NIPADDUWO 37
Musasa Wa Webedhamo
WEYO onoziwa numba eji txini? Obu bu musasa wa va woka wa omwebedhamo Yehova. Obu vina onotxemerhiwa tabernakulu. Nlogo nimarihile omaga musasa obu muvireli yaka modha mubudduwelani mu Ejipito. Weyo onoziwa yubuweloya ya omaga musasa obu yali yaani?
Yali yubuwelo ya Yehova. Moize bali vadhulu va Mwango Sinai, Yehova wahimpanga mukaleloya wa omaga musasa obu. Iyene wahimpanga wila asasanye na mukalelo onwodheya ofudhiwa s’ohirutxa. Na mukalelo obu dhipaddidha dhigahiwodheya othukuleliwa mburo mwina, nanda wenewo badhikungiwa wili. Noona Aizraeli vamwalani mburo na mburo mwiddeddereni, awene anthukula musasa obu.
Weyo ogañgana mwari mwa kambirhinya eji eñgono okomoni wa musasa obu, weyo podi woonamo kasha. Eji entxemerhiwa kasha ya nipagano. Eji yahikaana angelo eeli obe akerubi aakosiwe na nddarhama, mmodha kadda komo. Mulugu wahileba wili Malamulo Kumi va myarhani mili dhopepeya, sabwani Moize wahitwa dhoromadha. Nanda myarha esi dhakoyiwa mwari mwa kasha ya nipagano. Vina, murhinga wa mana wakoyiwa mwari mwa ejene. Weyo onowubuwela mana txini?
Arau mbali wa Moize ddisakuliwe na Yehova wila akale namakuthaya munddimuwa. Iyene ohisogorhela nlogo omwebedha Yehova. Ana aye a alobwana anamakutha vina.
Ovanene kañgana kambirhinya eji enddimuwaya ya musasa. Eji enddimuwa wilimo opitha kambirhinya eñgonoya. Weyo onowoona kasha, ejene enthuwela? Eji ji ebuwa veneva vanddumeya anamakutha elobo yonukela entxemerhiwa lubani. Vina vahikala elobo vantomeyiwa panti ena panti tanu na biili. Nanda elobo yanatharu eli mu kambirhinya mpu ba meza. Vadhuluva vanokoyiwa mikathe 12.
Vatamuni va tabernakulu vahikala ebale enddimuwa, obe mukaathe, obwene ondhaalihiwa manje. Anamakutha anolabihedha wila avisuwena. Vahikala vina ebuwa enddimuwa. Veneva dhinama dhipiwe dhinoddumeyiwa ninga mvaho wa omperhekela Yehova. Musasaya obu oli kakamwe vari va sanjarha, nanda Aizraeli ankala mmisasani mwawa otene mozugunuwa musasa obu wa webedhamo.
Obudduwa 25:8-40; 26:1-37; 27:1-8; 28:1; 30:1-10, 17-21; 34:1, 2; Aebreo 9:1-5.