NIPADDUWO 12
Athu Ahimaga Murhingothi Munddimuwa
VYAKA dhinjidhene dhihivira. Ana a Noe aahikaana ana enjene. Nanda ana awa aahunuwa vina bakaana ana ena. Mohigoneela velaboni ya vati vaahikala athu gwe.
Mmodha mwa athu aba wali musukulukumwe wa Noe watxemerhiwa Nimirodi. Iyene wali muthu wabure oddwene watota vina wapa dhinama vamodha na athuya. Nimirodi vina wahivikosa mwene wila aalamulelege athu. Mulugu kaaziveliwe na Nimirodi.
Nsaka nthile athu otene aaloga elogelo modha. Nimirodi waafuna aagumanihe otene vamodhavi wila aalamulelege. Noona weyo onoziwa txini yakosiliye? Iyene wahapanga athu wila amage sidadi na murhingothi munddimuwa mwari mwa sidadi eji. Kawoone va nladdanihoni bagakosa masizola.
Yehova Mulugu kaaziveliwe numba eji. Mulugu wafuna wila athu amwadheyele wolapela nanda akalege velaboni yotene ya vati. Mbwenye athuya aahiloga dhahi: ‘Kadhawunoni! Ndoweni nimageni sidadi vina murhingothi wolapa vaddiddi wila mutompiya ofiyege odhulu. Venevo ninela ovuwa!’ Athu aba aafuna avithithimihe, othiya omuthithimiha Mulugu.
Noona Mulugu wahakosiha athu abale wimetxa omaga murhingothiya. Weyo onoziwa mukalelo wakosiliye eji? Modheela wakosiha athu abale ologa dhilogelo dhothiyana thiyana morurumutxa, othiya ologaga elogelo modha. Aliba omagaya kewanana viina muthu na mukwaye. Ji ejene yadheeli otxemerhiwa sidadi yawa Babeli, obe Babilonia, entapulela “Mbigiddi.”
Veneva athu aahiroma obudduwavo va Babeli. Makuru a athu abale aaloga elogelo yakakene aahidhowa okala vamodhavi mpaddi mwina wa elabo ya vati.
Wita 10:1, 8-10; 11:1-9.