NIPADDUWO 13
Abramu—Marho Wa Mulugu
MBURO mwina wadhowile athu okalaga muvireli Mpulo watxemerhiwa Uri. Mburo obu wahidha okala sidadi ya makamaka vaddiddi yana matakulu aderetu mwarimwa. Mbwenye athuya a wenewale aawebedha amilugu ahili a ebaribari. Bu mukalelo wakosani o Babeli vina. Athu a mu Uri na Babeli kaali ninga Noe na mwana waye Semi, abene aamulabavi Yehova.
Omagomelowa, vyaka 350 muvireli mpulo, muroromelei Noe wahikwa. Muvirelani vyaka biili bahi pabaaliwe mulobwana oddu onimooniwe va nladdanihoni nthi. Iyene wali muthu wa va woka vaddiddi wa Mulugu. Nzina naye nali Abramu. Iyene wakala na murala waye mu sidadi ejile ya Uri.
Siku nimodha Yehova wahimpanga Abramu wila: ‘Kabudduwamo mu Uri vamodha na amudhi awo, nanda kadhowa wilaboni ejuwene enfunimi wulagiha.’ Abramu wahimwiwelela Mulugu nanda bathiya mundduni mukalelo waderetu wa egumi wa mu Uri? Indde, iyene wahikosa. Nanda wakoseli sabwani dila dhotene Abramu wannimwiwelela Mulugu mpaka oziwiwa ninga marho wa Mulugu.
Athu ena a murala wa Abramu aahidhowa na iyene mudhidhi wabudduwiliye mu Uri. Babi waye Tera wahikosa ejene. Mudhuli waye Loti vina wahikosa ejene. Nanda txibarene, mwadhi Abramu Saara wahidhowa vina. Na mudhidhi awene otene aahifiya mburo watxemerhiwa Hara, wenewale wakwile Tera. Awene aali wolapelana vaddiddi na Uri.
Muvireli mudhidhi muñgonovi Abramu na ntakulu naye aahimwala va Hara badhowa elabo yatxemerhiwa Kana. Wenewale Yehova wahiloga dhahi: ‘Eji ji elabo enfuna miyo wavaha ana awo.’ Abramu wahikala o Kana nanda wakala mmisasani.
Mulugu wahiroma omukamiha Abramu mpaka okaana makuru manddimuwa a mabila na dhifuwo dhiina vamodha na mazana a adhari. Nanda iyene na Saara kakaanile wene ana awa.
Abramu mwakaaneliye vyaka 99 dha obaaliwa, Yehova wahiloga dhahi: ‘Ddinolibela wila weyo onela okala babi wa malogo menjene a athu.’ Ki eji egapadduwile dhavi, vowila ovanene Abramu na Saara aahuluvala vaddiddi bagakoodda owodha okaana mwana?
Wita 11:27-32; 12:1-7; 17:1-8, 15-17; 18:9-19.