NIPADDUWO 15
Mwadhi Loti Wahañgana Mundduni
LOTI na murala waye aakala vamodha na Abramu mwilaboni ya Kana. Siku nimodha Abramu wahimpanga Loti dhahi: ‘Apano kavali mburo onakwanela dhifuwo dhehu. Ddinowukumbirha, ndowe nimwalane. Weyo ogadhowa mpaddi mmodha, miyo ddindowa mpaddi mwina.’
Loti wahañgana elaboya noku noku. Iyene wahoona mpaddi waderetu vaddiddi wa elaboya wana manje na mani aderetu menjene a dhifuwo dhaye. Eji yali Kwathi ya Jordano. Dhaene Loti wahimwalela wenewale vamodha na murala waye na dhifuwodha. Omagomelowa awene aahikunga mudhi wawa mu sidadi ya Soddoma.
Athu a mu Soddoma aali abure vaddiddi. Eji yanimusilidha vaddiddi Loti, sabwani iyene wali muthu waderetu. Mulugu wahisilidheya vina. Omagomelowa, Mulugu waharuma angelo eeli wila amulage Loti yawila iyene wanfuna omutolotxa Soddoma na sidadi yaddamelile yatxemerhiwa Gomora sabwa ya obure wawa.
Angeloya aahimpanga Loti wila: ‘Kamaguva! Kamuthukule mwadhiyo na ana awo a ayana eeli nanda kabudduwanimo mpuno!’ Loti na murala waye ela othigirigana vañgonovi odhowawa, noona angeloya aahathukula awene na mada nanda baathukulela otakulu wa sidadi. Venevo mmodha mwa angelo aba wahiloga dhahi: ‘Kathamagani wila muvune egumi yenyu! Muhañgane mundduni. Kathamagelani othukuwani, wila munapiwe.’
Loti na ana aye a ayana aahiwelela nanda ahithawa mu Soddoma. Awene keemelile nne vañgono, vina kañganile mundduni. Mbwenye mwadhi Loti keweleli. Mweddelani vañgonovi ovenyedha mu Soddoma, iyene wahiimela nanda bañgana mundduni. Mumaleliye mwadhi Loti wahisadduwa bakala eruwa ya mwinyu. Onomoona iyene va nladdanihoni nthi?
Iyo podi osunzavo nlago naderetu veneva. Eji ennilagiha wila Mulugu onavuna abale animwiwelela iyene, mbwenye abale ankoodda omwiwelela anela oyelela egumi yawa.
Wita 13:5-13; 18:20-33; 19:1-29; Lukas 17:28-32; 2 Peduru 2:6-8.