vati vaahikala athu enjene. Ndoweni nisunze mwaha wa athu ena mwa abene.
Wita 4:2-26; 1 Joau 3:11, 12; Joau 11:25.